غياب كامل للعنصر النسائى فى المنتدى

بالرغم من ازدياد عدد المسجلات من الاخوات الا اننى الحظ غياب كامل للعضوات بالترحيب بالاخوات الجدد..
وبذلك اود ان اتسال وين بت هندسه وبت الحصاحيصا و العضوه الاولى انعام عبدالحفيظ واختنا رحمه ونجوى البحارى وعييييك..
جاتنا اسراء وشذى ونوسه ونادرين واقدار الى اخر القائمه و لا من حس ولاخبر!!!
وين ناس الجندر!!!! عووووك ياعمار...
اجمعوا الصفوف..
بكرى

بجانب ذلك فإن المنتدى تطغى عليه المحلية
أي أنه كثيراً مايناقش قضايا تهم الحصاحيصا
وإن كنت لا أغفل أن هناك مواضيع عامة تهم السودان الوطن عموماً
في اعتقادي الشخصي يجب أن ننطلق الى آفاق ارحب لزيادة عدد القراء بالمنتدى
وأن لانتقوقع في بحث قضايا الحصاحيصا
يجب أن يكون لها القدح المعلى
ولكن للقراء اهتمامات أخرى
الاحظ بطء في ثرمومتر الردود والذي يصاحبه ايضا ندرة في عدد القراء
كما لاتوجد مواضيع ساخنة بالمنتدى
خاصة المواضيع التي تمس الأسرة السودانية
والمسماة المسكوت عنها في البيت السوداني
والحصاحيصا ليست بمعزل عن ذلك
أتمنى أن يفتح المنتدى نوافذ أخرى أكثر اضاءة
كما أن فكرة جمع كل المنتديات في منتدى واحد { المنتدى العام } تجعل القاريء أكثر اطلاعا
وبالتالي تزيد المشاركات
فكرة تجزئة المنتديات الى عام وديني واجتماعي لم تنجح في سودانيز أون لاين
بالرغم من شهرته
فحينما تم تطبيقها تحول معظم القراء والأعضاء الى المنتدى الاجتماعي
وفشلت الفكرة تماما
فتم دمج كل المنتديات في منتدى واحد
وفي رأيي المتواضع حينما نكسب أكبر عدد من القراء
حينها يمكن أن يكون لكل ذوق منتداه الخاص
مجرد رأي

سلامات يا BOSS يادوب بتسأل .. رحمه G.T كانت فى أدغال دارفور وهسه رجعت بالسلامة وقبل ما أقرأ البوست دا رحبت بإيناس عدوى ( بالمناسبة إيناس دى كانت أحلى بت فى المدرسة ) .. كونو بخير

الاخوه المتداخلين...سلام..
والله يا ابوحراز كلامك صاح ميه الميه وانا شخصيا من انصار يكون الجميع فى ساحه واحدة بدل منتدى هنا واخر هناك وسبق ان ذكرت ذلك فى اكثر من مناسبه فى هذا المنتدى...لكن برضو عندما يكون هنالك انصار فكره معينه لهم الغلبه يجب الرجوع لهم وتلبيه طلبهم..اهو نجرب ونشوف...!!!
بالنسبه لمحليه المواضيع ...العافيه درجات واهو ربنا يديكم العافيه وجهد الجميع مقدر فى هذا المنحى...
اسراء بابكر...انتى الذوق يفوتك يمشى وين....... ما تقومى به جهد مشجع......وانا كان ما لقيت لى طريقه وبقيتك من سكان الحصاحيصا ما برتاح...
رحمه والله نفتقدك بشده .. لكن مذكر انك قلتى حتغيبى كم يوم... لكن الغيبه طالت...اها بعد ده ما تطولى الغيبه..ورينا جبتى لينا شنو من هناك..سلامى للصغيره والجميع...
كونوا بخير..

