معروف بأن مجلس الوزراء مكون من 77 وزير ووزير دولة "بسم الله ماشاء الله" ، العين الحاسدة ما تعاين ليهم ، معزولين عزل رجال علي نسوان ، الحمد لله ليهم كم شهر شغالين في التظبيطات بتاعة الوزرات بتاعتم ، الوزارة العندها مباني ومواقع أمرها ما كان فيهو صعوبة ، بس المشكلة كانت في الوزرات المستحدثة ، والحمد لله الجماعة باصروها بي جاي وبي جاي وحلوا المشكلة ، الوزرات المتشابهة قعدوها مع بعض ، فالفيلا الكانت مستأجرة لوزارة التجارة والتموين قعدوا فيها وزير التعاون الدولي ، ووزير النفط ، وناس التعليم العالي والبحث العلمي والعلوم والتكنولوجيا والرعاية والضمان الاجتماعي قعدوهم مع وزير التربية والتعليم العام ، وناس الري والموارد المائية ، والكهرباء والسدود ، ديل كلهم قعدوهم مع بعض كل وزير في غرفة ، وناس المعادن ، والآثار والسياحة والحياة البرية ، والبيئة والغابات والتنمية العمرانية ، والطرق والجسور ديل كلهم مع بعض ، وطبعاً دا كلو بعدما عملوا بارتيشنات عشان مدير مكتب الوزير والسكرتارية ، وعشان الأمكنة ضيقة اللافتات كمان كتبوها بخط صغير لو ما دققت كويس ممكن توش تدخل على وزير الكهرباء والسدود ياطقتك كهرباء ولا غرقت ليك في سد ، بس المشكلة كانت في وزيرة الشئون البرلمانية الأستاذة حليمة حسب الله النعيم ، إقترحوا عليها ناس الري والسدود أو ناس التعاون الدولي فرفضت وحلفت ما تلاصق ليها راجل ، والمحاولات جارية عشان يبنوا ليها وزارة وقالت إن شاء الله غرفتين معكوسات بي برندات بتقعد فيهن لكن تقعد ليها في مجمع وزرات زي بيت العذابة مستحيل.
ولحدي الآن فالأمر مقدور عليهو ، لكن حا تواجهنا مشكلة تانية ، عندما يتم تعيين المجالس الاستشارية للوزراء ، فوزير التربية والتعليم الدكتور فرح مصطفي عبد الله ، أصدر قرار أول أمس بتشكيل المجلس الاستشاري للوزارة، والذي يضم عددا من الوزراء ويتألف من (65) عضوا ، وفق الخبر المنشور في الصحافة بتاريخ اليوم 20/9/2010م ، وعلى ما يبدو فإن هذا المجلس ضروري جداً عشان الوزير يقدر يمشي الوزارة ، ويقدر يقوم بتقويم أداء الوزارة في ضوء الخطط المجازة ، وتقديم الرأي والمشورة للوزير خاصة فيما يتعلق بالسياسات والبرامج والخطط التي تقع تحت دائرة اختصاص الوزارة ، بجانب تقديم المبادرات التي من شأنها ترقية الاداء ورفع قدرات الكادر البشري.
وحا يقوم المجلس الاستشاري لوزير التربية والتعليم بوضع لائحة داخلية لتنظيم اعماله واجتماعاته. ويضم المجلس، وزير التربية والتعليم، فرح مصطفى رئيسا، وزير الدولة بوزارة التربية والتعليم العام، سعاد عبد الرازق رئيسا مناوبا، وزير الصحة عبد الله تية، وزير تنمية الموارد البشرية كمال عبد اللطيف، وزير الثقافة السموأل خلف الله، وزير الدولة بالتعليم العالي خميس كجو كندة، احمد كرمنو احمد، رئيس لجنة التربية والتعليم بالمجلس الوطني، وزير التربية والتعليم بولاية الخرطوم، وكيل وزارة الاعلام، وكيل وزارة التعاون الدولي، رئيس مجمع الفقه الاسلامي.
فإذا كان المجلس الاستشاري لوزارة التربية ضم 65 نفر فما بالكم بالمجالس الاستشارية لعدد 77 وزير ، والمشكلة في التداخل ، يعني ممكن تكون وزير النفط وتكون عضو في المجلس الاستشاري بتاع وزارة الضمان الاجتماعي ، غايتو أنا لو كنت رئيس للوزراء حا أقسم إجتماعات الخلوق دي على أيام الاسبوع زي سوق رفاعة وتمبول زمان ، مثلاً إجتماع المجلس الاستشاري للوزارات العندها علاقة بالموية زي الري والسدود والكهرباء يكون السبت ، ويوم الاحد تجتمع المجالس الاستشارية الخاصة بالوزارات العندها علاقة بالمالية والضرائب والزكاة والاتاوات والمكوس والجبايات ، ويوم الاتنين يجتمعوا ناس العلاقات العامة والخارجية وناس وزارة العلاقات الدولية ، ويوم التلاتاء المقدم الله يجتمعوا ناس العدل والداخلية وهكذا ، غير كدا والله الناس ديل بطقوهم بي عين ساكت تعدمن طافي النار
موضوع: ياناس قولوا بسم الله .. داك الليلة ما عينتوا ليكم 77 وزير تاني ال 65 لزومن شنو 
الإثنين 20 سبتمبر 2010 - 10:46
