ناس حبسوا الانفاس في غانا .. وزول من وفد الحكومة قرب يفطس في يد إمرأة زعلانة

أم الجيش / الصورة "نقلاً عن سودانيزاولاين"

حكومة المؤتمر من أكتر الحكومات البتعمل مفاوضات
حامت الدنيا كلـها من طاولة مفاوضات لي طاولة مفاوضات
مافي بلد ما مشوا ليهو ولا ما جاهم منو زول
حائمين ساي تشوفم تحلف تقول فريق كورة
قبال كم يوم زحموا المطار معاهم ناس الفريق القومي
ديل كانوا ماشين غانا وديلك طبعاً مفاوضات
أها المشوا غانا وقفوها علي قنقرة ضنبا
ما ساوموا وما رخوا وما استكانوا
تغلبوا على كل الظروف وقبلوا بمنازلة الغانيين
دخلوا في ملعب بابا يارا في كوماسي زي الاسود
وعيونـهم شرارة على نقاط المباراة ولسان حالـهم
النقاط ام بحرا حما
فيك روحي وحبي النما
مابسيبا ان بقا في السما
ما بخلي الناس تقسما
روحي في ملعبك سايما
يا غرق يا جيت حازما
أعادوا للأمم السودانية هيبتـها بين الأمم الأفريقية
رجالة وجسارة وحمرة عين وبي قلب قوي
فكر متقد وحضور ذهني وجسامني منيع
أعادوا للأذهان ملاحم وفنون سنة سبعين
إرادة قوية وحركة دؤوبة لا تعرف السكون
العالم كلو يعاين والدهشة رفعت حواجب الصمت
تسعين دقيقة خلت قلوب السودانيين تنبض بحب خرافي
حب لهذا البلد الذي خُلق إنسانه في أحسن تقويم
وردده حكام السوء في خلال سنين حكمهم أسفل سافلين
نشوف ناس المفاوضات بين الحكومة وحركة التحرير والعدالة
صالات مكيفة ومقاعد وثيرة زينت بباقات الزهور والوردي
كلام كتير وجدل ومناقشات وكلو زول ما داير يتنازل للتاني
في القاعة جلس وفد الحكومة ووفد الحركة وجهاً لوجه
وفد الحكومة ضم واحد من أبناء دارفور يدعى عمر هارون
الراجل قالوا كان حاكم سابق لإحدى ولايات دارفور
كان متعنت لدرجة إستعصت على الوسطاء
لكن ما إستعصت على سيدة معروفة إسمـها أم الجيش
كانت ضمن وفد الحركة وجنـها وجن اللولوة
قالت ليهو يا زول شيف كلامك دا وأعدلا
قال ليها أنا حرمة ما بنسمع لي أحسن تسكتي لي
حمرت ليهو وقالت " والله كلامك دا أعوج وتوا تشيف "
إتوكلت على إيمانـها بقضيتـها العادلة
وصاحت بصوت طير المكرفون من قداما " أنا أم الجيش ما بنلعب والله إلا نشنقلك أسي "
وبالفعل نطت في الراجل وإشبحت فيهو وشنقلتو ومسكت في زمارة رقبتو لمن الراجل طقطق
الوسطاء وأعضاء الوفدين ماقدروا يرفعوها من الراجل
القاعة كلـها تكورك يا أم الجيش خلاص يا أم الجيش كفاية
ولولا العناية الإلهية الراجل كان فِطِس في يد أم الجيش لحق جياد أساموانا

(( رسالة : اسماعيل خاطر ...دخلت مفاوضات دارفور في مراحلها الاخيرة كما خططت لها الوساطة والقاضية الي الانتهاء من عمل لجان التفاوض قبل 17 الجاري توطئة لطرح الوثيقة النهائية للتوقيع عليها من طرفي التفاوض الحكومة السودانية من جهة وحركة التحرير والعدالة من جهة اخرى، وتميزت هذه الجولة بالبطء والتلكؤ من جانب الوفد الحكومي الذي يضم عدد من ابناء اقليم دارفور عرفوا بمواقفهم المتشددة تجاة القضية ، ويعتقد على نطاق واسع انهم سيقفون حجر عثرة امام اي محاولات لحل يدفع الي حل القضية بطريقة عادلة وشاملة ، وذكر عضو وفد حكومي يتهم على نطاق واسع بتدبير ارتكاب جرائم عنف واغتصاب في اقليم دارفور إنه قال" والله افضل ان تقطع يدي حتى لا اوقع على وثيقة تحوي تحقيق مطلب الاقليم الواحد لشعب دارفور"
وازدادت حدة المشادات الكلامية في جلسة امس بين ابناء دارفور من الطرف الحكومي الرافضة لتقديم اي تنازلات ووفد حركة التحرير والعدالة التي تصر علي ضرورة ايفاء استحقاقات اهل دارفور مما جعل سيدة من وفد الحركة تدعي ام الجيش تقوم بالاعتداء على السيد عمر هرون حتى اغمى عليه وهذا الاخيرعضو بارز في المؤتمر الوطني الحاكم وحاكم سابق لاحدى ولايات دارفور، ومعروف بمواقفة المتشددة الرافضة لتقديم اي تنازلات للحركات المسلحة في الدوحة.وقال عضو بارز في حركة التحرير والعدالة "على الحكومة اذا اردات تحقيق سلام حقيقي يجب اتخاذ قرارت صعبة "
وفي تعليق على المواقف المتعنتة لابناء دارفور في وفد الحكومة ..قال " هؤلاء المهمشين اخواننا لا يستطيعون اتخاذ اي قرارات " . مضيفا "ان مرحلة الديكور يجب تجاوزه بعد ان مثل هؤلاء دورهم خير تمثيل" )) نقلاً عن الراكوبة

