عثمان الحلبي في توثيقي الحصاحيصا دوت كوم

الحصاحيصا المدينه الحنينة وسكرة ستظل دائما بطعم ومذاق خاص ونكهة محببة كل من ارتبط بها يصعب فكاكه منها فهذا هو سحر الكيمياء الذي تنفرد به الحصاحيصا . منذ القدم هنالك رابطة بين الحصاحيصا وقري الشرق من صفيتة والعزيبة والصقعيعة وحتي تنبول وما حولها من قري . ارتبط معظم ناس الشرق بسوق الحصاحيصا كقوة شرائية وقوي عاملة في مختلف المهن . قد لا يعرف الكثيرون من اهل الحصاحيصا العلاقة التي تربط الكثيرين من ناس الشرق بقاعدة عريضة من ناس الحصاحيصا كلها ولدت في السوق من خلال التفاعل اليومي ليشكلوا ( الفتقة ) الاخري من نسيج الحصاحيصا الاجتماعي والذي يمتد حتي اخر بنطون الا ان هذه العلائق والنسيج الاجتماعي اصبح بعرض الضفتين مشكلا حصاحيصا واحدة بفتقتين شرقا وغربا بعلاقاتها الاجتماعية والاقتصادية .[ندعوك للتسجيل في المنتدى أو التعريف بنفسك لمعاينة هذه الصورة]
عثمان الحلبي في مصنعه تحت الشجرة
من بين الشخصيات التي تعتبر من رموز الحصاحيصا بحكم تواجدهم منذ القدم وعملهم المتواصل لاكثر من نصف قرن بسوق الحصاحيصا ارتبط بعلاقات طيبة مع الجميع ورفع الكلفة واصبح واحد من الحصاحيصاب شخص نسيج نفسه تقاطعت فيه فصاحة اولاد الريف مع حصافة اهل البطانة وسخرية الاقدار.. يجيد الدفاع عن نفسه في قالب ساخر لطيف تجلس اليه ولا تشعر كم من وقتي مضي ازجيته في تفريقة مليئة بالمداعبة والضحك المريح والذي لا يسلم من بعض هجاء وذم يشعرك كم انت انسان فارغ وهو في هذه السانحة عمل قروش وانت لا .. تجده انجز الكثير من الاعمال الابداعية العملية كنا فيها بمثابة كسر لرتابة اليوم العملي .. كل الحصاحيصا كانت تجلس اليه وهو يطرق في قطع من الصقيح والبال رايق او ممسكا بكاوية لحام او مقص يلعب يه فوق سطح صفيح بارد انه الرجل الذي سخر من روحه ضاحكا عليها حتي اضحكنا جميعا انه .. عثمان الحلبي
الاسم الكامل :
عثمان الطاهر عبدو
الجنس :
من المغرب العربي يعني من سوريا وكررها لي باصرار من سوريااااا
وعندما قلت له سوريا دي في المشرق العربي رد علي :
اكتب سوريا ساكت انت داير تدق لي تاشيرة!!
من مواليد1940 في رفاعة
[ندعوك للتسجيل في المنتدى أو التعريف بنفسك لمعاينة هذه الصورة]
كنت اعمل عامل مسدس بطلمبة بنزينة برفاعة وكنت حرامي بسرق صاحب الطلمبة عندما يخرج اي قروش ابيعها كنت اكبها في جيبي وادسها منو حتي اكتشف سرقتي وقام طردني عشان اسلك طريق صاح.
في العام 1955 دخلت سوق الحصاحيصا مع والدي الذي يعمل حداد في المكان الذي قامت فيه عمارة ودالفادني وكان بي وراها محل عمارة اتحاد التجار موردة الفحم .
_ لم ادخل اي مدرسة والحمدلله كثيرا الما دخلت مدرسة وقريت.. وهذه حسنة كبيرة اشكر فيها ابوي وكل يوم ادعو ليهو بالرحمة عشان ما قراني .. تعرف انا لو قريت كنت بقيت مدرس او عسكري..
_ لو بقيت مدرس كنت اكون تعبان جنس تعب تعرف انا ولدي الكبير محمد شغال مدرس ابتدائي والله العظيم ما حصل جاب لي طاقية وياريت لو بقت علي كدا والله يا حسن ما طالبني حليفة ان بصرف عليه حتي الان.
ولو بقيت عسكري براك عارف ضحك حتي تش نفسه بالكاوية ..كنت بقيت شحاد والله مرتشي او حرامي والحمدلله وربنا يرحمك يا بوووووي ورفع يديه الي السماء
_ انا الان مرتاح والله مهندس عديل وادرس ليك مهندسين الزمن دا
_ شوف العدة الشغال بيها:
سندان .. اجنة .. صوة.. عتله... مطراش.... سمبوك نشادر وموية نار للحام[ندعوك للتسجيل في المنتدى أو التعريف بنفسك لمعاينة هذه الصورة]
_ اقيف يا وراق انت من قبيل تسأل فيني انا بسالك سؤال تجاوبني عليهو ؟؟؟ قلت ليهو .. اسأل!!
_ انت عارف ليهو المسلم موصينو علي سابع جار؟؟
قلت ليهو.. لأ
قال لي ببساطة الجار الثامن كان شايقي!!!!
اها يا عثمان الفرق شنو بين البنطون والكبري؟؟
والله البنطون رغم مشاكله كنا متواصلين ناس رفاعة وتنمبول وقري صفيتة والعزيبة كان البنطون خالق لينا علاقة نضحك ونقرق علي بعض.. الكبري مريح تقطع الشرق في وكت سريع لكن ما ممتع ومسيخ دقائق مافي تصل البيت..
_ اها كيف الحاجة المرا؟؟
ضحك وقال لي والله جيت خاشي البيت من صلاة الجمعة سمعت الخطيب قال نسوانا الفي الدنيا ديل الله يوم القيامة بصغر عمرهن ويجملهن شويه وتاني يعرسوهن لينا .. لمان جيت راجع البيت كنت زعلان من كلام الامام المرا قالت لي مالك يا راجل؟؟ قلت ليها الامام قال يوم القيامة برضوا ح يعرسوكم لينا يعني ما مارقين مننا الله يقرف اليوم الرماني فيكي والحاجة التغيظ قالوا لو عرست فوق للاولي برضو تقع ليك الاولي قومي جيبي الغداء اسع انتي مرا وتدي القلعة مرا!!يمرمر كيك يا يابا اسع انت راجل بتقدر ليك علي مرا تانية والله يوم القيامة ما تقدر!!!!!
الحالة الاجتماعية:
والله اموري تمام شغال لي شغلانه مافيها راس مال تعتمد علي الحرفة والصنعة والله ما طالبني حليفة يوم السوق يكون كعب بعد ما اشتري الملاح والسكر والشاي والقهوة واللبن والحاجة الباردة الكرستالة الكبيرة والفواكه واي شي حتي اللبن ارجع البيت وفي جيبي 30 جنيه نعمة من كريم واها اقول ليك حجيت مرتين وعمرت مرتين عليك الله ما احسن من المدرسين والعساكر؟؟بس امرق منهم بتاعين الحركة وضحك حتي انكفأ علي قفاه.......

