حكاية ودالشواطين مع الخطوبة - للكاتب سعدالدين ابراهيم

وطرشقت» الخطوبة .

.

لم اندهش حين دعاني ود الشواطين لحفل خطوبته يوم الخميس المقبل.. وقد عرفت أن ناس الحلة أعدوا له حفلاً مهيباً سيحضره شيخ الحلة وسيغني فيه فنان الحلة الكبير «بلبل الغريد».. فرحت من كل قلبي وقلت بعد الخطوبة سيتحول الرجل إلى شخص آخر، أما بعد الزواج والشفع فسينشغل بحياته ويتلهي بيها فلا وقت يفيض لتدبير المقالب.. أو تسليط عينه الشريرة على الناس.
يوم الخميس وأنا أهييء زينتي وأعد مفتخر الثياب حتى أحضر خطوبة ودالشواطين.. الفريدة فإذا بشخص غريب الزي يدخل علي.. سألته في خوف أدعى معه التماسك: إنت مين؟ فضحك وأزاح العمامة الصفراء.. وخلع الجبة الخضراء فإذا به ود الشواطين فذعرت قائلاً: يا زول إنت مش الليلة خطوبتك.. فهز رأسه بالإيجاب.. فقلت: طيب مالك ما مستعد فقال بهدوء وهو ينظر إلى الأرض غيرت رأيي.. فهجت فيه.. إنت بتفتكر ده لعب.. الناس منتظرنك تقول لي غيرت رأيي... يا خوي اكتشفت إنه ده مقلب كبير.. قلت محتداً: والمقلبك منو؟ أشار بأصبعه إلى صدره وقال: براي سويتا في نفسي.. كيف الكلام ده يا ود الشواطين قلت وقد تصببت عرقاً.. قال: أصلوا أنا قلت اتنكر وأغير شكلي وأشوف الناس بيقولوا شنو عني وعن خطيبتي فسمعت العجب.. قلت: أها وسمعت شنو؟ يا زول.. شيخ حسين قال لي شيخ محمدين: تعرف يا دوبو ود الشواطين لقى السم القدر عشاهو.. البت شديدة ولضيضه حتمشيهو مظبوط؟ شيخ محمدين قال لي شيخ حسنين: بعدين الحياة المولعة نار دي بكره يعرس يجيب الشافع الأول والثاني.. ويبقى في الأولاد بسننو.. الأولاد عيانين.. يبقى من المستوصف للإجزخانة.. من الإجزخانة للعيادة.. و الله ما يلقى يحك رأسو؟ قلت دي ما حاجات افتراضية ساكت.. قال: افتراضية.. إنت ما سمعت حاجة نعيمة قالت لي حاجة التومة شنو؟ قالت ليها: تعرفي يا حاجة التومة «ودالشواطين» ح يستعدل البت مدردحه واخوانها العضلاتيه ديل إن اتسمخر بونيه من ده وشلوت من داك يعرف درب الله واحد.. فضحكت وقلت له: ياخي.. فقاطعني: أنت ما شفت حاجة التومة قالت ليها شنو؟ قالت: أبوها ذاتو ما كاتل قبال ده.. ما كتل «الرباطي» أب جنازير.. لكن طلع من الإعدام عشان المحامي طلعو بدافع عن نفسو؟.. حيرتني ياود الشواطين فقال يا خوي أنا تراني خاطب عصابة بعدين حكاية الشفع والعيا والدوا دي ما كنت عامل حسابها!

بعد لأي أقنعته بان يذهب الليلة حتى لا يحرج الخطيبة وأهلها مع الضيوف بعدين ايتخارج حبه حبه.. أصلها هي خطوبة.. القال ليك منو أنا سمعت حاج الضو يقول لي حاج النور: تعرف يا حاج النور انحنه طالما الناس ديل صرفوا جنس الصرف ده.. وناس الحلة فرحوا قدر الفرح ده انحنا طوالي نعقد ليهن ثم صمت وقال لي: يعني المخارجه ح تبقى طلاق وورقة ونفقة.. لا لا.. فاقنعته وذهبنا.. ما أن رأى خطيبته أخذ يصيح: أسد.. أسد.. ويقفز هنا.. ويقفز هناك.. اتلم الناس وبين قول بسم الله وبين عرقه وعيونه الجاحظه حملوه الى المستشفى... حيث احتار الطبيب في الحالة.. وقال لهم سأعطيه مهديء وسوقوه بكرة الى الدكاترة المختصين دي حالة نفسية صعبة.

الحلة كلها ليست لديها سيرة سوى المس الذي أصاب ودالشواطين حيث تهيأت له خطيبته في شكل أسد بعد أيام زاره اشقاء خطيبته وقالوا له استعد لنذهب لـ«فكي» سرو باتع.. فهذا عمل يحتاج إلى فك.. فلاوز وقال ليهم بقيت كويس فساقوه في زفة حيث خطيبته التي فرحت عندما رآها ولم يصيح أسد.. أسد.. قلت: انهزم ودالشواطين وسمعت انهم حددوا له الخميس المقبل لكنه ترجاهم حتى الخميس البعدو لأن لديه استعدادات.

مرت الأيام وأنا في انتظار خطوبة صديقي اللدود ودالشواطين الذي اختفى تماماً في الايام الفائتة الى ان صادفت الصباح خطيبته فسلمت عليها فسلمت ببرود.. فقلت لها: الخطوبة متين.. فانفجرت خطوبة ده واحد حيوان.. ده آخر زول اتزوجو أنا.. داير يشوه سمعتي هدأت من روعها وسألتها ماذا حدث.. فقالت بعد أن أخذت ليها «بكيه» تصور يا أستاذ قال شنو بقى كلما يقعد جنبي يشم فيني روائح كريهة.. ويقصد يسد نخرتو.. ويقح.. وبطنو تطم.. ويتقيأ.. الحكاية دي لما اتكررت وهو داير يحكيها لي اخواني ثبتوا ليك طوالي.. قلت ليهو اسمع ياود الشواطين يا خوي.. ولا تشم فيني ريحة كعبة ولا أشم فيك كل واحد يمشي في طريقو.. هنا قال أحدهم: «السلام عليكم » فبينما ذهبت لعناقه بدأت خطيبته تبحث عن الحجارة وتمطره بها حتى اضطر إلى الهروب والناس في الشارع يضحكون.

سعد الدين ابراهيم ده مبدع وخفيف الظل مثله مثل ود الريح وأنا أقرأ معظم ما يكتبون حينما أجد لذلك سبيلا ( الجرايد بقت غالية ) زي التفاح

» من الرشيد للرشيد حبيب الله التوم نمر..
» حكاية عبد القادر حكاية عجيبة
» مرحباً بالموسيقِى سعدالدين الطيب الماحى
» اداب الخطوبة
» رصيد الذاكرة للكاتب يحي فضل الله