كيف يكون الحال لو إنتبه السعوديون للبنوك "الاسلاربوية" وهيئات الفتاوى التي لا يدخلها إلا "كبار العلماء" ؟؟

واحد عندنا في السودان على سبيل المثال لا الحصر
نحاول نجمع طريقة عمله واصوله المليارية وأرباحه المتضخمة
واسماء "كبار" العلماء الذين يدبجون الفتاوى "عمال على بطال" لإدارة البنك
وتفتح خشمك تتنزل عليك آيات التكفير وأحاديث الضلالة لمن راسك يلف
شغالين بالبلف الفاتح في قلب المال أبواب فوق "طاقات" الجيوب المتخمة
ويمرقوا من مجالس الإفتاء في شئون البنوك والمخصصات مفتوحة بإطلاق الفتوى
ومن هناك إلى رئاسة الجمهورية ومجلس الوزراء وماشة معاهم "ساكوبيس"
وهم "ذاتن" أعضاء دائمين في كشوفات الحج والعمرة على حساب منو ما معروف
ولو طلعنا بحقوق الأوقاف الإتباعت ما بنكون "فاقدين" كتير "خالص"
وأتمنى أن تتسارع خطى "الكشة" والاسماء موجودة والدين في البطون والمصدر معروف
غايتو حا تكون أكبر "كشة" في تاريخ اللغف "المتشرعن" زوراً بقيم الدين

وحكمة رب العالمين مع انهم علماء كُبار إلا انهم ما بحبو يختلفوا مع إدارة البنك
والعجب مع الحكومة أربعة أو خمسة وعشرين سنة ماشة زي السكة حديد عشرة على عُشرة
وزي ما قالوا "البلف" كتال
يموت الناس في دارفور وكردفان والنيل الازرق ولا بواكي في ظل "الباكو" البقلل "النقاش"
المهم الحكومة تمام وكلو من الكفار والملحدين واتباع الصهيونية والماسونية وشنو ما عارف
والبنك شرعي وليس في عملياته أي شبهة "رِبا"
"رِبا" أعوذ بالله
والمخصصات ماشة زي الصلاة على النبي
هي لكن مخصصات نصاح ؟؟
هيئات "شرعية"
وجماعات "نصرة"
ولافتات تأييد مكتوبة في الجلاليب

وسيد الشي ذاتو "المؤسس" وبي عضمة لسانو قال "لو ما تعاملنا بالربا حا نتقوقع .........."
طوالي الفتوى جاهزة "ملغوفة" بي دلقان أبيض
تتقوقع إنت لي شنو ؟؟
"طال عمرك نتقوقع نحن وإن شاء الله نتفرطق " ما إنت المهم ولازم تنتشر
المافي شنو ؟؟

عملتوها ظااااااهرة

» تخيل كيف يكون الحال لو ما كنت سوداني
» تخيل كيف يكون الحال لو ماكنت سودانى
» تصور كيف يكون الحال لو ماكنت سوداني
» "الفتاوى الظنيّة"
» كلام نسوان كبار !!