.. نعم ابوحراز نتفق معك تماما فى ان تكون هنالك صفحة رئيسة للمنتدى بها كل جديد ومنها تتفرع المواضيع .. بخصوص الانغلاق حول الحصاحيصا فانت تعلم ان عدد الاعضاء ما زال قليل ودون الطموح لذا فان الطرح الذى يهم الحصاحيصا هو من يجعلهم اكثر تداخلا ولا يعنى هذا ان يكون باب العضوية فقط لابناء الحصاحيصا ولكن لنجعل المنتدى اكثر حركة وحيوية .. اما المواضيع وخاصة المسكوت عنها وهى ايضا ستجد لها صدى داخل الحصاحيصا فهذا هو واجبنا .. حيوية المنتدى من سخونة تناوله للمواضيع ودرجة حراكها .. اعتقد اننا نكثر من التراحيب ولدى اقتراح ان نلزم الاعضاء بطرح عدد معين من المواضيع خلال الشهر دون اللجوء لوضع لائحة عقابية تعادل الالزام ولكن فقط لتحريك الاعضاء بمعنى حتى لو الطرح غير جيد فليكن البداية لطرح اخر وهكذا بمعنى اخر ان نركز فى هذه الفترة على الكم ومن ثم الكيف والعمق للمواضيع...

رحمهG.T كتب:

سلامات يا BOSS يادوب بتسأل .. رحمه G.T كانت فى أدغال دارفور وهسه رجعت بالسلامة وقبل ما أقرأ البوست دا رحبت بإيناس عدوى ( بالمناسبة إيناس دى كانت أحلى بت فى المدرسة ) .. كونو بخير

حمدا لله علي السلامة. أتمني ان تكوني قد مررت بتجربة مثمرة و خرجت بفائدة عامة. كنا قد اشتقنا لشقاوتك في الأيام الماضية. بس دي كانت اكتر من تلاته أيام و الا إيه؟

الملاحظات قيّمة يا ابو حراز ما في شك. يا اخي و الله انت منور. لك الوّد

سلااااااااااااااااااااام للاخ بكري عثمان شكرا ليك كتير علي
تفقد العنصر النسائي الذي يكون متجاهلا في معظم الاحيان...
والتحيه لكل من كتب في هذا الموضوع ..........
نحن بالجد مقصرين شديد في حق المنتدي لكن والله مشاغل دنيا...
لكن الحمد لله شبه رجعنا.....................[center]

مزيد من التشجيع يا اخ بكري حتى تاخد المرأة في الحصاحيصا مكانها المرجو في المنتدى. انا ببصم علي اقتراحات الاخ ابو حراز بالعشرين واتمنى انت تجد صدى عند ادارة المنتدى.

معاك يا اقدار بكل ما نملك..
بكرى

ها هي الصفوف بدات تتجمع

مرحب بت امها..
ما شفقتينا لكن بالغياب الطول ده..
مرحب تانى .. وما تطولى الغيبه...
وعقبال يجو راجعين ناس مبارك وود الدامر...
بكرى

تحياتي اخ امين الركابي
بما ان في نص عاقل ونص مجنون فاكيد العاقل هو
الفي المنتدي ..........
يارب يعقل النص التني.............
وعايزه اقول ليك اطمئن طول مالاساس متين
والاعمده قائمه علي (قواعد مدروسه) ما ح تكون
في مشكله في انها تطلع لاعلي مايمكن بس مسألة زمن ليس الا..

كما أن فكرة جمع كل المنتديات في منتدى واحد { المنتدى العام } تجعل القاريء أكثر اطلاعا
وبالتالي تزيد المشاركات
فكرة تجزئة المنتديات الى عام وديني واجتماعي لم تنجح في سودانيز أون لاين
بالرغم من شهرته
فحينما تم تطبيقها تحول معظم القراء والأعضاء الى المنتدى الاجتماعي
وفشلت الفكرة تماما
فتم دمج كل المنتديات في منتدى واحد
وفي رأيي المتواضع حينما نكسب أكبر عدد من القراء
حينها يمكن أن يكون لكل ذوق منتداه الخاص


أتفق مع ما خطه أبو حراز أعلاه
فكرة المنتديات المنفصلة لا تساعد في إثراء المنتدى بالحوار اللازم
لذا من الأفضل دمج المنتديات مع بعضها البعض
وأعتذر كثيراً عن الغياب وانشاء الله معاكم في الفترة الجاية
تحياتي يا باشمهندس بكري