تحليل ... تجنيب .. تكبير " الله أكبر وللوالي الحمد"

ماهو عارف قدومو أبلغالغ
يا "مستف" مخاليك بـ"الحرام"
"والله ماعارف"
بالله ؟؟
كلامك دا تقولو لي زول ما عندو "ولاية"
ستمائة مليار وماعارف ؟؟
خلاس صدقناك ما عارف
وحا تعرف كيف ؟؟
كلو من أولاد "الحلال" المالي بيهن مكتبك ديل
والحمد لله أولاد "الحرام" بعيدين ومبعدين للصالح العام
إتحرفنو وإتحرفنوا وإتحرفنوا
وإتحرفنوا لمن بقت ستة ميات مليار ؟؟
أنا متأكد إنـها لو زادت من كدة كنت عرفت
وما عارف دي مبلوعة
لكن "سعادتك"
وبيني وبينك ما غارف دي إلا تبلعا إنت براك
عاد كيفن ؟؟
ناس متدينين ومتوضئين يخموا جنس الخم دا وما يقسمو ؟؟
كلام زي دا أصلو ما معقول
كدي شوفن إمكن قسموا للولد شريك أولاد ناس هناي
خلي المحللين يسألوهو
عشان تبري ذمتك وتحلف "صادق" بإنك ما غارف
ولاك طالبني حليفة
أنا قلت للجماعة الوالي كان غارف كان إغترف
من يومو "شُجاع"
وعينو قوية
ووشو مغسل بمرقة "ماجي"
بعدين ما دام في تحليل كان تغترف ساي
وتطلع الساحة الخضراء
وتجيب المكرفونات الماخمج
وتحشد شفع المدارس وتلغف والناس تـهتف وراك
تـهليل
تحليل
تكبير " الله أكبر وللوالي الحمد"

ستماية مليار ؟؟
دا غير الملايين التحت تحت
غايتو يا "سعادتك" والله لو ماغارف معاهن تبقى قصة
إتنين يعني كل واحد تلاتماية مليار
غايتو رقعتهن جنس رقعة
تكبير " الله أكبر وللوالي الحمد"

سعادتك الحرامية الإتحلحلو ديل بشتغلوا تاني ولا بتزفوهن الشارع ؟؟
عليك الرسول الكنت بتبكي في شباكو كان ما وريتنا مواعيد التقديم للشاغر
وظيفة زي دي أسي مسي في برشلونة بلقى قدر حقـها ؟؟

الحملة القومية لمناصرة والي الجزيرة لإخضاعه للتحليل
اسوة بموظفي مكتب والي الخرطوم

أيوة لفح لي لفح ما فيهو فوت
في الخرطوم يلفح الوالي قالوا ديل الموظفين
قلنا ما مشكلة ستماية مليار الله بعوض
في الجزيرة "نلفح قطنا"
يلفخ "مجهول" يختوها في الوالي ؟؟
ليه يعني الوالي ما عندو موظفين في مكتبو ؟؟
ما تتكلم هويااااا البـهيمة دا !!
ما تقول ليـهم ديل موظفين إتنين أو تلاتة
ويحللوهن ليك ويمشو أهلن "غانمين سالمين"
ناس يحللوهن وناس "يصيعوهن" ؟؟
كمان التحليل فيهو شمار وفقوس ؟؟
طيب لمن دايرين تعدلوا "من التعدل"
ما كان تحللوا الوالي بدل تصيعوهو
موظف الخرطوم تحللوا
ووالي الجزيرة تصيعوا ؟؟
أسي دي ما التفرقة ذاتا
حبيبتي ذاتا
اللحظة هابرا
في "حِماها"
وفي ضراها
نتقاسم "الهبرات" معاها
ومن هنا ورايح ..
لن نسمح بأن يلحق الوالي بـ"المشروعين"
زمان كان مشروع الجزيرة
وجا عليـهو المشروع الحضاري
وكمان داير تلحقوهن الوالي "المنتخب"
إنتخبناهو بـ"الخج" وتشيلوهو بـ"الخج" !!؟؟
إنتو قايلين جدنا جيمي كارتر "مات"
صحي عمرو قارب للمية لكن بفرز
لذلك نـهيب
"رايكن شنو في نـهيب دي بالله مش نـهيبة" ؟؟
نكون لجنة لمناصرة الوالي المسكين دا
مع إنو مثل بـ"الجزيرة"
لكن ما حقو نعالج الغلط بالسلبية
وكلنا عشم في أن يدعمنا المعتمدين
خاصة بتاعين الجزيرة المغندلين ديل
بدل يشاتروا ويشتروا "الأصوات الرياضية"
مش أحسن يخشوا معانا اللجنة دي ؟؟
وإن ما وقفوا معانا فباكر فيـها المناكر
والله كان الواحد قطعوا حتة حتة ما نقول ليهن "حللوا"
من أسي الشعارات المؤيدة كالتالي
"التحليل التحليل"
"ضد الشيل ودفن الليل ..أبكراعن برا "

