إنت من زمن طالعني ؟؟
طلعت روحك شحدت ربي عليك
دا جيل جديد يغلغلوك ويهشتقوك ويفسبكوك وانت في قصرك تلوك في الكلام الفارغ
شنو طالعوني وامرقو لي برة
البطالعك منو ياعمر ؟؟ ديل لا قدرك ولا لحم "سدرك"
أكبر مافيهم تلدو في آخر بطانك !!
والله إتذكرتا حكاية جدي فرج الله مع جدي أحمد
ولس شنو ماني عارف
المهم
زمااااااااااان
زمااااااااااان
يوم "حار" ونهارات تقلي فيها البن
جدي فرج قاعد في أمان الله
شيتو في الكانون وجردلو مناصص
والدلوكة تقول واغربتي
إشتقت لي وصالا
دي قست علي مالا
مشغولة في دلالا
وودعني الليلة يا دياشي
مع البوليس انا ماني ماشي
والليلة ووب انا
انا انا
شارع الزلط
انا انا
المرسوم غلط
انا انا
وعييييييييييك
جاهو خبر وفاة جدنا علي
بكى زين وشد حمارو جاء صاد
ينهر في الحمار قال يلحق الدافنة
لمن دخل الحلة كان الناس سترو ورجعو يجهزوا الفراش
الساعة بقت إتنين ونص ودرجة الحرارة تحلف تقول رفعوا منها الدعم
قفا بوشو وربط حمارو جنب زريبة ناس دفع الله ود المُر
وجاء ماش علي ديوان نصر
والناس تدودي بالحيط من الحر
والوليدات عرقانين يقجو في الصيوان
يجي داخل جدي فرج الله والفاتحة
زول قدر يقوم علي حيلو مافي إلا من رحم ربي
وقوم يا فرج الله أقرأ ليهم "آل عمران"
وجدي أحمد تحت الحيط يهمهم بما يوحي بانها "آل عمران"
نهايتو فتر ونزل يدينو وفرج الله شاحط ليك الخلق يقرأ
جدي أحمد بالراحة قال ليهو "خلاس يافرج الله"
وفرج الله بي الفي راسو ولا اشتغل بيهو الشغلة
وجدي أحمد يردد بصوت خفيت "خلاس يا فرج الله"
"خلاس يا فرج الله يا أخي "
"خلاس يا فرج الله الناس دي تعبانة "
"خلاس يا فرج الله يا أخي "
وإزدادت حدة صوت جدي أحمد وبصوت عالي
"خلاس يا فرج الله الناس دي روحا مرقت "
"خلاس يا فرج الله يا أخي "
خلاس يا عوقة
أها دي بقت علي اللملمو ليهو المحترفين الارتريين بأعلامهم يهللوا ويكبرو معاهو !!
وهو مُصر يقرأ لينا "آل عمران"
كمان جابت ليها شتيمة وتحدي
"طالعوني"
يطالعوك وين يا عمر يا أخي ؟؟
والبطالعك منو ؟؟
بي عضمة لسانك قلت ديل ناس الواتسب والتويتر والفيسبوك
يعني شباب أكبر ما فيهم /ن تلدو في آخر بطانك
إنت ما بتستحي يطالعوك كيف ؟؟
الزمن البطالعوك فيهو بطالعوا فيهو المواقع المحتشدة بالغبن
خلاس ياخي كفي الناس شر الرهق وأم جركم ما بتاكل خريفين
بمبانك دا والله كان تتبخر بيهو
زول بمرق ليك مافي مالك ما جربتهم الشهر الفات دا
لملم بُقجك ومن قبل الله الأربعة إختار ليك واحدة
أسي في ذمتك دي مع إنو ما عندك ذمة
عندك رُكب للمطالعة ولا ساي حراق روح ؟؟
قلت جيت تنقذن غتست حجرن
قالوا ليك أمش بالتي هي أحسن تقول يطالعوني
مشروعك الحضاري ياعمر آخِرتو مطالعة
عموما زمنك فات وغنايك مات إتخارج ساي
خلي أمبيكي يشوف ليك وظيفة مع عواطلية الاتحاد الافريقي
وخلي الناس في حالن
فالدين لله والوطن ليس للبيع
موضوع: يا "عمر" زول بطالعك مافي كان عندك شغلة أمش أقضاها !! فالدين لله والوطن ليس للبيع 
الثلاثاء 13 ديسمبر 2016 - 6:20
