ندا هام لكل ابنا الحصاحيصا هام جدا جدا

السلام عليكم اخواني الكرام
وبعد
طبعا ذي مانتو شايفين المنتدا الصحي اهو اتعمل
مشكورا جدا دكتور بكري ماقصر ربنا افتحها عليه دنيا واخره
انا عايزه ابشر بقرب انطلاق العياده علي الهوا مبدائيا ( بعد داك حتكون علي الارض) انشا الله لو ربنا سهلها علينا
انا بديت راسلت الاطباء من ابنا البلد وده شرطي ( اطبا حصحيصين) لكن لسه مادوني رد
بس معظمهم لسه مادخلو المنتدا وحادخلو وعجبتهم الفكره شديد وانبسطو من الموضوع جدا
يلا انا عايزه الجو المنتدا ممكن اكونو هم المبادرين ؟؟وياريت سريع
المهم الندا المطلوب منكم ياجماعه انكم كلكم تخبرو اي طبيب من ابنا الحصاحيصا بانه ادخل المنتدا الصحي
ودي حتكون صفحه الاتفاق والتنسيق للعياده
المطلوبين اما اخصائي او نايب اخصائي اوطبيب عمومي
التخصصات الاتيه مبدئيا
الباطنيه
الجراحه العامه
الاطفال
النسا والتوليد
انا قلت مبدئيا التخصصات العامه وفيما بعد نخوش علي ( الانف و الازن والحنجره . المسالك البوليه . العيون.العظام الجلديه وغيرها من التخصصات التي يصعب علينا ان نجد فيها متخصصين في الوقت الراهن
المهم اعزائى الكرام اي طبيب عندو الرغبه في انو اقدم خدمه لانسان الحصاحيصا البسيط المحتاج لكلمه صحيه مننا يوفر بيها كتير من المال والجهد والتعب في البحث عن العافيه في زمن اصبحت فيه العافيه لاتقدر بثمن
وعلي فكره ممكن برضو نساعد في عدم تتطور كثير من الامراض بالاكتشاف المبكر ليها لانو نحن عارفين اهلنا قدر شنو بهملو في روحهم
يلا ياخوانا ادوني ايدكم انا في انتظار ردود علي هذه الصفحه
وتسلمو

الاخت ايمو

الافكار جيدة جداً ... والاجمل فكرة الاصرار . لان وراء كل اصرار انجاز مستحق . واصلى بنفس الاصرار لانها طرح جميل ومفيد ويقدم خدمات اجمل للمنطقة . واصلى الاتصال وواصلى الى ان تصلى لنتيجة ووراء اصرارك نحن معاك .

الى الامام وربنا يوفقك ..

يلا ياستي ابدي لينا بي ال البيت ماشاالله عليهم كمال وامال وبدر الدين وايه





كل ما اقراء ليك مشاركه في الصفحه الطبيه بتزكر قول رسول الله صلي الله عليه وسلم ان الله في عون العبد ما دام العبد في عون اخيه

تحياتى يا ايمو على هذه الروح القوية
بس ما تقولى البداية يوم الاثنين
اختى الاثنين يا بتى عشان الموضوع ينجح
معاك

شكرا جزيلا اخي عمر علي هذا التشجيع
شكرا محمد كمال السر انشا الله حنبد
اخي وليد اشكرك البدايه حتكون في اي يوم ماعدا ...........( انا والله ابوي قال لي ماتتكلمي في السياسه )
البدايه انشا الله وانا حيه حتكو قريب وحتكون انطلاقه حقيقيه لحصاحيصا معافه
وتشكرو

اولاً لك التقدير علي اقتراحك وده مشــروع ناجــــح انشــــــاءالله اتمنــــي ذلك
واتمنــــــي ان تجدي المســــــاعده مــن كــــل الاخــوان اصحاب الاختصاص من
ابناء الحصاحيصا بالداخل والخـارج كما اتــنمـــي مـن كــــل واحد مـن الاخـــــــوان
لديه شخص ممكن اساهم ارجوا الاتصال بــــــــــــــــه ....
المشـــــروع كبـيـر جـــــداً وعاوز مجهود كبير صعب علي شخص واحد .. وعاوز
حركه شديده ارجوا من الاخوان ان يتعاونوا مع الدكتوره ايمان لانجاح هذا المشروع
لك كل الاحترام اتمني لك كل النجاح والازدهار،،،،،،،،،،،،،،،

