اللجنة ، ممنوع دخول النساء والذين لا يدينون بدين الحق!!

تداعى القوم لأول إجتماع للجنة الخدمات التي تم تكوينـها في حي الضِفاف ، إنعقد الإجتماع بإحدى غرف الدراسة "سنة تامنة" بمدرسة المنهجين "أساس" ، وتكوين اللجنة جاء بعد عناء وعسر ، وذلك لحدة الخلاف ، وشدة الإستقطاب بين أعضاء الجمعية العمومية ، وبقدرة قادر أحد ، تم الإتفاق على 12 عضو يشكلون فيما بينهم اللجنة الأساسية ، واللجان الفرعية ، وتلك التي ستنبثق منـها ، وفي بداية الإجتماع ، أمن شيخ الحي عبد الغفار الجنيد ( وهو من الرعيل الأول لمزارعي مشروع الجزيرة ، وقد أجمع عليه سكان الضِفاف للإشراف على تكوين المكتب التنفيذي للجنة ) أمن على ضرورة الإلتزام بمقررات النظام الأساسي ، والعمل يداً واحدة للرقي بإنسان الضِفاف ورفعة شأنه ، والإهتمام بقضايا المنطقة ككل ، كما أمن على ضرورة نبذ الشقاق ، والإستهداء بالقيم ، والمفاهيم الديموقراطية والإسترشاد بمناهجها ، وبعد ذلك عرض الشيخ على الحاضرين كشفاً بأسماء أعضاء اللجنة وقد كانوا كما يلي :

حسنين بابكر عبد الحفيظ.
النور اسماعيل فضل المولى.
محمد عثمان تاج السر.
وداعة الله ابراهيم عبد الباقي.
شول ميانق اوقستينو.
قرشي أحمد جاه الرسول.
متولي عباس النور.
نفيسة عمر عبد الواحد.
حسن الصادق عبد الكريم.
وليد تاج الدين الزبير.
كمال عبد الرحيم .
سليمان أحمد حمد النيل.

وشرع الشيخ في تجهيز الأوراق الخاصة بإنتخاب المكتب التنفيذي من بين الأعضاء الحاضرين ، ممنياً نفسه بإكمال مهمته التي تتعثر مع شروق كل شمس ، وبعد تلاوته للأسماء أشار على الحاضرين بأن يتم ترشيح ثلاثة أشخاص من بينـهم جميعاً ، ليكون أحد هؤلاء الأشخاص رئيساً للجنة ، والثاني سكرتيراً ومقرراً ، وليضطلع الثالث بأمانة المال.

إبتدر الترشيحات المقدم شرطة معاش حسن الصادق (وهو أحد ضحايا الصالح العام)
" بسم الله الرحمن الرحيم ، أرشح النور اسماعيل فضل المولى لرئاسة اللجنة ، والسيد سليمان أحمد حمد النيل للسكرتارية ، والسيد محمد عثمان تاج السر لأمانة المال ، وشكراً جزيلاً".

ووقف وداعة الله ( مغترب عاد نهائيا بعد 17 سنة قضاها في اليمن ) وقال " بسم الله الرحمن الرحيم ..." وقبل أن يُكمل حديثه قاطعه شيخ عبد الغفار " وداعة الله عليك الرسول أمرق أبزغ السفة دي برة وتعال" ، وتبرم وداعة الله قليلاً ، إلا انه إتجه صوب الشباك المجاور له ، وتخلص من السفة وعاد سريعاً وقال " ... ومن جانبي أُرشح حسنين بابكر عبد الحفيظ للرئاسة ، ووليد تاج الدين الزبير للسكرتارية ، وقرشي أحمد جاه الرسول لأمانة المال ، وشكراً جزيلاً لإتاحتكم لنا هذه الفرصة التي ان دلت على شي انما تدل ".

