يا ناس الحصاحيصا .. القاعدين ليها شنو ؟؟ لا ترجوا خيرا منهم!!

الأستاذ وراق يبدو أن لكل شيء في السودان ثمن إلا الانسان ...
السودان أصبح طارد وطارد جداً ... وهذا قدرنا ..
لا يوجد استقرار في أي شيء لا العملة لا الاسعار لا الجبايات ...
السودان اسعاره اسعار المطارات بلا خدمات ولا مسببات ..
استمحيك عذراً يإضافة هذا المقال (المنقول) ..

ساخر سبيل‏

الفاتح جبرا

لمستقر لها

دخل السيد المدير العام للهيئة القومية للجبايات إلى مكتبه وهو ممسك بحزمة من صحف ذلك الصباح وهو يرغى ويزبد ويصيح :

- معقوله؟ خمسة وأربعين يوم وجباية جديده واحده مافى؟ زمانك فى الأسبوع بنطلع للناس جبايتين هسه شهررر ونص ولا جباية ... (ثم يمسك بسماعة التلفون بعصبية مخاطباً سكرتارية مكتبه) :

- يا سفيان أتصل ليا فى الدكتور (عبدالمنتقم) دلوقتى .. أيواا عبدالمنتقم مستشار الهيئة لأبتكار الجبايات

لم يمض وقت طويل حتى إتصل (سفيان) على السيد المدير العام يخبره بوصول دكتور (عبدالنتقم) والذى ما أن خطا إلى داخل المكتب حتى بادره المدير العام صائحاً :

معقوله بس البيحصل ده؟ معقول ؟

(فى إستغراب) : فى شنو سعادتك؟

(فى تهكم) : كمان بتسأل فى شنو؟ خمسة وأربعين يوم وأنا أتابع فى الجرائد دى أقول ألاقى المواطنين بيشتكو من جباية جديده ما ألاقى ليا ولا مواطن بيشتكى؟ معقوله خمسة وأربعين يوم مربعين إيدينكم وقاعدين ساااكت ..؟

لكن سعادتك أصلو فى الحقيقه يعنى ...

(مقاطعاً) : لا أصلو لا فصلو لا فى الحقيقه ... إنتو الظاهر نائمين فى العسل ... إنتو ما عارفين الربط بتاعنا (جبايتين) فى الاسبوع؟ إنتو عاوزين المواطنين ديل (ينعنشو؟ ) !

أنحنا سعادتك أصلو الظاهر قمنا بإبتكار كل الجبايات الممكنة !

قمتو بأيه؟ هم ديل يا دوبك 7678 جبايه !

سعادتك والله أنحنا أبتكرنا للناس ديل جنس جبايات ما أنزل الله بها من سلطان .. شئ دمغة غريق .. وشئ رسوم إقامة صيوان عزاء .. وشئ رسوم عدم إقامة حفل ... وشئ رسوم لافتة محل ... وشئ رسوم قدوم .. وشئ رسوم مغادرة .. وشئ رسوم نفايات .. وشئ رسوم هنايات و شئ ..

(مقاطعاً) : يا عزيزى إنت الدكتوراة بتاعتك دى عاملا فى الأكاديمية العليا لعلوم الجبايات فى (ماليزيا) ح تقيف ليا عاجز وتقول ليا خلاص ما قادر !

والله سعادتك قدر ما نحتنا مخنا خلاص ما قدرنا .. أى جباية نفكر نعملا نلاقى إننا عملناها !!

(فى حده) : أنا أصلو ما ممكن أقتنع إنو زول عالم ذيك كده معينو يكون نضب وبنات أفكارو طفشو والعلم الإبتكارى الفى راسو كلو (طش) وما قادر يبتكر لينا ولا جباية !

أنا بفتكر سعادتك نحنا نعمل إجتماع موسع لكل المسئولين فى كل أقسام الهيئة ونطلب منهم إنو يفكرو معانا إحتمال نلاقى عندهم أفكار جديدة !

