حان وقت الخلاص

هذه القوات المسعورة المتجهه إلي مدني الصمود

لن تخيف الشعب بعد اليوم ولن تحمي نظام إستنفذ

كل أسباب البقاء ....

نتمناها في مدني وفي الحصاحيصا وفي كل مدن السودان

ثورة تزلزل كيان هذا النظام الهالك ...

هووووي يا ناس عايز اسولف معاكم

عشان في ناس كتار عايزين اكتبوا كلامي ده وما قادرين

ما عشان ( خائفين ) فهذا زمانه فات وغنايه مات

بس عشان خائفين المظاهرات دي تطلع مضروبة ذي الفاتن

أنا غايتو طلعت مضروبه أثمرت عن زوال هذا النظام عايز اكتب واكتب واكتب

مدام ظروف الغربة حرمتنا نجدع حجر ضد المتأسلمين قلت افلق بالحروف

شفتو رئيسنا الهمام في المؤتمر الصحفي !!!

والله قال ليكم كلام واضح

ماعايزين حنك بيش

قلتو في فساد جيبو الدليل

ياخي قال ليكم المراجع العام يده مطلوقة لمحاصرة الفساد

يااخوانا البشير ده أمس طلع شفيف شفافية

النصيحة مرة مرة كده بقول كلام منطقي

وتاني اقوم اخرمج خرمجه لأمن هو اتكيف

كدي النسألكم

مولانا علي وين

إجي نافع واغيب علي عثمان

لشنو كده

الحاصل شنو

صحي الإشاعة الطالعة دي

الاعكتاف

الرئيس كان معتكف

وأبوعلوة معتكف

نافع المو نافع ده متين بعتكف

والله ورمتو قلب الشعب السوداني ووديتوه الحضيض

مشكلتنا ده كله بإسم الأسلام

والله كان جيتو بإي حاجة تانية كان البطن باردة

الزيادات دي صدقوني لن يصبر عليها الشعب أكثر من شهرين

مع أنه البشير قال الناس بتصرف

بلغة تانية بتسرق

مسعولين من الخير

مدام البوست ده اشاد بشفافية الرئيس

بيت الشيخ مصطفي الأمين الإشتراهُ منو ؟؟؟؟

والله يا أخوانا زعلان زعل

يا خي دائر اطق عديل كده

اسوي شنو

مهما حصل نحن زعلانين عشان بلدنا

بالله نحن شباب نقضي نص عمرنا في غربة

عشان بلدنا ماسكنها حرامية بنهبوا فيها

والله يا اخوانا في ناس كايسين الحرام ده ذاتو

وما مدنهم فيه فرصة

ده ما الفهم الجديد للتمكين

الحركة الإسلامية عنوان جميل تم تشويها بممارسات

تعبر عن الطمع والجشع والعين الما مليانة

مشكلتهم يكابرون

لا يعتذرون

ولا يعترفون

والفرمالة البديل منو ؟

صعبة جدآ أقولوا للشعب السوداني نحن فشلنا

زراعة ماكو

صناعة ماكو

أخلاق برضو ماكو

غايتو الأستفدنا بيه من الإنقاذ

حفظونا الشعارات هي لله هي لله

نأكل مما نزرع ونلبس مما نصنع

والحمدالله اكلنا ولبسنا

كيف ياخي

أنتو ما جايبين خبر

أنقذونا وشربونا ارزونا

وكمان في شفافية ( شفتو كيف )

مسعولين من الخير

العلاقة شنو بين حوش بانقا وكافوري ؟؟

والله ازهري عبر عن حال الكثيرين

جرح الوطن ختالنا خط
مامنو نط
وحميد ختالنا خط مامنو نط
الليلي ياموت يا حيا
خاتي البختار الوسط خاتي البختار الوسط

يافطون
فطن حميد فطمنا غنانا
لاطاطينا لاسبنا الخيول تاطانا
قدمناه امام لاضلا لا ضلانا
ماهاب السجون مافزه من سيطانا
وكت الكور حما ثابت ركز لبطانا
لكن البلاد باعت ايادى بطانا
عالجه بالرحيل مدت وراه لسانا
جربه بالعويل قلبت حديثه رطانا
حنسه بالهديل رخت الحبيبه اضانا
ذى كل الطيور دايما تحن لوطانا
ماضاق الوطن بس كبرت الزنزانا

