نائب رئيس الجمهورية !! إياهو "حسبو" ذاتو .. "بعل ريا أخت سكينة" ! وإحتياطياً شوفو مقطع الفيديو دا

إن جازت المقارنة بين الشخصيتين
شخصية في مسرح فكاهي
خلدت جلائل الأعمال المسرحية والسنمائية والتلفزيونية
وشخصية تانية في مسرح عبط سياسي
بتجسد عينة مقيتة من عينات فنون الاستهبال والعبث الرئاسي
فحسبو في مسرحية "ريا وسكينة" عبد المنعم مدبولي
بيعتبر من رواد السنما والمسرح الفكاهي وهو فنان موهوب
وحسبو البهمنا هنا عملوهو "نائب رئيس جمهورية" لكنو معطوب
وكمان فاكيها في نفسو وعامل رئيس لجنة للاسكان والتعمير !!
وبي صفتو الاخيرة قريت ليهو توجيه بتكوين لجنة !!
لجنة لمأوى وسكن الفقراء والمساكين !!
وأسند رئاستها إلى مشاعر الدولب وزيرة الرعاية والضمان الاجتماعى
وغلام الدين عثمان .. امين عام الصندوق القومى للاسكان والتعمير رئيس مناوب
ومحمد عبد الرازق .. امين ديوان الزكاة الاتحادى مقررا للجنة
يعني لجنة من رئيسين ومقرر عشان الفقراء الفيهم "البركة" زي ما قال
وبي مفهوم المخالفة فأي زول ما فقير ما فيهو من البركة التكتح
"إبركو فيك خنق شحدت ربي عليك" يا "مطنشني"
يعني فجأة إنفتحت بصيرتك وداير تسكن الناس الفقراء ؟؟
عندك قروش يا حسبو ؟؟
ولا عايز تلغف قروش الزكاة والضمان الاجتماعي "المستثمرة"
مع إنك وبي عضمة لسانك قلت...
".... استراتيجية وموازنة الدولة منحازة للفقراء ..."
والاستراتيجية ما بنعرفا لكن الموازنة ولا منحازة للفقراء ولا شتين
ومناط تكليف اللجنة حسب حسبو ".... وضع استراتيجيات وخطط .."
"....الخطط تنفذ بالتنسيق مع الولايات.... "
"...لتحديد سبل تنفيذ مشروع قومى لاسكان الفقراء والمساكين ..."
وحقيقي ما عرفنا الفرق بين الخطط البتنفذ وسبل التنفيذ !!
مع إنو لا في خطط ولا عارفين طرق لتنفيذها بطبيعة الحال
عشان كدة حسبو إيستنجد بالجهات العلمية في الولايات
"المتحدة الجمركية"
واستنجد كمان بالجامعات ومراكز البحوث
"شفتو حسبو شِفت كيف ؟؟"
قال عشان يقوموا باجراء البحوث والدراسات وعمل نماذج للبناء
"ياربي يكون قاصد الخرط المعمارية ونماذج الفلل والشقق ؟؟
بحوث ودراسات دا أكيد حا يكون بنيان "مسلح"
معقول يكون غير كدا ؟؟
أمانة يالفقراء ما سكنتو إن شاء الله صبركم يجبركم بعد دا
نان سبعة وعشرين سنة والله ما هينة و"المسلح" ما كتير تب
وبصراحة البركة في حسبوا "ما في الفقراء"
ترا حسبو جاب "المسلح" وكفانا شر "المصلح والمسلخ"
بس يا حسبو يا حبيبي يا مطنشني
أوعة تكون داير تعملا بالمكونات المتوفرة القلتها في آخر توجيهك ؟؟
كان كدي مافي غيرا إياها مقطوعة الطاري بيوت الطين !!
أو ياربي تكون القطاطي والكشكة و الرواكيب !!
باقي اللكوك والقنا والسوريب عندنا بي رماد وشهن
وكان علي ديل ياخوي بنعرفن زي جوع بطونا
وبنعملا برانا وبي إتقان لا دايرين لجنة ولا دراسات ولا بحوث
غايتو البيوت بـ"المكونات المتوفرة" ما بناباها
لكن إنت إياكا حسبو "بعل ريا أُخت سكينة" بي ذاتو وصفاقتو
"يا مطنشني"

» قصة سودانية :رئيس الإنقلاب نائب رئيس والناس التحتو محابيس !؟
» دعاية لـ "بنك الخرطوم" !! فطور رمضان إياهو فطورنا ذاتو لكن الشمش الفي كبد المساء دي وين ؟؟
» Wantedمجرم هارب اصبح نائب لرئيس الجمهورية توجد صورة
» "منظر شيء عجيب ما أحلى الدجل" !! ياجماعة "حد من المسئولين بالمحافظة " يتصل "برئاسة الجمهورية" إمكن "ياهو ذاتو"
» الفاتحة على روح المفوضية ..وينتهي العزاء بخراج الروح (فيديو محزن)