الي الامام ونحن معكـــــــــــم
وفقــــــــــــك الله ورعــــــــــــاك

شكرا انور وانا عارفاكم اخواني حتدوني ايدكم عشان كده بديت
واشكرك جدا اخي
ودمتم

كتر خيرك كتير وما بتقصري وربنا يعظم اجرك
ودي المحرية فيك ’’’
انا منتظر العيادة الطبية دي بي فارق الصبر (وحا اكون اول المكشوف عليهم)

انشا الله ياديسكو بعد الشر عليكم كلكم ياناس الحصاحيصا
وانشا الله يارب تكون لناس الحصاحيصا بالشفا العاجل وبعد شهر من اسي اكون بس بعمل في توعيه صحيه والحصاحيصا كلها معافاه وبخير وناسها خالين من اي الهم
وتشكر علي التحفيز

دايرة ليها مفاكرات بس ربنا يسهل,,,

والله شديد ياصفوان
اولا عايزه الم الاطبا ( وحاليا في واحد بس رد )
تاني عايزه ترتيب العياده واطريقه العياده هل حتكون في الخاص لكل طبيب وله عامه وهل كل التخصصات في نفس اليوم وله نفرد لكل تخصص يوم
بالجد ياصفوان ساعدوني

جميل يا ايما بالجد انشاءالله ربنا يساعدك واختك معاك بس خليني اجي السودان بعد العيد ونبتدي نرتب مع بعض حتي لو اساهم معاك ببعض الأفكار

تشكري ياهنو انا بالجد محتاجه المساعده وماعدمتكم

الاخت ايمو
تحياتى واحييك على المنتدى الصحى واسف على الرد المتاخر نسبة لظروف العمل. حقيقة احيئ فيك المثابرة والاصرار والايمان بالفكرة. انا من اشد المناصريين لتولى جيل الشباب للقيادة والتخطيط والعمل الجاد الذى تعم فائدتة ولهذا انا متاكد تماما من اسهام كل شباب المنتدى. أكيد سيساهم الكل معكم وعنى شخصيا انا معاكم فى كل شئ وخاصة مايتعلق بالجراحة العامة.
ما هو تصورك للجوانب التى يمكن ان يغطيها المنتدى الصحى؟
هذه بعض الافكار للنقاش واكيد كل شئ قابل للنقاش والمراجعة وهى عبارة عن روؤس مواضيع.
طبعا مهم جدا جانب التوعية والتثقيف الصحى ويمكن ان يمثل اكثر من 80% من الجهد وتبقى فقط مسالة التوجيه ليشمل كل الجوانب (الرعاية الصحية الاولية وصحة البيئة ورعاية الامومة والطفولة والطب الوقائى الخ ......).
الارتقاء بالخدمات الصحية وقائية وعلاجية فى منطقة الحصاحيصا.
مساعدة الفئات الغير قادرة على تحمل تكلفة العلاج بالكشف المجانى وخلافة وايجاد السبل لذلك.
فكرة العيادة فكرة جيدة ولكن تحتاج لبعض الجهد والتحديد. بالنسبة لينا اطباء الخارج ممكن تكون عبارة عن نصح وارشاد وتوجية وزى ما انت عارفة التاريخ المرضى وحده لا يكفى ويحتاج الى الكشف الاكلينيكى والتحاليل وبالتالى امكانية مراجعة احد الزملاء داخل السودان. طبعا زى ما انت عارفة العلاقة بين المريض والطبيب فيها نوع من السرية واحترام الخصوصية وبالتالى انا شخصيا بفضل انها ما تكون عامة اذا كانت عن طريق الانترنت. هنالك عدد مقدر من ابناء الحصاحيصا الاطباء والعاملين فى القطاع الصحى داخل وخارج السودان يمكن الاتصال بيهم والاستفادة منهم.
لنا عودة وواصلى المسيرة

