بعدين تعالو هنا
هو ذاتو وينو الجمهور البدينكن ؟؟
الجمهور ما مات والحيين دخلن الكبر
والحاسي بالعافية فات
وينو الجمهور البدينكن ؟؟
على قول عمتن لينا
ولدا رسل ليـها تلاتة فتايل كبار ماليات الكيس
مع واحد عائد في إجازة "مغترب"
عمتنا من شافت الكيس "منفوخ"
قالت كدي "نفخت جضوما"
رسلت للببسي والبسكويت "طلِق من الدكان"
ويا رباً يفوت الراجل تفتح الكيس
وفتحتا ليهو لقتو "شامبو" لغسيل الشعر
طفرت منـها دمعة "شالقة"
ونادت ولدا التاني
وقالت ليهو تعال أكتب لي جواب لأخوك دا
جابو الورقة من نص كراس
وإستعدل الولد عشان يكتب وهو يعاين في أمو
عشان تمليهو
فقالت ليهو أكتب قول ليهو قالت ليك أمك
"هو وينو آآعشاي الشعر البغسلو بالشامبو ؟؟"
موضوع: "هو وينو آآعشاي الجمهور الدايرو يدينك؟؟ " 
الإثنين 23 ديسمبر 2013 - 9:13
