لكي لا ننسى أناشيد للشهداء AFIF ISMAEL

لكي لا ننسى أناشيد للشهداء



أبو العاص
إلي الشهيد معتصم حامد أبو القاسم
عفيف إسماعيل

طالب حق وحريه ومسالم
شهاباً ضوا ليل المظالم
سامق اسمو سما العوالم
معتصم حامد ابو القاسم

أبو العاص
عاش .. هاش وباش
ومرَ زي نسمة دعاش
أبو العاص
ما قال خلاص
ولا صابو يأس
أبو العاص
همو كل الاجناس
اهلو كل الناس
أبو العاص
ما براهو والناس معاهو
مابراهو والكل وراهو
للبكره الوليد نبراهو
للفجر الأكيد مسراهو..

سيره
إلي الشهيد عبد المنعم رحمه
عفيف إسماعيل


اسمو فيهو خايل رشمه وخنتيله
ود قبائل ما فد قبيله
سواي هوائل مو زول قليله
ابيض السرسره
اخدر طويل التيلة
من مدني السنى قلب الجزيرة
**
يا امو قولي جيد لى
ويا سعاد دا منعم ضى عيني
منو الزيو في الدساكر والصى
منو الزيو في البنادر والحى
مع كل طلة شمس منعم حى
**
انا شفت منعم ود رحمه
وكت الكوع حما
لا هاب لا انتنا
رايتوا للآفاق زحما
بدمو محننا
وريويحتو قدامو مفننا
وصوتو يلهلب في السما
عاش حزبي الما انحنا
وبفيدك بعمري يا شعب الملحمه


زنازين 114 مدني اكتوبر 2000




تراتيل
أو من سورة الفقراء
إلي الشهيد شيخ الخير

وجيهو لوحة في رسم
اغبش ومبتسم
مع واقعو منسجم
بصلواتو وديلكتيكو ملتزم
شيخ الخير الاسم
**
ونحنا في مسيدو حيران ومزاوريه
درسنا أسمي معاني السيرة الثورية
فاض وكال من دُررا النورانيه
عرج ومال للاشجان الغفارية
قال فيها بذور اشتراكيتنا السودانية
بالعرق بالشهداء بصدق النيه
ح نساوى الناس كالاسنان المشطيه
ونخط اساس
لا حراسه لا ترباس
همبريب ترتع منو الانفاس
أحلام بلا هلواس
الله اكبر علي الوسواس الخناس
علي الاميه ندق الجراس
في الضهرية قلم وكراس
في الضحوية منجل وتيراب وفاس
**
وجيهو لوحة في رسم
اغبش ومبتسم
مع واقعو منسجم
بصلواتو وديلكتيكو ملتزم
شيخ الخير الاسم
مسبحتو الما كضب ما بتفارق يدو
في جمعتو وايام الله السبع وعيدو
التقول ود تكتوك نديدو
ونحنا في مسيدو
بنراتيل صدي نشيدو
مدد عدد حروف قصيدو:
حي علي الفلاح
شهلنا الفلاح
سوينا الإصلاح
اتقاسمنا الغيمه والصباح
اتشاركنا المرعي والمراح
رجع لثكناتو السلاح
صد النازح لبطن بيتو ارتاح
طفا الشقا وولع المصباح
**
ح نبنيها من خيرا الوفير
نرويها بعرقنا المطير
نحميها من كل شر مستطير
بلدنا الما ليها مثيل
محميه براية ود الماظ عبد الفضيل
بدم القرشي بأرواح ثوار ابريل


زنازين 114 مدني اكتوبر 2000


أنشودة للشهيد محجوب سيد أحمد
عفيف إسماعيل

يا قاسم
ويا الشفيع
ويا علي الماحي السخي
قولوا مرحب حباب محجوب الخل الوفى
بشاشتو الآرسره للصغار أمان ودفى
ململم الجماعة في زمن الشتات والنفى
قدح الضيفان النورو ما بنطفى
لؤلؤة الزمان من كهرمان حزبنا مصطفى
محجوب
يا محجوب
ندهناك قبال ما الدنيا تبقى مدوره
والروح بعيده محلقة والجته مسوره
سيرتك عَرق ساساق في القلوب مصوره
طارينك خيوط متاهتنا اتشربكت ما عرفنا آخرا من اولا
صدى صوتك برن خِطوتِين لي قدام ما ترجعوا لي ورا
ما البندقية
ما البندقية
الديمقراطية هي حراسة السلام
ما الزندية
ما الزندية
تنمية ووحدة ح يرفرف تاني الحمام
ما الفردية
ما الفردية
عدالة إجتماعية وإحترام حقوق إنسان
ما الجهوية
ما الجهوية
المابشوف غير نفسو في المرايا مدان
حريه
حريه
هتاف الشهداء وخير الاوطان
يا على فضل
ويا منعم ود رحمه ود سلمان
ويا أبوبكر راسخ
لدمكم ما فى ديه وتب ما بنسامح
رايتنا الحمرا ضل جماعه وكان فضلت براها بتكافح.
القاهرة 2003







رسالة
إلي الشهيد ميرغني محمود النعمان

ضل ضحي عمرك فات عدا قبل الاوان
تاتيت ورا اترك يا صاحي في الزمن النعسان
شابيت كان اصلك يا عاشق الشموس والعنان
ورينا سر مطرك يا متيم بصقر الجديان
قلتا لشاهد قبرك الراقد تحتك حى ما فان
قالتا شايل خبرك يا ميرغني محمود االنعمان
وين شايل حقائبك
مابدر علي سفرك
ارقد تم نومك
ملحوق قطرك
محتوت منك خيرثمرك
تيراب احلام
بتفتق في الارض شتله تاوق لي قدام
ترياق هموم للجوه الارحام
وينسم دعاش روحك بين الغمام
فجة برق طلتك البهية وكتين سدل الضلام
ونرجس صباحي قال للدنيا سلام
وياني مرسالكم لمحمد عبد السلام.
زنازين 114 مدني اكتوبر 2000



سيف رمضان


اخدر نحيل
عبق المكان
فواح شاي اصيل
انفاسو هبهان
قرفه وزنجبيل
سيف رمضان
دغري وعديل
في عوج الأزمان
دخري واصيل
لا هاب لا هان
يعافر المستحيل
شان علاجا بالمجان
مريوق بطينة النيل
ضل التعبان
أجمل من جميل
سيف رمضان

غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبَّ
وعبَّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
ياما فرهد فى عيونك غصن أخضر
وفرحة أكبر من شجونك
والسلاسل يا جميلة
يوم ما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلَّ قيدك
فى غضبنا الحر ولافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة