سجم أم المغتربين والرماد في خشم الراجيهم أكان دفعوهم بدلات حكام البلد "أما دي فجوة دي"

صحفي جديد بجي مرة مرة يحلل "بدون دم" شئون البلاد والعباد في قناة النيل الأزرق
قالوا عندو صحيفة أعتقد إسمـها "الأهرام" الشنو كدا ماعارف
قالوا قبال كم يوم إقترح على الحكومة حلاً عشان تسد الفجوة بتاعت ضياع البترول
وللذين لا يتقنون اللغة العبرية ففجوة تعني الفرقة بين ما يتم تجميعه من المساكين للصرف على الدستوريين
فإن كفى كفى وإن ما كفى يسموه "فجوة" تضيق وتتسع بالتناسب مع اللهِط واللغِف
ونرجع لكلام الهندي ال "قال إيه" مافي حل "لسد الفجوة"
غير السودانيين العاملين في الخارج وبقصد المغتربين !!
"سجم أم المغتربين والرماد في خشم الراجيهم "
يمرقوا من الرسوم والضرائب بتاعة الجهاز "المص دم العاملين بالخارج"
يقعوا في سد فجوات بدل سكن وبدل أعياد المرتاحين العاملين فيـها شغالين في الداخل
أظنهم "قِنِعو" من العاملين بالداخل بعدما مابقو ماشين علي عجل الحديد دايرين يقبلو علي ناس الخارج
وعديل كدا قال "دولار ريال يورو من أجل الوطن !!
الوطن الواحد ماقد كان ولا ما سيكون الله أعلم !
أنا ماعندي حق أتكلم بإسم السودانيين العاملين شغالين بالخارج
لكن والله أشكر الهندي على حسن ظنه بـهـذه الشريحة الهامة من السودانيين
ولا أشك إطلاقاً في وطنيتـهم وإخلاصهم للوطن الغالي العزيز البفدوهو بالنفيس
وأعتقد الفكرة جيدة وممكن تدر على الحكومة عملات صعبة هي في أشد الحاجة لـها
بعد ما تضاعفت البدلات وكمان شملت أوجه جديدة لنج ما سمعنا بيها قبال دا
زي بدل الجلاليب والعراريق والشالات والعمم "الكِرِب" والناس في "كرب"
خصوصاً بعدما أصبح عدد ناس الحكومة والدستوريين أكتر من المغتربين
وبأمانة الفجوة دي ولا بتنسد ولا أي حاجة أكان الله ساي من فوق
ياخي دي البترول والمشاريع الباعوها ما سدتا يسدها المغتربون؟؟
والمقارنة ذكرتني قصة الشاب الذي صارح والده بالرغبة في الزواج من بنت عمه
الوالد على الفور رفض الفكرة خوفاً من زوجة أخيه "وكانت إمراة متجبرة وعاجباها رقبتا بالحيل"
وقال لولده "البنية ما فيـها كلام لكن ياولدي عندها أم صعبة وإنت ما بتقدر عليـها"
شب الولد "كيف يابا ما بقدر عليـها والله أأدبا ليك جنس أدب تمشي علي عجل الحديد ما تفتح خشما"
فرد الوالد بتهكم " تأدبا إنت ؟؟ ياولدي دي عمك طويل قدر الحرازة ما قدر عليـها تقدر عليـها إنت آآلخوخة؟؟
"وحاشا لله المغتربين ما لخوخات لكن الظروف الشغالين فيـها للخوخة أقرب"
ياربي الهندي دا ما سمع من الهنود المالين سوق العمل ديل آثار الأزمة الإقتصادية على الوظائف والمداخيل؟؟
عموماً ما علينا وأنا عندي إقتراح للهندي يمكن الاقتراح يساعد في سد "الفجوة" الحاتظهر في السودان
ولما نقول فجوة حا تظهر فبالضرورة الفجوات الظهرت قبال دا سداها أهل الحكم براهم الحمد لله
أول خطوة في الإقتراح تتمثل في إحصاء دقيق لكل أصحاب المناصب الدستورية والشرعية والأمنية في البلاد
الخطوة التانية يتم تقسيم هؤلاء الناس إلى كيمان حسب الموقع الوظيفي