طبعاً القصة ما انتهت على كدا فالراجل أخد الشنقلة وقام وإتنفض زي الماحاصل حاجة
ومرة مرة يعاين في "أم الجيش" ولمن يلقى العين الحمراء يتراجع ويتشاغل بأوراق مزجية أمامه
لكن الجماعة أصحاب الزول الشنقلو زي بقت ليهم حارة ككيف يعني نتشنلق من العويل دا ضيم ما بنقبلا
لكن راجل ساكت قدر يفتح خشمو مافي فالمرأة زي الأسد وبينت بالفعل بأنـها لوقعدت فيك الجيش مابرفعا
وفي جلسة أمس حسب "الراكوبة" غضب اسماعيل رحمة مسئول ملف السلطة بحركة التحرير والعدالة
والسبب حسب كلامو ان ابناء دارفور من الطرف الحكومي متعنتين بلا سبب معقول
بل سخر منهم وقال " انكم بمثابة ساعي البريد بيننا وبين اسيادكم في الخرطوم "
هذه العبارة إستفزت السيد صافي النور وهو من اعضاء الوفد الحكومي في ملف السطة
والصافي معروف بمواقفه الرافضة لتقديم أي تنازلات في شان الاقليم الموحد ويذكر انه قال ذات مرة :
" والله افضل ان تقطع يدي من ان اوقع على وثيقة تحمل الاقليم الموحد لاهل دارفور"
أها الصافي حرقتو كونهم يكونوا سعاة بريد زي ما قال رحمة اسماعيل
قام الصافي شال قزازة الموية القدامو وفناها في رحمة
القزازة كانت فاتحة ومن شدة الزعل الصافي فناها بالقلبة
الموية بي صمتا إنكبت ليهو في هدومو
فخرج الوفد الخرطومي مغلوب اتنين صفر شنقلة وقزازة موية
ووفد الحركة طلع يغني ياعميل يا مبلل .........

التفاوض بإسم الحكومة يقتضي ناس على مستوى عالي من المسئولية والحكمة والرحابة
ناس المؤتمر دائماً بكونوا عند سوء الظن بهم وتعاملوا مع المفاوضات بالقول المأثور عندنا في السودان
"العين سيد أو القرنتية بدقوها بي جلدا " فأوفدوا مفاوضيهم أو ممثليهم من عضويتهم من دارفور
وبدلاً من التحلي بالأعراف الدبلوماسية وبرتكولاتها وما تقتضيه طبيعة المهام في الدولة الراعية للتفاوض
طفق ممثلو الحكومة في التهاتر والملاعنة لدرجة صعب إحتمالها كما في حالة "أم الجيش"
وبدلاً من الوقوف على أسباب الحادثة وإرسال مفاوضين آخرين لإعتبارات الهيبة والكرامة
نشرت الصحف اليوم تصريحاً منسوب للدكتور عمر أحمد آدم رحمة المتحدث الرسمي للوفد الحكومي"الراكوبة"
حيث أفاد بأن الذي حدث هو ان لجنة التفاوض في ملف النازحين فوجئت بإمرأة تدخل إلى قاعة الاجتماع
وأنـها أي "أم الجيش" قامت بسحب المقعد الذي يجلس به رئيس الجانب الحكومي مما تسبب في سقوطه على ظهره
وأوضح بأن الوفد الحكومي تقدم بشكوى رسمية للوساطة حول هذا المسلك الذي وصفه بالهمجي لإتخاذ ما يلزم
يعني الراجل ما شنقلتو أم الجيش بس سحبت منه الكرسي !! دا كلام دا؟؟
طيب لمن المراة دي قامت وجات جنب كرسيهو ما يقوم قاعد لي شنو رابطنو على الكرسي ؟؟

(( ......نفى الدكتور عمر أحمد آدم رحمة المتحدث الرسمي للوفد الحكومي ما ورد بوسائل الإعلام حول اشتباكات بالأيدي بالمفاوضات وقال إن الذي حدث هو ان لجنة التفاوض في ملف النازحين فوجئت بإمرأة تدخل إلى قاعة الاجتماع وتقوم بسحب المقعد الذي يجلس به رئيس الجانب الحكومي مما تسبب في سقوطه على ظهره وقد سارعت المذكورة بالخروج من القاعة، موضحاً أن الوفد الحكومي تقدم بشكوى رسمية للوساطة حول هذا المسلك الذي وصفه بالهمجي لإتخاذ ما يلزم ويمنع تكرار مثل هذه السلوكيات. )). الراكوبا الكترونويك