ويادى البلاد الكل ماطايبتها
فتحت على جرحك جرح
الكل مانقطلها الكلمات عسل
نزلت على خاطرك ملح
لاتاكت ابوابها الانيقه ورحبت
لاليله بجيتك فرح
يادى البلاد
وين نحن هسى فى ياتو ليل
فى يات صباح
كل الشوارع تشتبه فيك
وتشابه بعضها
كل البيوت الواقفه طولها
تستبيح فى عرضها
وانا روحى تشتاق لبلاد
كان طينى من طين ارضها
ديك البلاد اللابتفوت فيك وكت
لايوم بتترك فرضها
يوماتى واصله بالحنين
يوماتى هى الفى النوم
تجيلك برضها

اشتقت ليها الشوق غلب
اشتقته انزع همى
فى عتبات بيوتها الواسعه
وانزع فى ضل عصاريها التعب

نزعت مدني فتيلة الثورة
وقادت كل المدن الحره ,,
ويا خرطوم اكسري قيدك
اسندي مدني واديها ايدك
مدني الحره تعيد الكره
وثوره بطعم الحنظل مره

حسب موقع الراكوبة

ارتفع عدد الشهداء الذين استشهدوا برصاص الشرطة في المظاهرات التي اندلعت صباح ومساء الاثنين 23 سبتمبر الجاري الى 13 شهيد من بينهم 4 أطفال وأمراة واحدة في منطقة عووضة والدباغة وحي التلفزيون ومايو .. والاسماء التي وردت إلينا هي :
1- مازن محمد احمد سيد أحمد -23 سنة-طالب- من حي الدباغة .
2- ابراهيم محمد علي-الدباغة
3-الطيب عبد الودود- الدباغة
4- منى عبد الرحمن سليمان - حي التلفزيون
5- هاجر عبد العليم (طفل) - الدباغة
6- منير أحمد (طفل)
7- فرح ايمن محمد (طفل)
8- عاصم هشام
9- مجتبى حسن
10- يوسف انور
11- أمل منذر أو النزير
12- أحمد عرابي - عووضة

قالوا عن مظاهرات مدني

مدني مهد الحركة الوطنية ومولد مؤتمر الخريجين
التاريخ يعيد نفسه
التغيير يأتي من خاصرة الوطن، مدني الإبداع والفن، مدني الوطنية
الثورة انطلقت شعارات ترددها القلوب وتعلو بها الحناجر
اقبضوا على المندسين من المؤتمرجية الذين يعتدون على أملاك المواطنين وأقصوهم من صفوفكم

قولوا أمين

طرق ضراعك يا ولد
غرق صراعك تلقى حد
للافه و الحال المو هو
ضد العوارض كون جلد
ظل مركب الطوفان ونوح
بحر الفجايع عدو عد
يا إبن الغلابة المتعبين
شقيش تروح يا ها البلد
سي يا ولد
أحد أحد
حتى الطراوة أو اللحد

اخوي ود المنصوري = البشير قال رفعوا الدعم من المحروقات من اجل الفقراء وصغار العمال يعني قال المستفيد الاول من العائد الفقراء واصغار العمال والفلوس حا توزع عليهم يعني دي نفهمها كيف وطيب رفعوا الدعم ليه اذا ماكانت الحكومة مستفيدة منه
والبشير قال الاثرياء العندهم سيارات كثيرة هم المستفيدين من الدعم
يعني نفهم ناس جمال الوالي واسامة داؤود ووداد زوجة الرئيس هم قائدين المظاهرات عشان الرئيس قاصدهم
كل الشعب السودان ماعدا القاصدهم البشير ديل اذا استمر هذا النظام ح ياكلوا نيم ح ياكلوا نيم
الشعب السوداني الابي انطلقت ثورة المظاليم و توشحوا بشرف المقاومة قاوموا تجار الدين اكلي قوت الشعب الذين اعتدوا علي املاككم ساحاتكم وميادينكم
الله اكبر الله اكبر والعزة للسودان ارض المليون ميل كاملة غير منقوصة

الأخوان رحمة , كمال , لكم التحية

والله ما في سبب وأحد يجعل الشعب يصبر علي هولاء المجرمين

الحال يغني عن المبرر , والفشل والإحباط سبب كافي لزوال النظام

أم درمان تشتعل ومدني ما زالت تقبض علي جمر النضال - ساوفيكم

بالأخبار ....

