منجضنا نجاض في التلفزبون ومنجمنا نجام قبورة
تاعب نفسو يساسق بين القنوات تفتح جونقلي تلقى ينضم
مقدرة غير عادية في تلوين المواقف والشالات وتبييض الجلاليب
لا تفوقها إلا مقدرته هو ذاتو في تغيير جلدو التخين دا
زيو وزي ام العروس "فاضية ومشغولة"
مع "شكر الله" يغير ويبدل في شالاتو المشغولة بالكُرُشي
ينتهي برنامجو بي هِنا "يستكرتك" يخليك تزازي بالأسواق
تفتش في جلاليب السكروتا ومراكيب النمر والدبايب
تلقى قاعد في "التي في" لا تعرفو ضيف لا مقدم برنامج
مرة غانوني ومرة دسطوري ومرات خبير في العلاقات الدولية
يلخبتك يقول جملة بي يدنو اللتنين ويعدل شالو بي خشمو
نضم في الاتحاد الاشتراكي لمن قلنا "شكرن"
إنقلبت بي هنا إنقلب معاها وقعد يدردق
إنقسمو لبد لمن فرز محل الترطيبة وكنكش فات الورا والقدامو
كان ناقصو "الحجاب" زي ما قال "تروس"
التصريحات بإسم الحزب الحاكم وبي قوة عين التقول أسسو
ينضم وياخد ليهو "قنتة" ويتنفخ يقرب للأصم
"لكن والله بي حقو والنصيحة بنقي الكلام الكُبار كُبار"
يتراقش يلمع يسو كدي زي حمار المادح والطارات تتطاقش
كريم أدى غشيم جضوم تريانة زمن التعدد يتمدد يقوم بـ"الموص"
(( الموص بالسكر عبارة عن كِسرة في حالة الفاست فوود))
وفي الشموليات يتشفتن ما معروف بشفط شنو ترا بجي يلغلغ
وفي آخر تصريح لفخامة شالاته بشأن سفر المعارضين لباريس
قال "تحركات المعارضة ضجة إعلامية وسفرن طلب شهرة "!!
ناسي مخرجات الحوار والنفرة والزحيح والمليل من "صُفرة" لي "صُفرة"
موضوع: "رجال حول القصور" البروفسير عشماعيل الحاج "موس" السلطة !! حزين من يفرش وحبيب من يقرش 
الخميس 11 يونيو 2015 - 10:45
