قالتلو أولا بالتبادي تجيبلي المنجل والقيروانة اللتنا ,
وكمان تجيبلي الطاقيي الخيتها ليك والعيمي ,
وزمان وكِت كُتْ جايّ تكلم أبوي وتختبني وكان ما عندك قميصآ سمح
وأنا سرقتلك قميص من محجوب أخوي وكتين جاء في الإجازي من السعودييي ؟
أها أُمي قالتلك تجيب القميص دا أساععيتي.
وحبوبتي نعيمي مرسيلاني ليك فيشان قروش الصندوق فيحال أنا كُت أوالي بدفعلك عيلي تاني افرقتك وانقطعتلك قول أُمي نعيمي !
وعبدارحمن ود خالتي قالك أدينا حجارة البطاريي العندك وشوفلك حجاري ليبطاريتك إن شاء الله تتكبس في الضُلمّا تاني مالنا عليك.
ونواصل..
وبت حومد خير قالتلك جيبلها ترمستا العند امك ,
وتعالوا شيلوا البهمي الجبتوها فحال امها ماتت لغنماية حبوبتي ترضّعا.
وكمان قول لعلويي أختك تجيبلي طرِحْتي الحمرا المبطشة الشالتا مشتبها لعرس اللمين ود الحاج ,
ماسكاها عندها لامن أسع اللمين بتو الولدوها عمرا بقي حولين وماشي للتالت !
وقولها لميلنا مقاشيشنا والبروش والحلل العندكم فيحال يبقي نسويلنا بووش قريب.
ويتواصل الحكي....
وعلويي اختك دي زاتا انا طالباها سبعة قروش دفعتهن ليها في الكشف الليل عرس اللمين ود الحاج
كانت ماسكاني من اكتافي تعصّر فوقي وتزقلت وتقول للحريم دي خجيجي عروس اخوي عيتمان
اكنها كانت تتقبّللي فيحال أخُتْلها السبعة قروش ، قَسمْ ماني خالاهنليها ماب يجيبنلي الصعوت ويرقعِنلي نِعْليي؟
ويوم كنا ماشين نرعي غنمنا وانت جيت تتلبت وراي هجمتني لامن انظلقت حيبيبة السكر الكت صاراها في توبي ,
اسع تجيبلي سكري الاندفق , ويوم نعجتكم البيضا ماتت ولقيتك قاعد متكفرن داك انا مشيت دكان السرير جبتلك سجارتين
بي قرش ونص يعني اكنني كمان بقيت طالباك ليهن تجيبن . وتجيبلي السوميتي اللتي الشلتها تظكار .
اها قبّال ما أنسي تعال شيل الطيرقي والمنقد الجبتهن لي في الخِتبي. وفتيل بت السودان الليلك ما تقول ناقص
أمك وعلويي أختك انريحن منه يوم عرس اللمين ود الحاج , كانن ماكلاتلهن حوت.
أنا وحات محجوب اخوي أصلو فوقي قطرة منو ما انرشت فوقي,
, انا اصلي عارفاك منعلم الله وكت خاتا في السحرة أدسدس فييو للعرس.
خجيجي.
منقول / سودانيزانلاين
موضوع: وكت خجيجي الراجل الكان خاتبا خلاها وعرس !!!! 
السبت 14 فبراير 2015 - 17:20
