غندور المسكين ذي عروس المغترب موصية ومحرشة
02-18-2014 06:43 AM
البت البعرسها المغترب بتتعب من الحريش والوصايا . لاتستمتع بي حياتا ولا تريح راجلا . غندور ده جا يدلك الدرب علي قول حبوبتنا مدينة ام جدودنا . ما حيعمل حاجة . ولا هو جاي عشان يعمل حاجة . هو نافع الاشطر منو واقوي منو واشد حقدا وسواد قلب وكره للبشرية ، ما طربقوا ليه اتفاقيته علي دنقوسو . خلوه يتلفت ذي الزول الورقو زايد . وفي الآخر قالوا ليه ادينا عرض اكتافك .
وغازي ختوه في الرف عشان بياكل بي ايده الشمال ؟؟ ما عشان طلع من وصايا ام العروس وخالاتا . قالو الصراع بعرفو الزول القاعد . والزول القاعد بيدي نصايح . حنكل ليه . امسكه من نصو سردب ضهرك . لكن لم القاعد ينزل الصراع الفصاحة كلها بتروح . الزول البيفاوض بيواجه بحقائق ومنطق حتي لو كان حجر حيتأثر وحيتراجع امام الحق .
لمن علي عثمان احس بأنه قد دني قطوفها . اتحزم واتلزم وطلع غازي من اللين علشان يدخل التاريخ ويمكن ياخد جائزة نوبل للسلام . وبعد ما ظهر انو نيفاشا كانت سنما غشاشة . بدا الناس في البحث عن كبش فداء . مين البصم ومين الوقع وضحك مع جون قرنق ؟؟. وجاء جون قرنق الخرطوم وطلعت اكبر مسيرة في تاريخ السودان . مين المسعول ؟؟ علي عثمان . وما نفعت حنكة ولا دهاء ولا التظاهر بالطهر والتجرد والفقر والذهد . كله ما نفع التنظيم العالمي للاخوان عاوز دم . فلا يسلم اللؤم الاخواني حتي يراق امامه الدم . اي دم ، مش مهم دم غندور ولا عصفور . فيا غندور بل راسك حيزينوك حيزينوك .
عروس المغترب بيملوا راسها بي اوعك وحزارك ثم حزارك ، تقعدي تضحكي للراجل وتوافقيه في كلامه . وكان زعل ما ترضيه . هو البحنسك وهو البرضيك . وانت ابدا يا ست ابوك ما غلطانة . والراجل ده ما جابك من الشارع . وبيت ابوك فاتح خيلانك بيسدوا عين الشمس . واعمامك فرسان . وتحمدي الله من صغيرة الناس بيخطبوا فيك , وشنو الناقص في بيت ابوك ؟ . وما تخليه يسمع كلام امو . واوعي تخلي امو تجيكم . ما عندها بناتا ما تمشي ليهم ، تجيك انتي هاملة . القروش تمسكيها انتي دي . في راجل بيخلوا ليه الفلوس ؟ شن عرف الرجال بي مسك الفلوس ؟. واخوك تعملي ليه اذن عمل يجي يشتغل معاكم عشان نصلح البيت . وبت خالتك شوفي ليها عريس يكون غنيان , ياريت تكون امو ميته وزول الله . دي وصايا الانقاذ لي غندور . لكن يا غندور ما كل الطير بيتأكل لحموا . في مغترب بيرجع البت لي بيت ابوها .
الظاهر غندور وصوه يشتري وقت لحد ما يفتحو سباليق الاستثمار والقروض الربوية . وربنا يفتن المعارضة والفقرا تبرك وتعمل ليهم معجزة ذي موتة جون قرنق وتحلهم ، ذي خضوع حزب الامة ومشاركة الميرغني . ومين عارف الجنوب يحرق ويحتاجوا لي ملاليم ويقبلوا مرور البترول بي 80 دولار للبرميل .
بس يا غندور امشي وما تدي اي حاجة والعبره في القدامك غازي نافع وعلي . فتح عينك ذي الريال ابعشرين . شفت قوش عملوه صبي سمكري بس يسخن القلفونية ويلم القصاصة . بعد ماكان فاكر نفسوا سيد الجلد والراس . وفكر في انو بيت الانقاذ لازم يتزبل قبل المطر . والعيد بقي يجي في الخريف يعني زبالة وجير من الداخل . وكلم احمد عمر وكلم عمر ابراهيم وكلم ابراهيم غندور وكلم غندور القط وما فهم القط الكلام . وزعل ياسر عرمان وترك البكان . وخاف غندور من الامريكان لكن التنظيم العالمي حردان . الدود فوق العود . هل الوطواط يطير ؟ هذه اسئلة كتاب المطالعة في الاولية . يمكن تساعد . عروس المغترب موصية ومحرشة . وبت خالتها عاوزة عريس هين ولين وامه ميتة واخواتو صغار.
ولكن الناس العاقلة عرفت من الحصل لي كل زول اتفق مع الانقاذ من الشيوعي سبدرات وريك مشار ومناوي والصادق والميرغني كلهم طلعوا بي قد القفة . والسعيد البشوف في غيرو والشقي بيشوف في روحو .
وكمان اخيرا ظهر الغول وكيل ابليس في الارض ، الترابي . وده فام بعاتي مش محرش بس ، ده حاقد عديل . حيرقد للناس شعرة جلدا لكن البكجموا الا حمار الوادي يهنق . وان كان البشير ما نسي وصية جعفر نميري لمن رجع السودان . تفك الترابي حتلقي نفسك ذي حالتي دي ما عندك شغلة غير تمشي لي بيوت البكيات علشان تقابل الناس .
في النهاية الانقاذ كالعادة حتعمل بي سياسة ضربني بكي وسبقني اشتكي .وحتشغل اعلامها وكنكوجا الما بتعب ولا
بينقرش . وتحلف بكل مقدس بأنها كانت جاية بي نية صافية بس التانين كالعادة نيتهم ما سليمة . و حتقول علي كل حال الانتخابات بيناتنا وانحنا اصلوا بنموت في الديمقراطية , والماتو في سبتمبر قتلتهم الفئة الباغية لانها خدعتهم واخرجتهم ضد اولي الامر .
ع . س . شوقي
موضوع: غندور المسكين ذي عروس المغترب موصية ومحرشة 
الثلاثاء 18 فبراير 2014 - 9:06
