سبق صحفي فريد من نوعه للحصاحيصا دوت كوم.. بالصور

تمكنت كاميرا دوت كوم ان تلتقط صورا لاضخم حدث سياحي في السودان وهو القرية السياحية العالمية والتي يجري فيها العمل وقد قارب نهايته وتعتبر مفخرة للشمالية ومحلية مروي..
القرية بها 20 فيلا سكنية كل فيلا تحتوي علي 8 غرف كاملة
محاطة بالمياه الجارية من ساقية
يوجد اضخم حوض سباحة
مشاتل
متاحف
صالات رياضية
قاعات اجتماعات
مطعم وكافتريات
ملاعب
منشاآت تحت الارض
والكثير
الصور التي تشاهدونها تعتبر بمثابة سبق صحفي لم تتمكن اي جه من التقاط هذه الصور

(( ما تكلموا زول))

مدخل القرية السياحية العالمية بمروي

قاعة اجتماعات كبري

مدخل المتحف تحرسه الكباش المقدسة

الساقية من ضمن وسائل الري بالقرية السياحية

انت في قرية مروي السياحية وليست هونولولو هل تصدق؟؟
فيلل طراز فريد

مطعم بمواصفات عالمية

القطاطي الفرعونية

ميادين ومظلات من جريد النخيل

بوابة الخروج

و ختامه جبنة

مع تحيات كاميرا دوت كوم التي نقلت اليكم هذا السبق
الي لقاء

الاخ حسن وراق برضو سبق صحفى فى الرد على الموضوع
دى ياتو مروى مروى فى شمال السودان ولا فى شمال المالديف ياريت لو تشوفو لينا الناس ديل يعملو لينا سد فى الحصاحيصا وياريت يكون فى توضيح اكترالاخ حسن القرية السياحية دى بتخص منو والغرض منها شنو

شكرا استاذانا وراق للصور الجميلة ومزيد من التقدم لبلادنا الحبيبة وشكرا مرة 2 علي الصور

الحمد لله ان السودان بيتطور شوية شوية ...

تشكر استاذ حسن علي الصور الفريدة والرائعة

شكرن الطيب
شكرن جبريل
شكرن بت امها
ع المرور الانيق
يا امجد العنقريب الهبابي بتاع القد((من الجلد)) مخدر الخفير بالنوم حتي تأتيك هذه الصور؟؟؟

بالله ياحسن الكلام دا فى السودان والله دى حاجة مشرفة جدا ولك التحية

يا عالم نحنا محتاجين للتنميه الاقتصاديه من زراعه وبترول ومعادن ....ثم ننظر بعد ذلك للسياحه القروش الاندفعت دي ما كان بتعمل مصنع اتخيل كم اسره حا تنتفع منو محتاجين للتنميه البشريه نشبع اولا ثم تاتي مثل هذه المشاريع...

الأخ/حسن وراق
كل سنة وانتم وكل متصفحي الحصاحيصا .كوم بألف خير وسلام
شكراً جزيلاً علي هذا السبق الصحفي/ الأعلامي/ الجميل ........
ولكننا ياصحبي لانري هذا (الجمال المفخخ) إلا من خلال (عدسة كاميرا) ازرق يمامة الشعب السوداني/ الراحل الجميل / محمد الحسن حسن سالم حميد طيب الله ثراه وذكراه .
القصيدة او الحلم كتيها الراحل قبل الشروع في تنفيذ(السد)بأكثر من 20 سنة
بين الموجة والخزان حلم انسان مهدلة لكل عشاق الجمال (الأنساني) وايضاً (للمنفصمين) بالمناظر والرؤي الجمالية الخادعة والتي لا تغيير ولا تقدم شكل ونمط حياة الأنسان البسيط في حياته ومعاشه اليومي
ودمتم/دمتن

بين الموجة والخزان حلم إنسان

هَرَدْتَ لهاتي بالغنوات ...
وقُتْ يبُردْ حَشَاك يا امِّي
ومن التّعب البلا صَالِحْ ..
تفيقي ..
تروقي ...
تنجمِّي
تسوِّي مكانسِكْ المطرة ..
تضوِّي البيت وتنحَمِّي
تمرقي صبوحة للجيران ...
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك ...
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب ...
تميد بالخُضرة منقسمي
ولا غابار .. ولا هو سحاب ..
وتنهجمي .. من الدّهشة
وتحاحيهُن ...
غناكُن نيي ...
غناكنُ نيي ..
غُنا الوهْمي
ويهتفوا زي كلاب الحي ..
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة .. بقت تشرب من الحامدابْ
تشربي عافيي من إيديّ ...
تدوِّي اليوية بي حِشْمي
تسوّي السّي .. وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني ..
هيلا هوب وقف ناهِضْ
ودكّ عمايد الفوقاني ...
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي ..
وارْمُلا من عصب عشّاق ..
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات ...
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ ..
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي ..
هيا انخلْقي ..
هيا انعتْقي ..
متين مو دايرة ري تسْقِي
ولا في إيد النّزيف نبقَى ...
ولا في إيد الخريف تبقِي
ولا الفيضان يبدِّع بِكْ ....
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي

فيا حزن البلد عوك كَرْ
ويا سعد الولد
ضَرْ ضَرْ ...
مع النّسْمِي
و ألِوْ .. قيمة العَمَل عِمِّي ..
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ ..
دَويها عَلَيْ ..
اذا ما اخر العلاج الكَيْ ...
مراويدِكْ حُمُر صَمِّي
مراويدِكْ حُمُر يا امِّي
بليلتي ... ولا ضبايح طَيْ ؟؟؟
قليلتي ... ولا كُتُر سِمِّي ؟؟؟
وطني ... ولا مِلي بطني !!!!
سُكَاتي .. ولا الكلام النيّ !!!