ولما أُتيحت الفرصة لكمال عبد الرحيم ( وهو نقابي متمرس ويعتبر من أول الضحايا لخصخصة الهيئة القومية للكهرباء " قال " ياجماعة والله أنا برشح السيد متولي عباس النور للرئاسة والسيدة نفيسة عمر للسكرتارية والسيد كمال عبد الرحيم لأمانة المال".
فقاطعه حسنين ( ملياردير وتاجر إسبيرات مشهور عمل سابقاً بالنقل الميكانيكي ) وقال:
" هوي يا ود عبد الرحيم إن بقيت مًصِر على ترشيح ست نفيسة للسكرتارية ....أنا علي الطلاق ما بقبل أكون عضو في لجنة تكون مقررتا مرا ...إتا الله ما ليك ولا شنو ؟؟"
وتكفل بالرد عليه محمد عثمان تاج السر الموظف بإدارة المحاكم فقال له:
" حسنين آخوي كلامك دا أعوج بلحيل ، وكمان بخالف الدستور والنظام الأساسي للجنة ".
وعندها هاج حسنين وبصوت جهير قال:
" يخالف الدستور ولا يخالف الطنبرة دا ما شغلي ، باللهِ سيبنا من كلامك الكُبار كُبار دا ".
" طيب لو كلامي كُبار كُبار إتا مابيهو لي شنو ؟"
"يا راجل إختشي أسي إتا منفوخ زي شوال الكِبِس كدي ... تدافع ليك علي ترشيح مرا ؟؟ ".
"ياخي المرا البتتكلم عنـها دي دكتورة صيدلانية إتخرجت من سنة 68 ، وأسي دخلت اللجنة بأصوات أكتر من الأصوات اللتحصلت عليـها إنتا ، وما من حقك تحرما من حقـها ".
"هوي هوي يا محمد عثمان أنا المرا أسي ما سعلتـها ، وكلامي قلتو لي كمال ود عبد الرحيم إتا الدخلك شنو؟"
" ياخي أنا عضو زي زيك كمان برضو عايز تقطعني النمة ؟".

هنا تدخل شيخ عبد الغفار موجهاً حديثه للحاضرين " يا جماعة إستهدوا بالله الموضوع محلول ، ونحن عندنا ضوابط ، وبنحتكم لقانون ، بعدين اللجنة دي ما قالوا للرجال فقط ، ولا للنساء فقط ، يعني للرجال والنساء ، وما من حق أي عضو أن يُميز بين الأعضاء على أي أساس كان هذا التمييز ، وأي كلام عن الحجر على أي بني آدم ببقى كلام غير إنساني وما مقبول ، والقوانين دي ما مكتوبة عشان نتفرج عليـها ، يا جماعة دي مكتوبة عشان نطبقا على كل كبيرة وصغيرة في حياتنا ، ولذلك فإنني لا أجد سبباً لإعتراض العضو المحترم على ترشيح السيدة نفيسة طالما منحها الدستور والنظام هذا الحق " .

ونواصل بس بي مهلة

وأضاف شيخ عبد الغفار " دي الوقت عندنا للرئاسة :
النور اسماعيل فضل المولى.
وحسنين بابكر عبد الحفيظ .
ومتولي عباس النور .
وللسكرتارية عندنا :
سليمان أحمد حمد النيل.
ونفيسة عمر عبد الواحد.
وقرشي أحمد جاه الرسول.
ولامانة المال عندنا :
محمد عثمان تاج السر.
وكمال عبد الرحيم .
ووليد تاج الدين الزبير.
في أي زول عندو إضافة ؟".

" نعم يا شيخنا أنا والله ظروف عملي ما بتسمح لي بتولي منصب تنفيذي في اللجنة ، وأرجو من الأخ حسن الصادق أن يختار مرشح آخر " قالها سليمان أحمد حمد النيل معتذراً ، وتقبل حسن الصادق الأمر وقام بترشيح شول ميانق اوقستينو ( وهو معلم لغة إنجليزية لأكثر من 25 عام في مدرسة الضِفاف الثانوية ) ، إلا ان حسنين وللمرة الثانية شب معترضاً " يعني يا حسن مالقيت ليك زول غير شول دا ؟ إتا عارفوا مسيحي ولا ما عارفو ؟؟".

