الدليب مع إنو إيقاع بميز غنا "أهلنا الشايقية" الحنين الشجي
لكنو عندنا في الوسط إرتبط بالكضب
الكضب الواحد دا
ومن "ألقابو" الجاك
ومن علامات إستنكارو "دُل"
وجبتـها كبيرة
ولمن تطورت شوية عند ناس الاستايل البرستيتج بقت بـ"تبالغ"
إذكرت الدليب بتصريح منسوب لوظير الزراعة
خبر عاجل ومنشيت عريض "عودة الرئيس والوفد المرافق له"
أها كمان "الوفد المرافق لهو" دي برضو بتعجبني شديد "مبالغة بس"
حتى مرات بتمنى أكون مع "الوفد المرافق لهو"
أحسن كتير من أكون "هو"
فالوفد المرافق "لهو" ما مُطالب بأكثر من اللهو والإستمتاع
تخيل تسافر وتنجعص في البزنسكلاس
ويطوف حولك "بشر" لامعين يتراقشو
وكان "إتنحنحت" ساي يجوك جاريين
"كان أي هيلب يو ؟؟"
تنزل في "فندق" خمسة نجوم وهلالين
والممنوع عندنا كلو "مرغوب" وكمان بالتلج
والبوفيه مفتوح فراخ برازيلي وسمك سلمون فلندي
وتقوم من الصباح "تتمغى"
وتنزل اللوبي ب"الروب" تمغي زين لمن بطنك تطقطق
وتجي تنجقد بالبدلة الماخمج
طبعاً ما من الوفد المرافق لهو
تمش "المؤتمر" بالكاديلاك موديل السنة زي الجعرون
تنزل تدخل القاعة وتقعد في الصفوف الأمامية
وتخلف رجل في رجل لمن تبين نواجز شراباتك
أها يقومو ناس "هو" يهوهو زين لحدي ساعة الغدا
ويبدأ العصر شغل الوفد الصحفي "المرافق لهو"
"وقد قام سعادته بشرح خطته المابتخر موية
وأكد فضيلته على ضرورة مكافحة الجوع "الكافر"
وأمن على الدور الذي تلعبه الدولة في تطوير الخطط الإنمائية
"يعني تتلاعب بيهو " وكدا
ويصفقو ليك "صفقة" شديدة خلاس
وينتهي المؤتمر وتغادر الوفود في حزتا
لكن نحن بنقعد نتلكلك لينا يومين تلاتة
نرتاح من تعب التسوق
ونحزم الشنط ونبدأ رحلة العودة
ويقدموك لحدي المطار
وتصل البلد وأنت حل بهذا البلد
ويستقبلوك في صالة كبار "الظوار"
وحينـها يبدأ عمل ناس الوفد المرافق "لـهو"
"صحافة" بدون حصافة
وإعلام لا دواية ولا أقلام
وقنوات فضائية للبث المباشر من خشامة الوفد مباشرة
ويقول ليك
"عاد إلي البلاد عصر اليوم فخامة السيد الرئيس"
وعاد معاها "قنتة" ورفع كتفين لي فوق
وإنتو قايلنو عاد براهو لا لا
معاهو الوفد المرافق لهو
كانو مشاركين في اعمال "غُمة" مكافحة الجوع في إفريقيا
وإتقعدت "القمة" في العاصمة الإثيوبية "أديس أبابا"
يومين من المناقشات والمداولات وتقديم أوراق العمل
عادوا
ووصلتن لصالة كبار "الظوار" يتشابو للمكرفونات
والعفش داخل "الكرش" في "ظمة" صاحبه
والشنط المكتوب عليـها "قابل للكسر" بتجيب لينا الهوا ساي
المهم "هو" تاني ما عندو "نضم"
ما نضم في "المؤتمر" لمن حِسو "إنقرش"
وبحث زيادة انتاج وحسن توزيع الغذاء تاني شنو؟؟
وفي تصريحات صحفية عقب وصول الوفد..
أكد الدكتور عبد الحليم اسماعيل المتعافي وزير الزراعة
ليلى هيل الله محمد الرسول الله
إسم يهز ويرز
أكد أن الرئيس خاطب القمة
طيب وبعدين ؟؟
أكد الرئيس على تنفيذ مقررات القمة السابقة !!
يعني قبال القمة الجوو منها دي كانت في واحد السنة الفاتت ؟؟
نعم وكانت خاصة بزيادة إنتاج الغذاء
وحسن توزيع الغذاء ودعمه داخل الموازنة العامة للدولة
والعاقبة عندكم في المؤتمرات
لكن "حسب" المتعافي أن الرئيس والله ما قصر "طب"
وضح ليهم كُلي حاجة وما خلا شيتاً بي وراهو
قال ليهم فتح أبواب البلد للمستثمرين في المجال الزراعي !!
"كُر علي ناس أمدوم"
وكمان استعرض تجاربو في مجال زيادة إنتاج الغذاء "دُل"
وأريتو كان وقف علي دي لا
وكمان ايه ؟
وراهم مساهمة الموارد الطبيعية السودانية
في شنو يا متعافي ؟؟
في توفير الغذاء للسودان
وكذلك لدول الجوار
واضاف المتعافي ...
أن الرئيس عمل لقاءات على هامش اعمال القمة
وإلتقى بالرئيس البرازيلي السابق !!
يعني مؤتمر جوع ونلاقي فيهو رئيس سابق ؟؟
حليل أبوي
أها
الحمد لله الرئيس البرازيلي السابق ذاتو ما قصر
وقال حا يعمل بيناتنا شراكة لتحسين إنتاج الغذاء
وهمس في أضان رئيسنا زول سمعو مافي إلا المتعافي
وقال ليـهو إنتو أعملو لينا الدراسات حقت المشارررريع
ونحن "ناس الرئيس البرازيلي السابق"
حا نقدم الدعم "البرازيلي" اللازم لهذه المشارررريع
"أم زمبيري أنضمي وطيري"
والسنة الجاية وعشان الدعم "المترغب"
أدعو معانا
يا الله "هوي" تدي الرئيس البرازيلي السابق "العافية"
ما يقوم ينترم
ويا الله "هوي" تفكنا من المتعافي
قرض الزراعة قريض
الترع نشفت
وريقنا نِفِش
وهو والوفد المرافق لهو يترعو "دليب"
موضوع: دليب "السواد" .. المتعافي كان ما بتعافو الله ما تبخافو ؟؟ 
الثلاثاء 2 يوليو 2013 - 6:39
