كان في خريج منتظر ليهو وظيفة من الصندوق دا الرمادة في خشمو

من بين الصناديق المفكوكة ساي ،،
إطرشنا ما سمعنا بي صندوق قومي لتشغيل الخريجين ،،
أكان اليوم في جريدة الرأي العام ،،
وكمان قالوا فيهو عاملين ،،
وأكيد بكونوا من غير الخريجين ،،
وعندو أمين عام جديد يدعى د. قرشي بخاري صلاح ،،
عينوه بدل الأمين العام السابق المهندس علي دقاش ،،
الصندوق عندو رؤية وخطط عامة وأهداف ،،
لكن الأمين الجديد قال عندو رؤية جديدة حقتو هو ،،
جمع العاملين في الصندوق وشرح ليهم رؤيته الجديدة ،،
وحسب الشرح فالرؤية الجديدة ما جات ساي ،،
أصلو الصندوق لقوا ليهو وزارة يضموه ليها الحمد لله ،،
وزارة الموارد البشرية العملوها بعد الانتخابات الأخيرة،،
وبدل ما يكون صندوق مهم زي دا مفكوك ساي ،،
قالوا يعملوا ليهو وزارة تلمو من البهدلة والجرجرة ،،
عشان ما يبقى ليهم زي الخريجين يجرجروا من وزارة لي وزارة ،،
يعني تاني ما بتلقى ليك صندوق حائم بي سفنجة ،،
وبيني وبينكم صندوق الخريجين دا بالذات إتبهدل كتير ،،
من التسعينات وهو لاف ساي بي سفنجتو لا وزارة لا مشغلة ،،
الأمين الجديد شرح للعاملين أهداف مشروع الصندوق ،،
ومنها تشغيل الخريجين وتأهيلهم ،،
والبحث عن فرص أكبر .. مش وظائف ،،
لا لا .. لتحقيق الموارد الاضافية وجلب الاستثمارات ،،
الموارد طبعاً للصندوق عشان يمش يكوس الوظائف ،،
الإستثمارات برضو مهمة ما شفتوها في صندوق الزكاة ،،
عمارات ودكاكين ومخابز وعربات كلو عشان منو ،،
ما عشان فائدة الناس الشغالين في الزكاة ،،
طيب أها ما الموضوع كلو كواسه وفتيش كان للزكاة كان للوظائف ،،
الأمين القديم " كتر خيرو برضو ما قصر والله ،،
قدم تنوير عن مسيرة مشروع تشغيل الخريجين منذ 1998م ،،
وعدد المراحل التي مر بـها المشروع ،،
واهتمامه بقضايا تشغيل الخريجين ،،
كقضايا أقيمت لها ورش العمل وقدمت فيـها أوراق علمية ،،
وورانا كيف بتم تمويل مشروعات الخريجين ،،
وتدريبهم للاستفادة من طاقاتـهم في المشروعات القومية ،،
وفي نـهاية الإجتماع هناهم على الأمين الجديد ،،
وعلى ضم الصندوق لوزارة الموارد البشرية ،،
وتمنى ليهم أن تتحقق أهداف تشغيل الخريجين الإستثمارية ،،
وما نسى يوريهم بأنو هو ذاتو منقول للوزارة ذاتا ،،
والحمد لله البقى عندنا وزارة للهوامل البشرية ،،
عينت لينا أمين صندوق تشغيل الخريجين السابق ،،
وضمت الصندوق "في رقبتو" للوزارة ،،
وكان في خريج منتظر ليهو وظيفة من الصناديق دي الرمادة في خشمو ،،

عقد د. قرشي بخاري صلاح الامين العام للصندوق القومي لتشغيل الخريجين لقاءً موسعا مع العاملين بالصندوق استعرض فيه الرؤية الجديدة والخطط العامة لأهداف الصندوق في المرحلة المقبلة ، بحضور الامين العام السابق المهندس علي دقاش الذي انتقل للعمل في وظيفة قيادية بوزارة تنمية الموارد البشرية.
واستعرض د. قرشي رؤيته للعمل خلال الفترة القادمة بصندوق تشغيل الخريجين ، وذلك في ظل التحولات الجديدة بالمشروع وانضمامه الى وزارة تنمية الموارد البشرية، مؤكدا على اهتمام الوزارة بقضية تشغيل الخريجين وتأهيلهم بالبحث عن فرص أكبر لتحقيق الموارد الاضافية وجلب الاستثمارات.
من جانبه قدم الامين العام السابق للمشروع المهندس علي دقاش تنويرا حول مسيرة مشروع تشغيل الخريجين منذ العام 1998 ، معددا المراحل التي مر بها المشروع واهتمامه بقضايا تشغيل الخريجين وتمويل مشروعاتهم وتدريبهم للاستفادة من طاقاتهم في المشروعات القومية.
واشار المهندس دقاش إلى ان انضمام د. بخاري الى مسيرة صندوق تشغيل الخريجين تعتبر اضافة حقيقة ، مؤكدا ان الصندوق يدخل بذلك مرحلة جديدة بانضمامه لوزارة تنمية الموارد البشرية، مثمنا على دور الوزير كمال عبداللطيف واهتمامه بقضايا تشغيل الخريجين وتدريبهم ورفع قدراتهم وتأهيلهم للدخول في سوق العمل. ورحب دقاش بالامين الجديد للصندوق متنميا له التوفيق في سبيل تحقيق الاهداف العامة لتشغيل الخريجين.