" والله البعرفوا إنو مواطن قاعد في الضفاف دي ليهو عشرمية سنة .. بعدين تعال أنا مالي ومال دينو ما عيسى بي دينو وموسى بي دينو " قالـها حسن الصادق وقبل أن يكمل قاطعه حسنين " يازول كدي خليني من كلام المواطنة والديقراطية والمنهجية والسمفونية اللابسمن ولا بغني من جوع دا ..نحن دينا ما بسمح لينا نتكل امرنا لكافر ..بقولا عديل ... شول دا يختانا كدي كدي ، داير يتولى خدمتنا يجدع الصليب دا ويجي " ، وتصدى له محمد عثمان مرة أخرى " والله يا حسنين حيرتنا .. دين شنو البتتكلم عنو ؟؟ والدين دا كان وين أيام النقل الميكانيكي ... كان وين لمن كنت بتبيع في إسبيرات عربيات مؤسسات الدولة ؟؟ ... دين بخليك يا حسنين تلجن عربية زي الطلقة وتبيعا في الدفاتر ملجنة وتستلم حقها بسعر السوق وتدخل الفرق في جيبك دا لو كان الدين البتقصدوا فهدا طرفنا منو".

ثارت ثورة حسنين وصاح " يا جماعة خليكم شاهدين .. والله كلامك دا إلا أبلعك ليهو .. وتشوف براك لو ما وريتك ليهو .. كمان جابت ليـها إتهامات .. اما دا كلام تاني ... شوف دا بالله " ، وقبل أن يكمل وعيده عالجه محمد عثمان " يا حسنين كلامك دا قولو لي زول ما عندو جريدة رسمية .. فهمت ولا أشرح ليك .. وياخوي إتا أكت بديتو نحن بنتموا ليك والزارعنا غير الله اللجي يقلعنا .. أحسن ليك تلم نفسك .. والشلشقة والفوجاج الفي الفاضي ما في داعي ليهن "

ونواصل بي مهل

وتبرم وداعة الله ، وطلب فرصة للرد على ما أثاره محمد عثمان في تعقيبه على حسنين " واللهِ حقيقةً يجماعة حسنين كلامو صاح ، ونحن ما ضد أن تتولى إمرأة أو كافر شأناً من شئون دنيانا ، لكن حقيقةً لو دا بتعارض مع توجهاتنا الحضارية حقو نقيف شوية ولا كلامي دا شنو ليكم .. أخونا حسنين لمن إعترض على ترشيح السيدة نفيسة وشول كان مُحِق ، أولاً : لأنه جاء في الحديث ((لايفلح قوم ولوا أمرهم إمرأة)).

وواصل " وبالنسبة للأخ شول فهو حقيقةً لايدين بدين الحق ، وبشأنـهم فقد قال تعالى في سورة التوبة الآية 29 (( قَاتِلُواْ الَّذِينَ لاَ يُؤْمِنُونَ بِاللّهِ وَلاَ بِالْيَوْمِ الآخِرِ وَلاَ يُحَرِّمُونَ مَا حَرَّمَ اللّهُ وَرَسُولُهُ وَلاَ يَدِينُونَ دِينَ الْحَقِّ مِنَ الَّذِينَ أُوتُواْ الْكِتَابَ حَتَّى يُعْطُواْ الْجِزْيَةَ عَن يَدٍ وَهُمْ صَاغِرُونَ )) ، والأخ محمد عثمان كان مفروض يضع كل تلك الأحكام في إعتباره قبل ما يتهجم على الراجل ساكت ، ولذلك فإنني أرى أن يتم سحب ترشيح السيدة نفيسة والأخ شول ، والاعتذار للأخ حسنين عشان ما نبقى في قضايا رد شرف وغيره ، ودي حاجات نحن في غنى عنها حقيقةًً " ، فتململ حسنين في مقعده وقد خلصته خطبة وداعة الله شرور اللجاجة.