فى الإجتماع :

المدير العام : بسم الله الرحمن الرحيم .. )وقل اعملوا فسيرى الله عملكم ورسوله والمؤمنون( صدق الله العظيم .. الحقيقة يا جماعه انا دعيتكم للإجتماع ده ومعاى أخونا الدكتور (عبدالمنتقم) عشان نناقش موضوع الجبايات الجديده الواقفة دى ! أخونا (منتقم) بيقول خلاص ما قادرين فى مستشارية الإبتكار يبتكروا لينا ولا جباية واااحده عشان كده قلنا نستعين بيكم وكده !

- (المنتقم) : أنا يا جماعه بصفتى مستشار الهيئة دى لشئون الإبتكار أعلن وأعترف ليكم بأننا خلاص أستنفذنا كل الإبتكارات الفى راسنا وعاوز منكم تساعدونا وتفكروا معانا فى كم جباية جديده كده نحصل بيها (العيد) ! وعاوز أقول ليكم إنو أنا إتفقت مع السيد المدير العام بأنو أصحاب الإقتراحات المبتكرة الفائزة نديهم 10% من الإيراد بتاع الجباية كحافز !!

- (بصوت واحد) : الله أكبر الله أكبر !

- يلا كل واحد منكم يمشى ينحت راسو ويفكر ليهو فى جباية نديها للمواطن … هو المواطن ده طوالى نشيل منو … نشيل منو …. مره واحده ما نديهو حاجه؟؟ ونجتمع بكرة فى نفس المواعيد دى عشان نشوف الإقتراحات بتاعتكم !



بكرة فى نفس المواعيد :

- عضو (1) : والله أنا الجباية الفكرت فيها إنو نلزم جميع المواطنين بطلاء أبواب محلاتهم بأى لون نحددو ليهم هسه ما عدا اللون (الأخضر) الموجود هسه ده .. يعنى مثلا اللون (الأصفر) …

- (عبدالمنتقم متسائلاً ) : طيب والجباية وين هنا؟؟؟- عضو (1) : الحقيقة يا سعاده المستشار الجباية دى جباية غير مباشرة- ً يعنى شنو غير مباشرة؟؟- يعنى ما بنشيلا من المواطن قروش كاش- (مقاطعاً) : برضو ما فاهمين وضح لينا- أنا بقصد يا سعادتك نقول ليهم إنو يضربو محلاتهم بوهية صفراء بعدما نكون قفلنا باب إستيراد البوهية الصفراء وإشترينا الفى السوق كلو والباقى طبعاً معروف!!- لكن براءة الإبتكار دى مش مسجلة بإسم الزول الزمان جاب البوهية (الخضراء)؟؟؟

-( المدير العام) : كلام عبدالمنتقم ده صاح .. ما تدخلونا فى حتت ضيقة (براءة فكرة البوهية) دى حقت الزول العارفنو داك هو هسع بره الصورة لكين مين عارف بكرة يرجع يكون مسؤول ويعمل لينا سين وجيم ويقول داير حقو ؟؟؟؟- (عبدالمنتقم) : نشوف إقتراح تانى ! أيوه العضو هناك !

- عضو (2) : والله أنا إقتراحى بيقول نعمل رسوم على جرس الباب يعنى أى زول عامل ليهو جرس فى باب بيتو وإلا الشقة بتاعتو يدفع عليهو رسوم - مواصلاً- أنا بفتكر يا جماعة دى جباية مبتكرة فعلا وإلا شنو؟؟- صوت 1 : طيب لو الجرس ما شغال ؟؟- (عضو (2) فى بساطة : مش المفتاح بتاعو فى؟؟؟ يبقى عليهو رسوم- صوت 2 : أها نعمل ليهم الرسوم كم ؟؟- عضو (2) : والله هو طالما المواطن ده عندو جرس يبقى قادر وطالما قادر حقو الرسوم تكون معتبرة –مواصلا- يعنى هسع البرك والمستنقعات والشوارع الزى الما زفت دى نصلحها ليهم بشنو؟؟؟- صوت 3 : أنا بقترح عشرة ألف ؟-(عضو (2) : فى السنة؟؟- صوت 3 : سنت شنو … فى الشهر .. وعشان الواحد فيهم ما يعمل تفتيحه علينا نقوم نعملا ليهم كمان مع فاتورة الموية !

