بركة الفزت وبركة الهزمتها أم شعيرات !!
أها وكان شُفت يا ترامب !! بينا وبينك
والله من أول يوم قلت عايز تترشح نحن طوالي قلنا لسه الدنيا بي خيرا
أهو قلنا جانا واحد من وسط الناس الماعندهم شغلة بالسياسة
ناس كل همهن خدمة الناس والسهر لي أنصاص الليالي عشان "راحهم وراحتهم"
وشعار هي لله هي لله الرفعتو في الحملة والله مفصل عليك تفصيل
ولمن بنات متشجان واهايو "أخوات نسيبة" أيام الحملة قعدن يكوركن
"لا لدنيا قد عملنا نحن للدين فداء فليعد للدين مجده أو "ترق" كل النساء"
والعجب لمن جوو ناس الدعم السريع زي "النمتي" من كاليفورنيا ولوص أند جلوس
لابسين داك يالكدمول وراكبين التاتشرات هيلاري طوالي جاتا حالة نفسية
"تنفس بي جريوات بركة من صلى وقال يا الله"
تخيل يا ترامب قالت ديل كلهن من جزر "البهامة" والكاريبي
وبينا وبينك ناس "النمتي" حالفين عليها قالوا أكان مراة وقلبا محدثا التجينا مارقة
وأصلك ما تسألن خليهم يواسوها باقي روبا فات لبنا
وإنت خليك في رأأأستك بس أقعد إتعولق ليهن كدي في البيت الأبيض دا
كيتاً عليهن تجي داخل البيت الأبيض كأنك داخل تمبكتو ولا واقودوقو
الكونغرس نواب علي شيوخ طرق منتظرين جيتك
وجهزوا القفاطين والعمم المشغولة بالعُشري والشالات المطرزة
أها النطمنك علماء الولايات حلفوا قالوا البقول كلمة في ترامب كافر بي وش البيت
وعشان ترتاح فِد مرة هوليوود دي تسويها جامعة عشان ما يسوو ليك سافوتة
إن شاء الله تسميها "علوم الإتصال" زي الفي طريق مدني ديك
وناس مايكل مور وجورج كلوني وانجلينا جولي إلا يبقو هيلاهوب
رباطابي قال وجنوبي سوووا وأدروب فعل وترك
والعجب ناس ميلي سايرس وكاتي بيري تاني كان يغنن :
ما حرسو الجري صدرك موشح بالدمي ما بيخاف
ترامب فارس الحديد إن حمي
من قومة الجهل ليهو الخوف ولا قسمو
متبون في المحافل الدود كتر عشمو
شوف يا ترامب طوالي ترسل الاوفس بوي بتاعك يجيب ليك ملفنا
تصفرو وتصنفرو برا عقوبات برا كلام فاضي
عليك النبي كان ما سألت ناس السي أي أي
اللتعاون مع الادارات السابقة دي زينا منو
من زمن ريغان وبوش الأب وبوش الابن وكلنتون واوباما البوم دا
والله والحلف بي الله ما خلى حاجة مافي حاجة قالوا دايرنها نحن إتأخرنا
وكان علي الجماعات العندنا ديل والله بجو يزورو أهلن
معقول يا ترامب نقول ليهن ما بتدخلو البلد بالله دا كلام
أما الجوازات الشايلنها التوانسة والمصريين دي كلها نحن ما عارفنها تصدق
وكان لي الحروب العندنا دي الجنوبيين براهن قالوا دايرين ينفصلوا
مع إننا صرفنا الورانا والقدامنا عشان نعمل ليهن الوحدة جاذبة
قريب تلاتة مليار سوينا بيها ردمية في حي الملكية جوبا بالله قصرنا
وناس دارفور ديل نحن أول التبادي ولا كنا عارفين المشكلة
ولمن سألنا موسى زمالك قال مشكلة بسيطة وبنحلها