[b]اصدقاء:
عمر فضل الله
عبدالله فضل السيد مدير التلفويون لمان الناس ماعندها تلفزيونات
المرحوم الاستاذ حسون كرم الله
المرحوم عمر عجورة[/b]
له التحية انه عثمان الحلبي الرجل الظريف الذي ما يزال يمد في جسور من علاقات حميمة ذاخرة وساخرة

تحياتنا له وامد الله فى عمره ...

وعمرك ياوراق وعمر الكاميرا من كل الفصول واللصوص و.....و.......

مشكور ياستاذ وراق علي الحوار الرئع مع الرجل الاروع انا بتذكر ونحن صغار في الحي الشرقي ننظر هذا الرجل وهو قادم من السوق متجه الي البنطون ويجي غاشي بيت جدي فضل الله ودائما مايقوم بمداعبتنا ويحكي لينا قصص ونكات وحاجات طريفه لك وله التحيه cheers

والله يا ورقة الذول دا عبارة عن مسرحية متحركة والعجب لو لقيتو قاعد معاهو عبد القادر حماد [أبادي]
والله عادل امام ويونس شلبي ماذيهم
ربنا يديه الصحة والعافية

الاستاذ حسن وراق لك الشكر والتجله مع مواضيعك الثره ...........
لكن اين اهل الحصاحيصا .......... الزعيم علوب.... عم فضيل .... زينب حسيب....
عمك بكش ....... وغيرهم كثر .... وعلي حد علمي ان الحصاحيصا بدات من الحله التحت والحله الفوق......

فى اجازتى الاخيرة وكنت دايماً اقعد فى مغلق الاخ عماد لتناول قهوة الاخ عثمان
وهو جدير بالتوثيق كنت دائما التقى بى عثمان الحلبى وهو دائما فى تعليقات وجدل مع اصحاب المغالق
وهو يفتخر دايما ويعتز بى نفسو .قلت ليهم الراجل ده ماهين صورو مالية الدنيا
ووعدته انو اجيب ليهو اللاب واوريهو الصور وماكتبه الاخ حسن وفعلاً تم ذلك وطبعا اعجب غاية الاعجاب واتلموا ناس السوق واولاده
واخيراً طلب منى طلب انا احيلو لى وراق (قاللى اها بعد كده ما ممكن اسافر بره )طبعاً شاف نفسو بقى مشهور وكده

لك التحية يا ورقة
عثمان الحلبى ربنا يخليك وتواصل المسيرة
يا ورقة عثمان الحلبى ده ما قريب ناس وزيرى ولا حلوبية ساى

» عثمان عباس في حوار توثيقي غير مسبوق
» يا بختنا يا بورداب الحقو ا عثمان الحلبي الرجل الساخر في دوت كومنا ويا بختنا
» مائة عام على قيام مركز الحصاحيصا..الحصاحيصا في يوبيلها الماسي ولاحد حاسي.. بقلم عثمان علي حسن ابو ايمن ( ديسكو ) سابقا
» حي فور مستودع الابداع والجمال بالحصاحيصا
» الحصاحيصا تبكي عثمان الامام