- عضو (2) : وكمان نعمل لينا نيابة متخصصة للجباية دى نسميها (نيابة رسوم جرس الباب) تكون مهمتها النظر فى حالات الناس الما بدفعو وعليهم متأخرات !

- المدير العام : رأئك شنو يا دكتور عبدالمنتقم فى الجباية دى !

- عبدالمنتقم : والله أنا بفتكر إنو دى جباية غير مبتكرة وتعبانه

- (عضو (2) : ليه يا سعاده المستشار ؟ كدى عيبا ليا !

- عبدالمنتقم : ببساطه ممكن المواطنين عشان ما يدفعو الجباية دى أى زول يطلع جرس الباب بتاعو ويخلص !!

- المدير العام : طيب إنت معقول بس يا سعاده المستشار ما تكون فكرت ليكا فى جباية مبتكرة ؟

- عبدالمنتقم : والله أنا فكرت فى رسوم بتاعت (تدفئة ونور) !

- صوت : يعنى ح تدخلو ليهم (غاز) للبيوت وتدفئة وكده ؟

- عبدالمنتقم : غاز أيه يا استاذ ؟ هو أنحنا قاعدين نرش ليهم الباعوض عشان كمان ندخل ليهم غاز ؟

- صوت : مال تدفئة ونور دى شنو؟؟

- عبدالمنتقم : أيواا أشرح ليكم ... هسه لو الشمس دى مافى كان ح يكون فى ضؤ؟

- (الجميع) : طبعن لا !

- عبدالمنتقم : مش الناس دى كان مشت إشترت ليها كهرباء بى قروش عشان تنور؟

- (الجميع) : أكيد كان مشوا إشترو

- عبدالمنتقم : طيب مش (الشمس) دى قاااعده وبتطلع ليهم كل يوم ؟

- (الجميع) : أيوااا

- عبدالمنتقم : طيب القروش الكان الناس ح يمشوا يشتروا بيها كهرباء وين؟

- ما عند الناس فى جيوبهم ! ما دفعوها !

- عبدالمنتقم : خلاص يدفعوها لينا نحنا (رسوم ضؤ) خليكم كمان من إنهم قاعدين (يتدفوا) مجانن وملح ساااكت فى الشتاء !

- المدير العام : الله يجازى محنك يا دكتور والله إنت فعلاً دكتوراة فى إبتكار الجبايات !

- صوت : لكن يا دكتور ما وريتنا هسه الجباية دى نشيلا منهم كيف ؟ يعنى فى العربات الترخيص رسومو بالموديل والنفايات بى نوع المنزل والكهرباء (بالفيس) والموية بدرجه نوع الحى أها (الشمش) دى نشيلا منهم كيف؟

- عبدالمنتقم : دى عاوزه ليها كلام يا جماعة؟ ما بالمتر المربع !

- صوت : كيفن يا دكتور ؟ أشرح لينا

- عبدالمنتقثم : يا جماعة دى ما دايرة ليها شرح ! نشوف السطح المستفاد منو فى ضؤ واشعه الشمس ونحاسب المواطن عليهو ! يعنى لو بيتك مثلاً 300 متر مربع والمتر المربع بى جنيه تكون رسومك 300 جنيه !

- صوت : ح نشيلا من البيوت بس يعنى ؟

- عبدالمنتقم : بيوت شنو يا استاذ؟ هو الشمس (بتاعتنا) دى بتشع على البيوت بس ؟ نحنا بنقول أى سطح تشع عليهو الشمس سيدو يدفع عليهو رسوم وأقتكر الكلام ده مفهوووووم !

- لا يعنى يا دكتور هسه مثلن العربات نشيل منها !

