عشة صالح جات بالمحاصصة أول أمس "إتحادي أصل" ودايرة تقعد قدام
"جا ت ورا وداير الضرا"
مش كتر خيرن خالفوا الشريعة وعملوكن نائبات لرئيس البرلمان ؟؟
إنتي وبدرية القدم بالقدم ؟؟
خلاص تاني شنو ؟؟
البدوك ليهو تقبضي وتعدلي توبك تمشي علي بيتك مافي داعي للمقارنات
وإن علي بدرية فدي تعبانة وشايفة رقبتا "النصيحة يعني"
البيت كلو محفر "مُنقلا بس" تقوم بي "جيهتا" وتعدل "قُجتا" وتترأس لجنتا
وفي كافة عهود الزندية كان شعارا "الطابق البوخا قام ندا يهتف نام أعضاء البرلمان"
وزي ما قالوا في الحكمة الإغريقية "عشا العريس برا وعشا السيرة سجم البرجا"
فما حا يدوك مخصصات بدرية كان كسرتي رقبتك "كش"
إلا دايرة تحرجي نفسك وتحرجي حِزبك المغتغت بي تياب الاسلامويين
ما قبال دا ناقرتا سعاد الفاتح وحِردت مرقت ليها من البرلمان
وسببا زي ما قالت " ابراهيم الطاهر بدي الفرص للناس المهمين والسمحين"
"وحيات إبتسامتك" زول إشتغل بيها مافي مشت لحدي الملازمين السلطة بي كُرعيها
وكمان ناس حسبو الفي الكنبة الورا قعدوا يكوركو فيها قالوا ليها "قشة ما تعتر ليك"
تجي إنتي يا عشة دايرة تعتري لي بدرية ودايراهن يدوك نفس مخصصاتا ؟؟
فبدل تشمشمي وتعايني في النقش احسن تركزي في شغلك
أو خليهم يدكو المحاصصة ويوزعوها تاني ويعملوك سفيرة للنوايا "كان حسنة كان رجالة"
ولعلمك بدرية دي سعاد الفاتح ونسوان جمعيتا "المتحابات في الله" ما قدرن عليها !!
تقدري عليها إنتي آآتمامة الجرتق
موضوع: "حرابة البرلمانيات في المخصصات" ... هويا عشة !! والله بي غبشتك دي المرتب ذاتو كتير عليك .. خلي يساووك بي بدرية البرلمائية ليها حِنُمية سنة !! 
الأحد 30 أغسطس 2015 - 6:21
