البرازيل
قبال كم يوم وفي نـهائي كاس القارات غلبو الأسبان
مش غلب "ساي" ياخي النتيجة كانت تلاتة "لف"
وكنا قاعدين برا الماركانا بعد الكورة ما إنتـهت
منتظرين بصات "والي الريو" تنزلنا جنب الفندق
قلنا نحضر رقيص "السامبا"
تجي فينا مظاهرة زي الشعفوفة
سألنا لينا برازيليين كانو قاعدين ليـهم جمب "ست شاي"
في شنو يا جماعة نعل مافي عوجة؟؟
ما إشتغلوا بينا الشغلة
أها مشينا علي ناس المظاهرة
وسألنا واحد "مطرف" كان شايل ليهو قصبة سكر
"المظاهرة دي حقت منو عليك الله وسببا شنو ؟؟"
قال لينا حقتنا نحن المهشمين وبسبب الكورة !!
قلنا ليـهو الكورة مالا تلاتة شوية ؟؟
قال لا
الحكم "فاشل" ؟؟
قال لا
طيب مالكم ؟؟
قال القروش الصرفتا الحكومة علي الكورة
طيب والقروش مالا "مجنبة" ولا عائدة من بيع مرافق حيوية ؟؟
قال لا نحن كنا أولى بيـها
قلنا ليهو النصيحة لي الله الماركانا دا براو إستثمار
والله زيو في الريو دي جانيرو دي "مافي"
كمان أسعار اللاعبين دي براها تجيب الشي الفلاني
غير الدعاية والناس الجايين من برا "زينا كدي"
وحقوق البث التلفزيوني ياناس ما تحمدو الله
المهم خلانا في محلنا داك ولحق المظاهرة
"جوعتي اللِمة يا ديلما"
"دايرين رغيف يا روسيف"
"العار العار يا نيمار"
والله أنا تأكدت ناس المظاهرة ديل "رشاشات"
فريق يغلب ناس راموس وجيرار بيكي والمشجعين زعلانين ؟؟
واحد من جماعتنا المعاي قال لي ديل "طابور خامس"
واحد تاني قال إمكن مرسالـهم الصهيونية العالمية
والله أبداً ما قصرو
والمفروض يكرمو الفريق
ويشيلو "والية" البرازيل في "ضهرن"
المهم من محلنا داك قررنا نعمل تكريم للفريق دا
كيتاً علي البرازليين المفتريين ديل
وكلفوني برئاسة الجنة التحضيرية والبرامج المصاحبة
ومباراة التكريم نعزم ليـها القطن الكمروني "للقيدومة"
أو ممكن نجيب البن الاثيوبي أو الكهرباء اليوغندي أو حتى الهوا الايراني
والفقرة الرئيسة حا تكون "حدث"
لقاء بين البرازيل
وفريق "الخرطوم الأمن الوطني" كان وافق
أي فريق رئيسو بكفت الحكام ما بنفع معانا
عشان البرازليين والعالم كلو "يعرف حاجة"
وبالمرة نفاوض نيمار وفريد ونرشحهم لفرقنا
وقروشنا كاش وحلال ما زي قروش برشلونة
النصها ملموم بالتجنيب والتوتو كورة
والنص الآخر بالجبايات خارج خط 18
وقدر ما ناس برشلونة يدفعو نحن نزيد
نيمار وفريد كان لقو ناس كلتشي وتيبوسا "محترفننا" ديل
تاني والله نلملم الكاسات ما نفضل كاس
والله الاهلي المصري ذاتو "نصرعو" ويبت في "إطراق"
وإن شاء الله إن شاء الله يكون تكريم يليق ببطل العالم
ننظم الحتات الجنب الاستاد
ونصلح الشوارع ونجير الاستاد
ونضرب أعمدة النور بوهية
الحمد لله المافي شنو ؟؟
نرش نجايل الاستاد بالمبيدات حقت وظارة الزراعة
باقي الوظارة ما لقت ليـها زراعة "ترشـها"
ونعمل لي ناس قصب السكر المستورد من الهند"تشاشات"
ونطلع تصاريح بسعر التكلفة لستات الشاي برا الاستاد
ونستفيد من جاكسون بعد ما حولو منو المواقف
نعملو للركشات برسوم دخول وخروج رمزية
ونمنع دخول التسالي والفول المدمس للاستاد
ونعتبر قصب السكر والعونكوليب داخل الاستاد جريمة يعاقب عليها القانون
نفصل تعريف الجريمة والعقوبة معاً
ونسميها جريمة حيازة أسلحة الدمار الشامل
والعقوبة القتل تعذيباً حتى الموت
نحتفل بفريق البرازيل ونكرمو
كيتاً علي الصهاينة والرشاشات والطابور الخامس البرازيليين
موضوع: تكوين لجنة برئاستي لتكريم الفريق البرازيلي "كيتاً" علي البرازيليين المفترين ديل "فيديو أهداف كاس القارات" 
الأربعاء 3 يوليو 2013 - 7:21