- دى عاوزه ليها كلام نشوف مساحت سقف العربية وطوالى نضرب فى سعر المتر المربع

- ولكن مع العربات الكتييييرة دى نتحصلا كيفن ؟

- يا أستاذ ده سؤال تسألو ؟ هى كيمياء ؟ ما بس نختها مع الترخيص ذيها ذى دمغت الجريح ودمغت الشهيد وصندوق دعم الطلاب وصندوق الدعم الصحى وهلم جراً

حاج عبدالفضيل :

أمام منزل الحاج (عبدالفضيل) وقف شاب (يعلق) على كتفه شنطه جلدية سوداء ويمسك بدفتر وقلم .. يفتح (حاج عبد الفضيل) الباب

- اهلن مرحب يا بنى

- أهلن يا حاج ..

- إنت بتاع شنو؟ نحنا أمبارح القريبه دى دفعنا النفايات والعوائد والمويه و ...

- لكن يا حاج ما اظنك دفعت رسوم (تدفئة وضؤ) عشان دى رسوم جديده

- (فى إستغراب) : رسوم شنوووو؟

- مالك يا حاج مستغرب كده ؟ دى رسوم (تدفئة وضؤ) ! ما سمعت بيها ؟

- طبعن يا إبنى ما سمعت بيها هو نحنا نسمع بى شنو وإلا شنو ما خلاص ما قادرين نلاحق الرسوم والجبايات دى !

- (يخرج من جيبه القلم ويمسك بالدفتر) : قلت ليا يا حاج بيتكم ده مساحتو كم؟

- مالك ومالو كمان؟ عاوز بى مساحتو شنو؟ عاوز تطلع ليهو كروكى !

- كيف يا حاج عاوز بى مساحتو شنو؟ ما عشان نضرب ليك الرسوم بتاعتك بتاعت (تدفئة وضؤ) دى !

- (فى إندهاش) : والله محن ! أها وبتضربوها كيف دى ؟

- ما حسب مساحة السطح المتلقى لأشعة ضؤ الشمس يا حاج وكده وفى الحاله دى السطح هو طبعن بيتك !

- يا إبنى إنت عاوز تجننى؟ أشعة أيه؟ وسطح مين؟ ومساحت شنو؟

- يا حاج أهدأ شويه عشان افهمك الموضوع لو ما عارفو

- طبعن ما عارفو ؟ هو نحنا بقينا نعرف حاجه ما كل دقيقة ناطى لينا زول شايل ليهو دفتر إيصالات وعاوز قروش ... هى الحكومة دى قايلانا (وارثين) ؟!

- شوف يا حاج الرسوم دى إسمها رسوم (تدفئة وضؤ) يعنى المواطن عشان يتدفا بالشمش دى وكمان يشوف بالضؤ بتاعا لازم يدفع رسوم ! يعنى إنت يا حاج عاوز تدفأ وتشوف ملح ساااكت !

- ملح فى عينك يا ود يا قليل الادب ! هى الشمش دى بتاعت زووول ؟

- يا حاج ما تهيج فينى ساااكت أنا زول عبدالمأمور ساااكت ونحنا شركتنا دى إسمها (تتحصلون) يعنى بتاعت تحصيل يعنى ما عندنا أى دخل فى مسألة فرض الرسوم دى !

- ومال الشركة العاملة (الفلم) دى إسمها شنو ؟

- إسمها يا حاج (لمستقر لها) !

- (فى دهشة) : قلت ليا إسمها شنو؟

- لمستقررررن لها !

- لا حولتن ولا قوتن إلا بالللاهى ... بالله هى حصلت كمان ! أها و (مستقرها) وين؟ أقصد مبانيها وين؟

- هى ثالث عمارة على إيدك اليمين فى شارع حنزب إبن عكرمة المقاطع لشارع عياض إبن الأرط مقابل بقالة أم القرى –المقاصدة مخبز- تستهبلون



فى الشركة :

-عاوز أقابل الزول المسئول فى الشركة دى

- شفت الممر داك.. أمشي عديل تأني لف شمال تأني لف يمين أول مكتب يقابلك دا مكتب المديرالعام ،وبالفعل بعد أن قام (حاج عبدالفضيل) بمتابعة (الوصف) وجد نفسه وجها لوجه امام مكتب (المدير العام لشركة لمستقر لها) !!