الخطوة التالتة يتم تقسيم المغتربين إلى كيمان بحسب دولة الإغتراب أو النزوح أو المهجر
ومن ثم نخصص لكل كوم من كيمان المغتربين كوم من كيمان المسئولين
كوم رئاسة الجمهورية "الرئيس والنواب والمستشارين ووزراء الدولة بالرئاسة" نعهد بيـهم لمغتربي جزيرة بروناي
الوزراء القوميين ووكلاء الوزرات القومية ووزراء الدولة بمجلس الوزراء ديل نعهد بيهم لمغتربي سنغافورة
أعضاء المجلس الوطني "القومي" ديل نعهد بيهم لمغتربي جزر ألبهاما وما وراء الكاريبي
"عشان ناس المجلس الوطني نقاشاتهم كتيرة ومسيخة يحللوا ويحرموا علي مزاجهم"
أما الولاة ونوابـهم فديل غير مغتربي السويد والدنمارك وفلندا ما عندنا ليـهم حل
نجي بعدا للمعتمدين والمحافظين ونوابـهم فديل نعهد بيهم لمغتربي جنوب إفريقيا وجزر سيشيل "شيلك ختك"
أما بتاعين المحليات في العاصمة والأقاليم فديل أولى بيـهم مغتربي ليبيا واليمن
أما كند وأمريكا وبقية دول الإتحاد الأوربي فديل نديهم مفاوضي الحكومة بتاعين الحركات في الدوحة
وبالمرة يريحونا من مساسقة أمين حسن عمر وغازي صلاح الدين
وعاهم مصطفى عثمان العامل زي أم العروس "فاضية ومشغولة" يركب في طيارة وينزل بدون دبارة
ومافي واحد يسأل عن بقية المغتربين في دول الخليج
عشان ديل نخليـهم لأهلـهم وذويـهم "صاح ولا ما صاح"
طبعاً التقسيم دا خاضع للتغيير حسب الترقيات و/أو التفنيشات
فلو واحد وزير تم ترقيتو كوزير دولة برئاسة الجمهورية طوالي نوديهو بروناي
وكمان زول زي صلاح قوش تم تفنيشو من الخدمة
بالراحة نختو مع أهله بعدما شبعهم تعذيب "أفضى" للموت وقبيل "كان منفوخ واقف زمبارة"
والكلام بتاع التقسيمات دا كلو بي شروط
نعم شروط ونكون ليـها صندوق نسميـهو "صندوق دعم الحكام"
ونجيب فتوى من مجلس الفتوى بجواز دعم الحكام من أموال السوام
والصندوق نتبعو من الناحية الإدارية لوزارة الألقاف والشئون الدنيوية
ومن الناحية المالية نتبعو لوزارة كهرباء سد فجوة كجبار
فالشروط مهمة في هذه الحالة التي يمر بها النظام الذي يعاني من "الشيح والنشاف"
نظام خفت مكنته بسبب الإجهاد في تشتيت العباد وتقسيم البلاد
أها لمن يودوك لي ناس بروناي ولا سنغافورة مش تخمخم زوجاتك كلـهن الجُداد والقُدام
فالمسموح به زوجة واحدة فقط ولا يعتد بزوجات المسيار والعرفي والمتعة واللغفي
حتى لو كانت مستندة على فتاوي السترة من مجلس "إفتاء الأدعياء في متعة الأغنياء"
والزوجة يجب أن تكون الأولى ولو كانت مطلقة أو "مجدوعة مع أهلـها" تجي بعدها التانية
أيوة الحكاية مش فوضى دا أمر يمكن يؤثر على الإقتصاد "الهامل البفتي فيهو الهندي"
وكمان في قيود علي أولادهم الضكور والإناث "الشُفع" فلأي واحد من الدستوريين ديل تلاتة شُفع فقط
واحد على الأقل من زوجته الأولى "بنت عمو"
وعشان ما ننسى شريحة الصحفيين البحرشوا في الحكومة على السودانيين المورطين بالخارج
الصحفيين من أمثال خال الرئيس والهندي وإسحق فضل الله فديل نعهد بيهم لتجار الشنطة "كفحك لفحك"
وأفتكر بعدا ما بنكون قصرنا مع حكامنا ال حا يسألنا منهم الله يوم القيامة
ياربي القيامة ما قربت نتفكفك من الناس ديل ؟؟

