الحصاحيصا تتفوق على مدنى وكل محليات الجزيرة

ترددت كثيرا فى أن أكتب فى هذا الموضوع ولكن بعد مشاورة بعض الأخوة فى المنتدى وخارجه رأينا أن هذه القضية من الأهمية بمكان ولا بد من المعالجة الفورية.
فقد تحدث مصدر مسؤل وتحديدا فى مسجد الإمتداد أوضح المتحدث أنه وبسؤاله لمدير ملجأ مدنى أوضح له الأخير أن الحصاحيصا هى الأولى بين محليات الجزيرة التى تصدر للملجأ أبناء السفاح وهذا الكلام كان بمكبرات الصوت بالمسجد.
ومن ناحية أخرى نجد أن قسم شرطة الحصاحيصا لا يخلو شهريا من إستقبال جريمة القتل مما جعلنا خلف دار فور والخرطوم مباشرة فى القتل.
وفى إحصائية لخلوة ود الفادنى أوضحت بأنها خرجت ألف من طلبة المدارس فى الإجازة الصيفية الماضية ليس من بينهم طالب واحد من الحصاحيصا وهذا الحديث لإمام مسجد موقف طابت بالسوق فى خطبة الجمعة.
ومعروف أن الحصاحيصا تخلو تماما من أى معهد أو جامعة أو كلية لها صلة بالقرآن الكريم وقد تم فتح كلية القرآن الكريم لمدة عام واحد وأغلقت بينما نجحت هذه الكلية فى رفاعة نجاحا باهرا.
نجد أن بالحصاحيصا رجال مميزين على مستوى الدولة والقنوات الفضائية والصحف. سياسيين وأدباء وفنانين وصحفيين ورياضيين وإداريين ولكن ليس فى الحصاحيصا عالم مميز أو مفتى أوعضو فى مجلس الإفتاء أو محاضر على مستوى التلفاز فى مجال الدين فهل من مغيث؟؟؟؟؟؟؟؟؟؟

والله ياخضر انا زعلانه شديد من السمعتو دا ماكنت دايره اسمع عن احلي بلد في العالم عندي الاخبار السيئه دي لكن تفتكر الحل شنو نحن نمسك مشكله مشكله اولا نبدا بمشكله الخلوه عشان الجيل الجاي اتربي تربيه دينيه وبكده نكون ضمنا المستقبل
ونبدا نحل في المشاكل الحاليه برضو من تحت الهيه بالنسبه لموضوع الملجا نبد التوعيه بالمدارس بتاعات البنات وكده نكون ضمنا بنات المستقبل القريب
اما بالنسبه لجرايم القتل دي انا شخصيا ماعارفه حلها شنو لان ديل ناس كبار لا توعيهه بتنفع معاهم لاخلاوي بس نخلي ناس ود عيسي اشدو حيلهم شويه
صدقني ياخضر انت بتتخيل كلامي ده ماممطن اتنفذ لكن ابد المنتدا ده اتعمل عشان الحصاحيصا واهل الحصاحيصا والنهوض بالحصاحيصا الحصاحيا هي كلها كم بيت ماقادرين نحسنا ربنا بسالنا من ترابه اللعبنا بيه ده ومن مدارسها القرتنا وعلمتنا ومن بحرها الشربنا
وسير ياخضر ونحن معاك احكي ونحن نعمل جمعيه عديل عشان نحل بيها مشاكل الحصاحيصا والا ابقى المنتدا ده لعب وضحك وضياع زمن ومافيه فايده
وتسلم
ودمتي ياحصاحيصا