دلف (حاج عبدالفضيل) الى مكتب المدير العام .. المكتب فسيح .. التكييف مركزى .. تتدلى من حيطانة ستائر ايطالية بينما غطيت أرضيته بالسجاد الإيرانى .. به طقم جلوس (أمريكى) فاخر وقاعة إجتماعات أنيقة من الخشب (المصقول اللامع) .. أمامها مكتب نصف دائرى يجلس عليه السيد المدير بوجه لامع تبدو عليه أثار النعمة و(الراحات) و(التكييف طويل المدى)- السلام عليكم- وعليكم السلام ورحمة الله تعالى وبركاته إتفضل- مشيراً الى أحد كراسى الجلوس الوثيرة ، جلس (حاج عبدالفضيل) ثم قال مخاطبا السيد المدير :- السلام عليكم

- وعليكم السلاااام

- (مبتسماً) إتفضل- الحقيقة بس يعنى جانى فى البيت ولد كده وقال ليا الشمش وما الشمش والضؤ وما الضؤ وتدفع رسوم وشنو ما بعرف داااك والمساحه فى الإرتفاع فى السطح وما عارف شنو فقلت اجى أستفسر منكم وكده !

- أول حاجه يا حاج مرحب بيك .. وإن شاء الله الجية بتاعتك دى تكون فى ميزان حسناتك .. !!

- يابنى ميزان حسناتى ميزان (لساتكى) أنا عاوز أعرف رسوم (التدفئة والضؤ) دى شنو؟ إنتو ما بتشبعو من أكل أموال الناس !

- يا حاج ما تزعل ساااكت .. كدى جاوبنى براااحه يا حاج وبدون إنفعال ... الشمس دى بتاعت منو ؟

- بتاعت ربنا !

- طيب ما نحنا بتوع ربنا ... تبقى الشمش دى بتاعت منو مش بتاعتنا ! وقع ليك يا حاج وألا أعيدو ليك ! بعدين يا حاج حقو رسوم (التدفئة والضؤ) دى ما تستكترا علينا لأنو الشركة بتاعت (لمستقر لها) دى هى شركة بر وإحسان وشركه خيرية لرعاية المسنين ولكفالة الايتام!

- (وهو يتجه نحو الباب) : أيتام .... أيتام أكتر مننا ؟

تحصيل :

إنتشر فى الشوارع أشخاص يرتدون زيأً أصفر فاقع اللون رسم على صدره شعار شركة (لمستقر لها) وهو شمس حمراء ذات خيوط شعاعية ، مهمتهم تحصيل رسوم (تدفئة وضؤ) ، أصبح المواطنون يتخوفون من السير فى الشوارع تحت أشعه الشمس مخافة أن تطالهم الرسوم فتراهم يسيرون تحت (الضلله) تكدس الناس وإزدحموا تحت ظلال (العمارات) والمحال التجارية والممرات خوفا من المتحصلين

- (وهو يخرج الدفتر ويمسك بالقلم) : بالله يا خينا لو سمحت

- فى شنو؟

- فى شنو كيف ؟ الشمس الضاربه فى (صنقورك) دى ما شايفا؟

- وما تضرب إنت سيدا؟

- أنا ما سيدا لكن ستها إسمها (لمستقرن لها) ! وبالله ما تلاوينا ساااكت أدفع خلينا نشوف غيرك !

- أدفع ليكم كم كده يعنى؟

- (ينظر إلى رأسه متمعناً ) : كدى أقعد فى اشلله دى ورينا راسك ده خلينا نضرب ليك رسومك !

- (يستخرج متر من جيبه ويبدأ القياس ) : طيب المحيط فى نصف القطر على باى نق تربيع .. طيب إذن المساحه تساوى مية وخمسين سنتى متر مربع والسنتى بى عشرة قروش نكون عاوزين منك كده جنيه ونص !!

فى الطيارات :

وقف (هاشم) العائد إلى مقر عمله بالرياض أمام موظف الخطوط بالمطار وقام بتسليمه تذكرة السفر بعد أن قام بوضع (العفش) على الميزان ، نظر الموظف إلى التذكرة ثم طلب من (هاشم) الذهاب إلى (كاونتر) رسوم المغادرة لدفعها

خمسة وأربعين جنيه !