من كل حتة يجوك .. يوم التسود يوما ..
ناسات حكومة الجن .. وناس جنها الحيكومة ..
ما طالا الشوارع في .. في ولاد بعرفوا القوما ..
ولاد راقدين .. وأولاد اسمها المايقوما ..
ديل أولاد شريعة قوش .. المستضعفين في الأرض ..
يبنوا ويهدوا عروش ..
لا بتخون البعض لابتشتريها قروش ..
في كل حته وراك تمرق تلاقي جيوش ..
أصدق لسان الحال من نضمك المهبوش ..
نفس الولاد جايين من طينة حضارة كوش ..
حافظين شعر حميد ..
فاهمين قصايد الدوش ..
ما تمشي يا محجوب دايرين نظبط بوش ..
يا داب عرفنا الصاح ..
دخل الكلام الحوش .

كثير من الفيديوهات التي نشرها النشطاء من مواقع المظاهرات

يتعقبها أتباع النظام وما يسمي بالجيش الإلكتروني للكيزان

بالتشويس ... كل هذا لن ينجيهم إن شاءالله من غضبة هذا الشعب .

شعر عبدالمنعم الجزولى
شاذَّة وشاذ
طلعو الشارع
يهتفوا.. يهتفوا
ضد الجوع
وبشاعة نافع
ولحس الكوع
وصفاقة القال ديل شحادين
تجار الموت
تجار الدين
من على عثمان
لى عوض الجاز
شاذَّة وشاذ

شذوذ رأسيا… ممكن
شذوذ أفقيا.. جايز
شذوذ وتريا.. برضو
بس مافيهم شاذ دينيا
أو وطنيا
ديل اولادنا
وديلَ بناتنا
حلاتُم مرقو الشارع جملة
بيوت اشباح تفَضِّى وتملا
حياة الناس مليانة مآسى
وحاكم مجرم وفاسق وقاسى
وجوع ومذلة ويختِ رئاسى
عصابة وشايلة الدين عكاز
شاذة وشاذ

شباب كالوردِ
وجوهر فردِ
قالو مرقنا
ضد القسَّم بيتنا.. فرقنا
ضد السرقوا تعبنا.. عَرَقنا
بيهتفوا ضد الظلم الكاين
ويهتفوا ضد اللص الباين
ويهتفوا ضد الكوز الخاين
ويهتقوا ضد المسغبة
أو مايُعرف بالإنقاذ
شاذة وشاذ

تعتيم اعلامي كبير علي المظاهرات

معظم المدن الكبري تخرج سنار , الأبيض , عطبرة , مدني , امدرمان , بحري , الكاملين

القضارف , ماذا ينتظر أهل الحصاحيصا ؟؟؟؟

إغتنموا الفرصة لإزالة هذا الكابوس أو دعونا ننتظر ربع قرن أخر

أم درمان اليوم

طلع اطلع شأن حريتك شأن أولادك شأن ذريتك اطلع أثبت سودانييتك وانك راجل وليك قضيتك اطلع اطلع بطل خوف عاوزين حريه ليها نشوف والكوز كان جاك اديهو كفوف شأن تفضل لاعب بي المكشوف اطلع اطلع ضد الكيزان ماتبقي بترجف زي النسوان ديل نهبو قروشك باعوالسودان ديل بسرقو فيك بي اسم الرحمن اطلع اطلع يللا الشارع نطلع نهتف ضد الصايع اطلع اطلع ما تبقي جبان اطلع اهتف في كل مكان يسقط يسقط حكم الكيزان يسقط يسقط حكم الاخوان يسقط يسقط سارق الأقطان يسقط يسقط بايع السودان يسقط يسقط نافع وعثمان يسقط يسقط جالد النسوان يسقط يسقط حكم الكيزاناطلع وقول لا للغلاء لا للفساد
هذه واحد من هتفات المتظاهرين
اطلع اطلع شان حريتك
اطلع شان اولادك شان زريتك
اطلع اثبت سودانتك

أنباء تفيد

بعزل قائد منطقه الجزيره العسكريه فى مدينة مدنى لرفضه تسليم العربات العسكريه

للاجهزه الامنيه لقمع المظاهرات وتعين اللواء ياسر العطا بديلا عنه

» الخلاص الوطنى
» الخلاص في فصل الدين عن السياسة