وعلى الرغم من كل هذه الجلبة ، فقد إلتزمت السيدة نفيسة الصمت ، وهي تسرح بخيالـها بعيداً ، ولم يعدها للحضور إلا فرقعة أصابع شول الذي يجلس بالقرب منـها ، حينما طلب فرصة للرد على ما أثاره حسنين ووداعة الله بشأن ترشيح نفيسة وشول ، وأشار عليه شيخ عبد الغفار بالتحدث ، وقال بلغتة الدارجية المحببة " أولاً أنا بحي شيخ عبد الغفار على صبره وسعة صدره في إدارة هذا الإجتماع ، وفي الواقع لم أتفاجأ بما طرحه ويطرحه العضوان المحترمان وداعة الله وحسنين ، فدا كلام سمعناه كتير ، وكنت بتمنى تناوله بعيداً عن الشخوص ، فالمسألة يا محمد عثمان أخوي مش قرمشة إسبيرات وبلع عربات ملجنة وبس ، ولا إستعراض لخطب أئمة وداعة الله في البلد القعد فيهو 17 سنة".

وأضاف " فالموضوع متعلق بنهج إنتهازي ساد ويسود منذ فترة ليست هينة ولا شوية ، إستغل فيه بعض الأشخاص الدين لتحقيق مقاصد سياسية ، ودا موضوع كبير حا نقاشو فيما بعد لو لقينا فرصة مناسبة ، والمشكلة ليست في ذلك ، إنما في ثقافة إزدراء الدساتير والقوانين ، وبغض النظر عن صحة أوعدم صحة الحجج التي ساقـها وداعة الله لتدعيم حجة حسنين ، إلا أن المتدبر للأمر يلاحظ بأن وداعة الله يريد أن يحكمنا بالكلام الفي راسو هو ، متسانداً على الأحاديث الشريفة والقرآن الكريم ، وأنا ما بصدد مناقشة حجته من هذا الجانب ، ببساطة لان كلامو في هذا الجانب مردود عليه ، وليه ما سأل لماذا لم يتم تقنين الفهم دا في الدستور والقانون المعمول بـهما الآن ؟؟ فالدستور ينص على أن المواطنة هي أساس الحقوق وليس خلاف ذلك ، بل أن الدستور أشار بوضوح للمواثيق الدولية وإعتبرها جزء منه ، وعلى رأسها حقوق الإنسان ، وما يثير العجب والدهشة في وقت واحد ، كيف ينص الدستور على حقوق ويتمشدق الناس بما يخالف ذلك ؟؟.

وأضاف " ومن جانب آخر ، فأنا بفتكر بأننا أمام حالة بتاعة إذدواجية غريبة جداً ، فالدستور المكتوب الإطلع عليه العالم كلو تضمن قيم يتمظهر فيـها البعد الإنساني بشكل كبير ، وفي نفس الوقت تجد الدولة ومؤسساتـها بعيدة كل البعد عن تلك القيم والمفاهيم ، وعشان ما تقولو أنا بنظر شوفو المحاكمات الأخيرة اللتمت لعدد من الصحفين والذين تم إقتيادهم لمكاتب الأمن ، وتعرضوا فيـها لتعذيب فوق لإحتمال أي بشر ، بل تمت محاكمتـهم على آراء مكتوبة ومنشورة في صحف ، وكان نصيبهم السجن ، وعلقات ساخنة من رجالات الأمن البواسل ..".
وقبل أن يكمل حديثه ، قاطعه حسنين متهكماً " ياخوي ما توفر كلامك وتقولوا في قناة تلفزيزنية كان أحسن ليك .. فنحن مالنا ومال القانون والدستور والكلام الفاضي دا ... ياخي دي لجنة خدمية دائر تستمر فيـها أجدع الصليب الدارعوا في رقبتك دا وتعال ، ولا أختانا غادي غادي" ، وضحك شول وقال " أها دي حالة أخرى من حالات الإزدراء ، لكن جايين عليـها بس ألزم الصبر يا حسنين وما تضيق ، إتا من الصباح تلعلع أنا ما قاطعتك ...".