ليه رسوم المغادرة مش 30 جنيه بس ؟

هى فعلن 30 جنيه

طيب الخمسطاشر دى شنو؟

دى رسوم (تدفئة وضؤ) ! وأحمد ربنا إنك مسافر بى بوينج 737 وما مسافر بى أيربص كنت دفعتا 75 جنيه !

لو سمحت بس فهمنى يعنى الفرق شنو !

أيواا .. ذى ما أظنك تكون يا استاذ عارف إنو رسوم (تدفئة وضؤ) دى بتتاخد على أساس السطح المستقبل لأشعه الشمس المستفيد منها المواطن !

طيب أها وبعدين

أها أنحنا كنا قاعدين نشيل 5 جنيه من كل راكب لكن الظاهر المسئولين العملو الرسوم دى ناس بيخافو الله لأنو فى طيارات صغيرة وطيارات متوسطه وطيارات كبيره وقالو المسأله كده ما فيها عداله

وبعدين !

وبعدين قاموا قاسو أسطح الطيارات بى مختلف أحجامها بالمليمتر عشان ما يظلمو ليهم زول وجابو لينا الجدول ده فيهو كا نوع طيارة والرسوم المفروض يدفعا الراكب !

وبعدين !

(ينظر للجدول) : وبعدين إنت بوينج 737 رسومك يا أستاذ 45 جنيه ولو عاوز حاجه أقل أمشى شوف ليك (فوكرز) سافر بيها

عبدالفضيل تااانى :

بعد حوالى شهر وبينما كان حاج عبدالفضيل يستلقى على العنقريب فى مساء ذلك اليوم مطفئاً لمبة (الحوش) مستمتعا بضؤ القمر الفضى وهو يضع الراديو الترانزيستور على صدرة يستمع إلى أحدى المحطات العالمية إذا بخبطات على الباب :

قوم يا حاج شوف الجاييينا نص الليل ده منو؟

يتجه حاج عبدالفضيل نحو الباب ، يفتحه يفاجأ بشاب تدلى من كتفه شنطة سوداء ويمسك بقلم :

ده بيت الحاج عبدالفضيل عمر

أيوه فى شنو ؟

معاك شركة ( قدرناه منازل )

الاستاذ حسن وراق لك التحيه غبت من الحصاحيصا عشره سنوات جلست بالحساب واحد وعشرون يوما وعدت يوم
31/10/2010 وجدت تقدم كبير في المدينه ووجدت مايفرح ومايحزن الكبري والساقيه المعلقه والمباني الجميله والناس الطيبين من الزمن الجميل ووجدت حزنا يخيم علي المحالج اصبحت كانها مدينة اشباح بعد ان كانت تعج ليلا ونهارا وجدت الشوارع في الاحياء كانك تركب مرجيحه الحصاحيصا محتاجه لجهودكبيره وحتي شارع فور السوق كلو محفر واتمني اتن تجد الاهتمام الذي يليق بها