وهن براهن إداحرو منهن وفيهن ونحن ما عندنا معاهن شغلة
وهن ذاتن أهل في داعي نخش بيناتن ؟؟
والله كان دخلنا عليهن عرس إدريس دبي حضرنا قطع الرحط وووو
ووقفنا شوية عاينا في رقيص وغنا ندوية
وختينا خمسمية مليون في الكشف وشتتنا
وأذكر شيخ أمين حسن عمر قال ليهن يخسي عليكن كدا عيب دي فيها حاجة ؟؟
أوعك تسمع لي كلام ناس لاهاي وبنسودا والكلام الفاضي دا
الاتحاد العوروبي ذاتو ما عندك معاهو شغلة هدي بريطانيا إنملصت منو
وكان علي بوتين خلي علينا نحن بنعتر بيهو في "حلب" ونوري حاجة
ومن أسي دي أكان إضايقتو هدا قندور قاعد علي الهبشة بس أضربوا لينا تلفون
وكان إضايقنا نحن بنجيكن وننجيكن ونحجيكن بالغول والعنقاء والخج والنفي
والله يا ترامب وماك طالبنا حليفة لينا زمن نلوك في الصبر ومحنانين
آآآيا .. باراك اوباما الله يقطعوا من يومو خاتيها معانا قرض وبرا سبب
وياهو طبعن من يومن حاسين بانهم أقليات ومضطهدين وما صدقوا يحكموا
أسكت ساي يا ترامب نحن وجايعن ضقناها "ولحسونا كوع المُرة"
أها كان ما فصلناهن إرتحنا وهديلك للليلة عطرابتن قايمة
والعجب المكسيكين والاكوادوريين وناس قواتيمالا وكوبا وكوستاريكا
والله شوف عيني يا ترامب يبعوا في الشاش في مدارس ميرلاند وبوسطن وفرجينيا
ومن الله خلق الدنيا ياها الحسنة في الملعون زي الشِراء في "القندول"
بركة الفزت وكان فازت هيلاري ما كان بي موية وكملت
أم عصيبات المابتستحي الزيها هديلك مجاورات
غير قال الله وقال الرسول ما عندهن شغلة
يا زول مبروك تب وإن شاء الله الولاية التانية بركة من صلى وقال يا الله
ونقول حاجة يا ترامب ما تفكها كلو كلو حتى لو تعدل الدستور ما تخليها ليهم
يا ود الأصول ويا تِلب الحمول والله كمان ما باقي إلا المكسيكيين والأفارقة
حكمن بلاء يخمهن وكان عندهم فلاحة ما يسوهو في بلدانن
أسي نحن يوم واحد سمعت بينا قلنا دايرين نحكم أمريكا ؟؟
ما هدا حاكمين لينا تلاتين سنة ولي يوم الليلة الناس ماسكة فينا
شوف يا ترامب كان بتسمع نصيحتنا أي ولاية تقل أدبا طوالي تفصلا
خاصة ناس كلفورنيا وتكساس وناس أذونا وأذونا الله ياذي اريزونا
ركز علي الكباري ما تقعد تباري بالحواشات والقطن وعيش الريف
أوعك تسمع لي كلام المتفلسفين ديل زراعة شنو كمان ؟؟
وهو ذاتو البياكل ليهو موليتة ولا مشتهي ليهو تِبِش منو الزمن دا
كمان في حاجة مهمة والمفروض تبدأ بيها طوالي وتقوم تفرتق الأحزاب الكبيرة كبيرة
وكويس انك عملت "المفاصلة" من بدري في المراحل التمهيدية قبال "تتمكن"
الجمهوري تعملوا تلاتة الجمهوري الأصل والجمهوري التحرير والعدالة والجمهوري الشعبي
تشوف أي تلاتة من لاس فيغاس تمسكن رئاسة "الفكة" دي وتفك الناس في الهوا شِ
موضوع: الحبيب والحسيب النصيب دونالد ترامب حفظه الله ورعاهو !! أكان ما شفت ..... 
الثلاثاء 15 نوفمبر 2016 - 6:23