نواصل على مهل وراشد الجاك لك التحية ، وشكراً على المتابعة وخليك قريب

أخذ شول نفساً عميقاً وواصل تعقيبه على إعتراض حسنين " وبالنسبة لإعتراضه على ترشيحي ! فإنني أرى بأن حسنين ما زال يمارس هواياته في التزييف ، واللعب على الدقون وبـها أيضاً ، وأعتقد بأننا نستمد كافة حقوقنا من قانون ونظام مش من مخيلة متقوقعة في أضابير كتب الفقهاء وأدعياء الدين ، وأنا ما داير أتكلم في الجانب دا كتير ، لكن لو كان حسنين جاد فيما يقول ، فلماذا دعم الاسقف الإترشح في الخرطوم جنوب ؟ ولا فقط صليبي أنا الفندر الريكة .. .. أنا بتفق مع أخونا حسنين بأن اللجنة خدمية ، طيب شنو الجديد في تقديم الخدمات ؟؟ ما هي الخدمات نفسـها التي درجنا ــ مسلم وغير مسلم ــ على تقديمـها منذ عشرات السنين ، ولم يكن من شروط تقديمـها أن تكون لابس حجاب ، يخوانا الحكاية مش حكاية صليب ولا حجبات ، كل ما في الأمر اننا بنحاول نعزل قطاعات كبيرة من المواطنين ، ومعاملتـهم معاملة غير كريمة وغير إنسانية ، ولو كان دا كان مقبول في مراحل تاريخية معينة شكلتـها ظروف كثيرة ومتداخلة ، وعملت على تكريسـها عوامل إقتصادية ، وعوامل مرتبطة بالجهل وعدم الوعي ، دون أن ننسى المطامع الإستعمارية ، فمن غير المقبول وبعد كل هذه الخطوات التي خطتـها البشرية تجاه التقدم والرقي والكرامة ، أن نرتد لعهود الظلم ، والعبودية ، والتجهيل ، والإستبداد".
وواصل شول تعقيبه ".. أما بشأن إعتراضه على ترشيح الست نفيسه ، فإننا كان مفروض نسأل أخونا حسنين عن السبب البخليهو يعترض على ترشيخ أخت نفيسة ، يعني الفهم شنو ، هل لأنـها إمرأة ، ولذلك بِعتقد بأنـها لا تقوى على العمل في اللجان !! ، أعتقد بأنه ما إتوفق أبداً في ذلك ، فالمرأة اليوم تبوأت أعلى المناصب ، بعد أن كافحت وناضلت من أجل حريتـها وحقـها في التعبير والعمل والانتخاب ، الكلام دا مش على مستوى الوطن المأزوم دا ، بل على مستوى العالم كلو ، وأخونا حسنين ــ بي شنيباتو الزي شنيبات الكديس ديل ــ ما يخت في راسو بأنو أحسن من مطلق إمرأة ..." وحينـها قاطعه حسنين ".. يازول ما تحترم نفسك ... والله كترتو ومسختو ... وأحسن ليك تعدل كلامك ...أنا من قبيل ساكت ليك ما تقول خائف منك .. باقي لي إنفصالك مننا 5 شهور أحسن تعديهن بي ادب فصلك بلا يخمك " ولم يعره شول إهتماماً وواصل في حديثه ".. دا كلام عهدو إنتهى أو شارف على الإنتهاء ، وكنت أتمنى أن يكون أكثر وضوحاً ويورينا منطلقاته الفكرية البتخليهو يعترض على ترشيح إمرأة عملت في الحقل الطبي لأكثر من 30 سنة ، وإكتسبت مهارات عالية جداً في التعامل مع الناس ، ومع مشغولياتـها الأسرية والعملية إلا انـها إرتأت أن تقدم نفسها للعمل العام ، وين المشكلة في ذلك.. عشان كدا أنا بصر على أن نتجاوز الأصوات النشاز ، ونمضي في طريق تكوين المكتب التنفيذي دون أي تمييز بسبب دين ، أو جنس أو خلافه..طالما إحتكمنا للقانون .. بعدين يا حسنين موضوع الانفصال دا خليهو لي وقتو ... وقول فصلتنا نحن أها مراة دا بتسوي ليهو شنو ؟؟ يعني سيك سيك معلق فيك .. ".