وراق كتب:-
انظروا معي الرسوم والجبايات الاتية والتي ارتبطت بعهد المعتمد العاشر :
1) الرسوم علي السياجات
2) رسوم المغادرة علي البصات والمركبات السفرية
3) رخص الاطباء لمزاولة العمل
4) الرسوم المبالغة 1590 جنيه (( يدفعها الفكهاني الواحد )) للفكهنجية و(عددهم يقارب المائة )نظير اقامة مظلة واحدة تجمعهم علما بان تكلفة الانشاء في غاية المبالغة 590 جنيه ام الالف جنيه الاخري ( مليون قديم ) ويدفعا الفكاني الواحد تذهب حلال بلال للمحلية والتي يعوذها الذوق والبعد الجمالي في الانشاءات ( انظروا مجمع الرواكيب للاقمشة ) المحلية استطاعت في لحظة مراكمة اكثر من مائة مليون جنيه والظلم الكبير انها هددت الفكهنجية ان العرض لمدة ثلاثة ايام فقط ومن يتاخر يفقد حقه وعليه اخلاء مكانه السابق ( ميتة وخراب ديار ) واليوم الفكهنجية في الحصاحيصا لا يعملون انه حقيقا قطع ارزاق وكان يمكن ان تتم العملية دون هذه الاضهاد والسخف وسوء الادارة .
كما طالب اخونا وراق بالمواجهة ولا اظنه يقصد الصدام لان ليس لنا فى الحصاحيصا غابة نحتمى بها وهذا ليس بفكره او تفكيره فهو مقاتل با لكلمة ولا يوارى فيها وهو على ما اعتقد يقصد بالمواجهة ان يدلوا الناس بدلوهم ويقترحوا ما هو الحل لهذا الذى يحدث ولماذا تستباح محلية الكويت وهو ياامل بان نبين لهم ان الحصا حيصا لها وجيع .
ادلوا انا بما اراه حل من ما اقتبسته من بوسته المنشور فى هذا الاسفير حول الرسوم فى عهد المعتمد الحالى.
1- رسوم السياجات يمتنع المخالفين من الدفع بازالة المخالفة وهذا اضعف الايمان
2-رسوم المغادرة اهل مكة ادرى بشعابها رسوم المغادرة تدفع نظير خدمات تقدم لا صحاب البصات والحافلات وعلى ما اظن لهم نقابة (اصحاب الحافلات والبصات السفرية) وهى فى الميناء البرى بالخرطوم تؤخذ نظير الخدمات التى تقدم لهم وهى تبادل مصالح بين الطرفين لا ناقة لنا فيها ولا جمل فالتزكرة فى البصات تفوق 10 جنيه وكان فيها وجبة وبارد للمسافر على رحلاتها سحبت من المسافر من غير توضيح ولم تخفض قبمة التزكرة فى الاعياد يبدعون ويفرضون قيمة عالية فى التزكرة مستغلين ظروف المواطن والحوجة للسفر لاهله لذلك ليس لنا ان نقف معهم ونواجه المحلية فى هذا السبب
3- رخصة مزولة العمل فى العيادات الخاصة للاطباء ليضا لا يهمنا كثيرا ما يهمنا فقط ان يسجلوا حضورا دائما فى المستشفى وان يقوموا بعملهم بما يرضى الله خلال الساعات التى ياخذون فيها الاجر من الدولة وان يتعاملوا مع المريض من ابناء المحلية بكل انسانية واعطائه العلاج والاستماع لشكواه من الالم وان لا يبخلوا عليه بالكشف والتشخيص بدقة.
4- بخصوص الفكهنجية اصحاب الطبالى المزرية الذين يجأورون ذلك النصب الكوشى العظيم جوار الشارع الرئيسى ومحطة وقود شل يعرضون بضاعتهم وهى ملوثة للمواطن بالكيروسين من عوادم الركشات ومن الغبار والبصاق وذباب الكوشة (النصب التزكارى)للمدينة فلا عزاء لهم فطالما يستطيعون ان يدفعوا 1590 جنيه لماذا لا يؤجروون داخل السوق الكبير او فى اسواق الاحياء لعرض بضاعتهم بشكل صحى ولا سيما ان الاسواق تعج بالدكاكين الخالية التى تشكو من عدم المؤجرين وهى باسعار زهيدة ويمكن ان يشترك فى ايجارها 2 او 3 اشخاص وبالتالى يسقطون للمحلية جبايتها المفروضة.
اخى ورقة الامر لا يحتاج لصرخة داوية انما يحتاج لتوعية سلسة وتنوير لعقول هولاء الفكاهنجية والى تحويل قرار المحلية فى ازالة المخالافات الى امر دائم لتحديث وتجميل الحصاحيصا وان نزيل من افكار المسئولين بان الامر ليس جبايات لتسيير محليتهم بالفوضى واسهل الحلول لملئ خزانتهم الحصاحيصا تحتاج لابنائها الواعية والواصلة لتترفع عن الزاتية والانطلاق لتقديم كل ما هو جميل لها ولا سيما نحن كويت السودان كما يقولون من ايردات وان نوظف الايرادات لخدمة البلد وليس جيوب البعض.
اامل ان يكون رأئى جزء من الحل فى هذا البوست وان لا نصرخ ونحن نخشى على ازيالنا