هنداوي هوي ما تقول نسينا ناس استراليا
لا ياحبيبي فناس استراليا ديل حا نخليهم يختارو
يا إمسكوا لينا اللاعبين الأجانب والمجنسين
ولا يقنعوا الاستراليين يفتحوا لينا باب الهجرة للمغتربين الضاقت عليهم الوسيعة وأضنتهم القطيعة
أما ناس صديقنا عاطف إسماعيل فغالباً ما يتم تعينهم لمقابلة منصرفات "المتفلتين من أهل النظام"
الذين يرتادون القاهرة في الويك إند "نهاية الاسبوع"

سجم ام الصحفي دا الوقع في ايدك يا المحبوب ، انا تابعت الحلقة دي والراجل دي ما قال كلام كتير قدر دا ، تقوم ما تخلي ليهو صفحة ما تهبشا .
على العموم موضوعك كان دمس الخلق وطيب المعشر واخدت فيه اتكأه طويلة واقتراحاتك كفيلة بسد الفجوة لكن ان شاء الله ما يعملوا بيها

الأخ المحبوب لك التحية
يظهر أن الصحفي الهندي هو هندي بالصحيح لأنو لا يعرف كمية الأتاوات التي يدفعها المغتربين من ضرائب إلى تاشيرات وزكاة ، وأول مرة في الدنيا تكون الزكاة إجبارية، وطبعاَ الهندي شغال بمبدأ يعني شنوا زيادة مبلغ آخر من ضمن هذا الكم الهائل من الأموال التي يدفعها المغترب من أجل جعل ولاة الأمر لايشعرون بالفرق في طريقة حياتهم من صرف بذخي بعد أن يشح إيراد البترول، والرفيق الهندي طبعاَ شغال أيضاَ بمبدأ سد الفجوة هوالوحيد ال "فنقل الريكة"
ودمت

المحبوب سلام :
انت ما سمعت الاخبار . المشكلة دى ما اتحلت البشير اليوم قال للجنوبيين : عندكم 3 خيارات يا النص بالنص يا رسوم جديدة يا تختونا
جاى جاى .
بعدين المغتربين ديل اكتر من كدى انا غايتو جمعت الدفعتو ليهم لمدة 10 سنوات لقيتومبالغ خرافية : ده كلوا عشان شنو ومقابل غير الاجراءات العقيمة والتلتلة .

Mutwakel كتب:

سجم ام الصحفي دا الوقع في ايدك يا المحبوب ، انا تابعت الحلقة دي والراجل دي ما قال كلام كتير قدر دا ، تقوم ما تخلي ليهو صفحة ما تهبشا .
على العموم موضوعك كان دمس الخلق وطيب المعشر واخدت فيه اتكأه طويلة واقتراحاتك كفيلة بسد الفجوة لكن ان شاء الله ما يعملوا بيها

والله ناس جدة حقو يخلوا ليكم اصرف علي ناس الدفاع الشعبي في كل الولايات "عشان لماضتكم دي"
تسلم متوكل مع التحايا والود

استاذ عبد المنعم
مشكور ياخي علي المرور
الهندي دا ياخوي نجض الناس البهناك
داير ينجض المغتربين كانو طالب فيهم مغسه

مع تحياتي وتقديري

صلاح كتب:

..........يا تختونا جاى جاى .
بعدين .............................

صلاح سلام وتحية وتقدير
والمشكلة في تختونا جاي ولا جاي !!
أها ما بضاعفوا ليك الضريبة آآآعشاي
غايتو حظك ياصلاح يتغدوا بيك ناس جهاز المغتربين
ويتعشوا بيك ناس السيرة الجاية باللموزين

وتسلم والجاتك في مالك سامحتك

بالله يا المحبوب شوف لينا السودانيين حملة الجوازات الاجنبيه ماف طريقه يملصوهم بى جاى ولا بجاى عشان يساعدوا فى سد الفجوه الهندية ...!!!

يادكتور السودانيين من حملة الجنسيات الاجنبية ديل جاينهم
ديل حيكونوا مسئولين من رؤساء اللجان الشعبية التابعين للمحليات التابعة للمعتمديات التابعة للولايات التاعبة ناس وراق

تسلم يادكتور وحمدا لله على سلامة الرجوع

المحبوك حلال المشبوك ..
على ذكر الحلول الهندية والهند .. كدى باصر بجاى جاى وشوف لينا ضريبه مالية جامده لناس جوز الهند .. المحمدين ... وكل الطلبه فى بلاد بره عشان يساعدوا فى سد الفجوة ... وكمان بالمرة عشان ارتاح منهم شوية اليومين ديل .. الاولاد على سفر!!!

البلد بقت كلها سدود
سد مروي
سد كجبار
سد مالك
سد الخانة
سد الفرقة
الله يسد نفسهم والله يا حبو ما فضل ليهم الا يسدوا علينا الهوا بعدين شايفك وزعت كل الخلوق باقي ليك الشعب الفضل دا ماداير ليهو توزيعه كان الجماعة ديل هجو خلوه بنبقنا كويسين بعدين شايفك ماليزيا دي فطيتا مالك

حبو سلامات
نحنا بقينا ندخل البلد بتاشيرة وندفع ضريبة اقامة
ونقيف في طابور الأجانب رأيك شنو اعمل ليك تبني وأقول
ده ود سجنتي وزنزانتي عشان يعملوا ليك خصم....؟
وجايي ليك راجع