دور بينا البلد داك احرق الجازولين يا البابور جاز

[دور بينا البلد داك احرق الجازولين يا البابور جاز

نمسكها واحده واحده ..دور بينا مثلا..منتشرة حالة دوران يعنى الواحد عندو موضوع زنقوهو فيهو.. مسئول (مثلا) قلت مثلا ..لو عايز يطشش موضوع تلقاهو يلف ويدور ويخرم من الموضوع وليت ويعجن ..اما تزهج وتتخارج من حالة المطمطة.. او تواصل تطش زى الطيارة الماليزية..ومن شدة الدوار اصابنا ودار ..يعنى مودرين .

البلد داك ..يعنى الفى مخيخك وودورو ليك وخلاك من الصباح للعشية مدور ..لستر بس ..ساكى اللقمة والمعيشة وامور الاولاد والولية لحدى ما يطقشك سكرى او ضغط او الاثنين معا او شلل ارتعاشى تدخل ايدك فى جيبك الفوق مافى قروش ..جيب الجنب مافى..جيب الخلف مافى..والعجيب انك تفتش فى جيوبك وانت عارف سلفا ما فيها التكتح.

احرق ..دى حكاية كبيرة مع موضة البحرقو نفسهم وقوموا ثورات ..او البحرقو البخور لزوم ترقية وترضية..او البحرقوا البخور لزوم طرد الجن الكلكى الخرم نافوخهم من الشلهته ..وبرضك فى مسئولين او مدعين المسئولية وورقهم محروق عند المواطنين ومصر يواصل لعب ..حتى لو يعرج بى كرت..وفى نوعية مسلطة تحرق ليك ورقك بعد ما تتعب فيهو وتشقى ..يعنى ينشلو منك وظيفة تستاهلها بى عرق جبينك ..وفى كمان ورق فساد هردبلى بتحرق بسبب ماس كهربائى مثلا او حريق مجهول المصدر ..

الجازولين ..حكايتو عجيبة يعنى وقت ما عندنا غير قزازة نميرى العرضها فى التلفزيون قبل عيييييق من الزمان بمناسبة اول قزازة الدولار كان بى جنيه وبعد جاز الجن ده مرق الدولار بى 8 جنيه هسى ابو صفر ممسوح..يعنى الجازولين او البزين ده يمرق يدخل تشمو قدحة والغلاء زايد ..وكل يوم بير بترول والغلاء زايد..والدهب مرق والغلاء زايد..والنهضة الزراعية والمستثمرين متكبين والغلاءء زايد..الله يرحم والدينكم خلو اى حاجة يا مسئولين وما تبشرونا بأى مشروع او بير بترول تخلينا نتخلع ونهضرب ويزداد الفقر فقرا ...خلو اى حاجة فى واطة الله دى عشان بسذاجة شديدة الحاجات ما تغلا وتغلى الشعب ده.

البابور..حليلو ..اولا ما فيهو جمرة خبثة ولا فاتورة موية معاهو ومافى موية..تولع بابورك ياعمك وتخت ملاح امبارح البايت مع كسرة بايت مشوعفة وناشفة تاكل ومعاك الحلة كلها..