ولاية الجزيرة وطنت "رواية الدُوري" .. وولاية الخرطوم وطنت "الأمريكان ميوزيك" هيب هوب وبرودوي "صـور + فيديو"

في الجزيرة نوزع  قفاطين  ونوطن "رواية الدُوري "
والولاية تكفلت بالنفقات زي الماحاصل شيء
أصلنا متعودين من زمان علي توطين الحاجات
البعوض وطناهو البي فيفتي تو ما تجيب فيهو خبر
نمل السكر وطناهو وكِبِر بقى "السكرجاز" خلو اللشتغل
التماسيح الجاية من برا ..الحواتة ليكم الله ..
روضناها وبقت "التماسيح المحليات الضاربة الليات "
والليات تعني في لغة اللغف "نص الستة"
المهم  
((.......... الجمعة والسبت، بعاصمة ولاية الجزيرة، بتشريف نائب الرئيس ورعاية والي الجزيرة، وبمشاركة كل ولايات السودان وبتمثيل مقدر لبعض الدول العربية والإسلامية عبر مناديبها، تم عقد المؤتمر العالمي الأول لتوطين قراءة القرآن الكريم برواية الإمام الدُوري..وناقش المؤتمر ( 14 ورقة ) على مدار ثلاث جلسات، وتهدف كل هذه الأوراق إلى توطين (رواية الدُوري)..وبلغت ميزانية المؤتمر مبلغاً قدره ( 500 الف جنيه)، وإلتزمت حكومة الجزيرة بسدادها، ثم إلتزمت بميزانية تنفيذ توصيات المؤتمر..وختم المؤتمر فعالياته بتوصيات منها العمل على توطين الرواية الدوري في البلاد، وأن يكون هناك مؤتمراً كل عامين، ثم تم إختيار السودان كدولة مقر لمؤتمر "توطين رواية الدوري......)) الطاهر ساتي

أما في الخرطوم فالدوري وطنوهو من زمان !!
ومشوا خطوات لي قدام في العلومة ولولوة الكرعين
رقيص صعب جدا جدا خاصة لينا نحن المارشيقين ديل
هيب هوب وبريك دانس وسلو ميوزك  
ياحليل زمن النبق النبق النبق
زمن الحتحيت والقطر الشالك إنت إتقصقص حتة حتة  
إتقصقص حتة حتة  وتسلم ليا إنت
دا كلو إنتهى ما بتعرف جمباز تاكل أمباز
الرقيص بقى تدردق زي الدبيب
والغنا ذاتو "راب" وروبو فات لبنو
إنتو جيتو
ونحن جينا
لو انتو غبتو
"اليدين أها أها أها "
الجكس بزعل خالص
ويقوم يركب عجلتو
عجلتو رالي
وأبوهو والي
يسافر فسحة جزر الكناري
ويلا جينا
وإنتو جوطو و"اليدين أها أها أها "

ولمن تسال يقولو ليك دي مااااااا العلومة
الغنا بقى عابر لغات
قافية من الفلبين وأوزان من الاكوادور وجزر البهاما
وصبرة من جنوب افريقيا زي ماقال القدال  
المهم دا تنويه على صفحة السفارة الامريكية "عندنا" في الفيسبوك

Don't miss the biggest concert in Khartoum
on Saturday November 23
at the Friendship Hall  
Southern entrance
from 6 pm to 10   






والترجمة تابعة
لاتفوتو اضخم عرض موسيقي  مسرحي امريكي-سوداني
يوم السبت ٢٣ نوفمبر الساعه السادسة مساء قاعة الصداقة
المدخل الجنوبي - والدخول مجانا - قاعة الصداقة.