مرافعة واحد حرامي

الدنيا مالها قايمة وقاعدة أصلو سرقنا البنك الدولي ولا خزنة بيل غيتس !! ما كلها 18 مليون جنيه جديد يعني 18 مليار قديم ما تساوي 2 مليون دولار بسعر السوق الأسود !! بالله شوف الجرايد تكتب والمواقع تنقل ، والمعارضة تتهم ود كلو عشان شوية فلوس كان الواحد محتاج ليها ، بس الناس ما بتقدر الظروف . قالوا علي حرامي ، طيب ليه ما شافوا الحرامية الكبار اللي أكلوا طريق الإنقاذ الغربي وباعوا خط هيثرو ، دي مليارات دولارات ومافي زول ( شال حس) زول، ولا قالوا ثراء حرام ، إشمعني أنا بالذات !!!

وبعدين شنو يعني 2 مليون دولار، ما نثرية ميشيل أوباما في الشهر تفوت 3 مليون دولار، وملكة بريطانيا في البنك عندها مليار استرليني في زول قال ليها شغالة شنو ولا القروش دي جبتيها من وين ؟! ثم ثانياً الناس قالت علي حرامي وانا ما قدر دا، انا بس انتهزت فرصة الختم في مكتبي وقلت ياولد ألعب بوليتيكا، والوظيفة ما مضمونة، أخير نضمن مستقبل العيال وأمهم طالما العلاج بقروش والتعليم برضو بقروش ودي طموحات مشروعة أما الجرايد اللي اشتغلت فيني تشهير فأنا ماشي ارفع قضية رد شرف أهو اتحللت من الثراء الحرام وطلعت زي الشعرة من العجين تاني في كلام !!

قضية رد الشرف دي تجيب لي مليارات والواحد مفكر يشتري منتجع في أسبانيا عشان نرتاح شوية في همبريب الأندلس العجيب ثم ثالثاً ما تفتكروا إني قعدت علي الحديدة ، أخوكم ما داقس والأراضي المكتوبة بي إسم ( أم العيال) مافي زول جاب ليها خبر ، والوديعة الفي ماليزيا عشان مكتوبة بالإنجليزي ما عرفوها الحاقدين ، والقروش القالوا لي اتحلل منها هي ذاتها كانت مدورة في السكر والدقيق والذي منه ، يعني مافي ندامة .

وبعدين حكاية استغلال النفوذ دي ما عيب ، ما كل زول هنا قاعد يستغل نفوذه، فلان داك جاب أخوهو مدير مكتبو بي عقد خاص ، وفلانة ديك عينت بت خالها في منصب وكيل وزارة، والغريبة ما كملت الثانوي ، والمعتمد داك ما عنده شهادة أساس، أنا بس الفي راسي ريشة ؟! بلد تستفرد بالضعيف زي حالتي وتخلي التماسيح الكبار ، بالله شوف !! وبعدين أنا سرقت بيت زول ولا نطيت لي حيطة !! دي أراضي كانت مهملة بي تعريفة ما في زول بشتريها ، لما الحظ ضرب وبقت أراضي مميزة ليه الجوطة والحسد، والدنيا أرزاق، يعني ح أفضل حتة موظف لما أموت ؟!

ولعلمكم كل الإتهامات الظالمة ضدي ما بتهز شعرة في راسي ، سنة سنتين وتتنسي الحكاية، وأنا برضو الوجيه، ورجل البر والإحسان وح اشتري جريدة واكون بزنس مان ، وح اشتري نادي والعجبو عجبو والما عجبو يقعد في علبو .. فاهمين !! كمال كرار / الميدان / الراكوبة

تحليل ... تجنيب .. تكبير " الله أكبر وللوالي الحمد" Image

حريات / 2014/04/30

» الله أكبر لا إاله إلا الله ولله الحمد "فيديو عيد"
» وداعاً للعنوسة والعين الطائرة : عبيد وجواري في سوق الله أكبر .. سارع/ي فالكميات محدودة
» بعيداً عن الرياضه يا جماعه (تحليل)
» اخطاء تحليل الدم في الحصاحيصا
» تحليل الاملاح و تحليل المعادن