تيوسنا فرحانة وغنمنا زعلانة .. والسبب باسطة وكيس نايلون

بروفسير الفادني يستورد عدد 700 غنماية قبرصية وشامية

قبل قليل كنت بسمع في اخبار القناة السودانية مساء هذا اليوم 15/6/2010م.
وفي الفقرة الاقتصادية بشرنا المذيع باستيراد ديوان الزكاة لعدد 700 غنماية قبرصية شامية.
جا بروفسير الفادني بي نفسو وبي عضمة لسانو قال الغنم دي عندها ميزات عجيبة
بتعيش على النيل وبتاكل الأخضر ، وأنا فهمت إنـها ما بتاكل الألوان الزهرية والتركواز
وقال بتلد 4 "ون قو عِتان ولا سخيلات ما حدد " ، ومن شدة الحرفنة بتلد مرتين في السنة الواحدة
يعني 700 غنماية ضرب 8 بُطن ضرب 5 سنين = 28000 غنماية أو معزاوية قبرصية شامية
غايتو الله أدى التيوس بتاعتنا جاتا ليلة عسل غنم قبرصية شامية مش زي غنمنا المكعوجات ديل
يعني بعد وصول وفد أصحاب السعادة أغنام الفادني ما تستبعد تلقى تيس من عندنا يطاعن غنمنا
كيس نايلو والهوا شايلو
أها أكلن سمح
ويعيش مدير الزكاة
الجاب لينا قناة الضحى
وقسم قروش الزكاة على جمعيات المتحابات في الله
وختما بإسعاد التيوس وتحسين نسل الغنم
ولو الغنم ديل متقدرات وبنات ذوات ما تستبعد ان يتم شهر العسل في قبرص والشام

تيس العوائدة حالف اضبح تور يا عديله ليهو .ايوووووووووووووووى أبشر بالخير .
عاش الفادنى البسط العوائدى عاش عاش
اها ياغنمنا تانى اتقلن وقولوا دايرات تقرن الفادنية مرقن جابنو والفرح تيوسنا يفرح الغبش

يا المحبوب يا خوى .. ناس المغرب العربى بقولوا كل فوله خربانه عندها ديك اعور بنقدها ..
كدى استهدى بالله .. ده ما فول خربان ولا عايزين تيوسكم العّور ...!!

يا المحبوب ......... تيوسنا قالوا بقوا ينوموا و يدوا ضهرم للغنم ... بعدين تحسين نسل يعني بكرة أكون عندنا عتان وسخيلات شقر .... بس انشاء الله ينستروا التيوس ديل غنمنا ديل عاوزات يلدن في السنة خمسة مرات مش مرتين ...
بعدين يا معلم البجو من بره ديل كلهم أثبتوا فشلهم زي لعيبة الكورة المحترفين الجابوهم لينا وليداتنا أخيرهم منهم .
المهم لو طلعوا العتان والسخيلات شقر انت اول واحد يا المحبوب لما تشوف واحدهم منهم ح تقوا حلاتم.

الشكر الجزيل بروف الفادني
واظن بعد كدا مفروض تفكر لينا في التيران والديوك والحمير ووووووالخ

شكرا جزيلا لمروركم ..بدر المعارف ، ودكتور بكري ، وايمان الحاج ، وللصديق اللدود ابورائد
بالمناسبة يا ايمان موضوعك بتاع التيران شغالين فيهو وما تستبعدي عما قريب يصلن
مش كدة وبس ديل جايبين 50 ألف شاب من مصر الشقيقة لكن قالوا حا ينزلوهم في الجنوب
بالواضح الناس ديل دايرين يتخلصوا من اللون الداكن حتى لو كان لون غنماية داكن مادايرنو
بعد شوية الكلاب ويهجنوها من أوكرانيا ولا من الفلبين تجيكم الجيروات بيضا زي الارانب
لكن الكدائس محظوظة لونا ابيض ما محتاجا لتهجين إلا إذا ناس جمهورية الجبل الاسود دايرين يهجنوا كدائسهم ففي الحالة دي تاني تلقى صفوف الكدائيس قدام سفارة جمهورية الجبل الأسود
وبعداك الديوك الحمراء " يستوي الأعور والما أعور" والحصين والجمال والحمير الرمادية

والله انا شايفه السواد العندنا دا سواد اعظم ومااظن في فايده ترجي منو
عليه اقترح علي دكتور الفادني يعدل في مشروعو -ويعزل مننا الالوانهم فاتحه شويه (من كل الاصناف) ويصدرهم بره السودان يمكن الحاله تفرج شويه
ويخلي الاسود للاسود
الموافق يثني علي الاقتراح.