السلام عليكم اخي ضيا
اشكرا جدا علي الرد وعلي تشجيعي
انا معاك في ان لابد من الكشف كلينيكالي لكن اخي العزيز انا عايزه نعمله ذي برنامج صحه وعافيه بس ماعبر النت انا عايزه اعرف الاطبا المشاركين وتبقي الشكوي في صندوق الوارد الخاص وكذلك الرد
الاشيا المفترض تنشر اذا كان فيها مصلحه للمواطنين يمكن نشرها كعرض لحالهas case اذا كانت مثال فيه فائده للمواطنين
ونحن مع بعض يادكتور ممكن نشوف الفيه المصلحه ونطبقو
وبالجد شكرا ليك شديد
وتسلم يادكتور

هام

كيف يا ايمو
ربنا يحقق امانيك الخاصة والعامة
الخاصة مقدور عليها لكن العامة دى
شيلى شيلتك...................؟


انشاء الله قدرتى تلحقى شي من دكاترة الحصاحيصا

الله ورسوله اعلم (يكونو زي .........)

ما عندك مشكلة شكلك كده اى شي ح تعملى براك عيادة واستشارات وخلافه

مع العلم كلهم
حصـــــــــــــــــــــــــــــــــــــــاحيصـــــــــــــــــــــــــــا

تسلمي يا ايات
كل سنه وانتي طيبه ياقمر
والله لسه ياتدوبك دكتور ضيا عدوي ودكتور الحسيني
وانشا الله الباقي بتمو انا باذن الله
بس ايدكم معاي في الترتيبات يا ايات
مفترض اعمل اجماع قريب للاعضا النشيطين في المنتدا عشان ينسقو معاي الترتيبات
وتسلمي يارب

حقيقى انا معجب جدآ جدآ با الافكار الجميلةالتى تسهم فى حل كل المشاكل الصحية على وجه الخصوص وحا اكون انشأ الله من اول اللزين يقفون بجانبكى فى هذا المشروع ..... والله ولي التوفيق

محمد ابوسن كتب:

حقيقى انا معجب جدآ جدآ با الافكار الجميلةالتى تسهم فى حل كل المشاكل الصحية على وجه الخصوص وحا اكون انشأ الله من اول اللزين يقفون بجانبكى فى هذا المشروع ..... والله ولي التوفيق

السلام عليكم يا اخ محمد ابو سن تشكر جدا
بس حركو معاي الدكاتره المختفين ديل عشان اظهرو علشان نبدا

وتسلم يارب

يا ايمو اهنيك على الانجاز (المنتدي الصحي ) وربنا يوفقك ونحن معك بي ايدينا الاتنين وراح ادعو الاخ الدكتور عادل كحيل المقيم بالسعوديه علشان يكون معك وايضا دكتورة ليلى عبد الفتاح نساء وتوليد بس هي الان تستعد لانجاب اول مولود لها وانشاء الله راح تلتحق بالركب قريباً انشاء الله ..
لك التحية مرة اخري والتوفيق ..

صلاح محمد الجاك كتب:

يا ايمو اهنيك على الانجاز (المنتدي الصحي ) وربنا يوفقك ونحن معك بي ايدينا الاتنين وراح ادعو الاخ الدكتور عادل كحيل المقيم بالسعوديه علشان يكون معك وايضا دكتورة ليلى عبد الفتاح نساء وتوليد بس هي الان تستعد لانجاب اول مولود لها وانشاء الله راح تلتحق بالركب قريباً انشاء الله ..
لك التحية مرة اخري والتوفيق ..

شكرا جزيلا اخي صلاح انا منتظراهم ناسك ديل مافي زول ظهر علي لسه بس انا متااكده انا موضوع العياده ده حااثمر عن نتائج عجيبه باذن الله تعالي ثم بمساعدتكم لي

ايمااااااااااااان
والله ماشاء الله عليك فكره بالجد رائعه لانك انتي اصلا رائعه ربنا يوقفك ويقدرنا ونساعد كمان
ما عندك اي مشكله يا عسل

مهويييييييييية العسل اهلا بيك ونورتي المنتدي

اهليييييييين رؤية يا سكره والله مشتاقييييييين المنتدى منور اكيد بوجودك