الغاء تبويب المنتديات وابداله بمنبر عام واحد .. فكرة عبد الوهاب احمد صالح

اطرح رؤيه جديده فى الغاء تبويب المنتديات واقترح ان يكون منبر عام واحد املا فى اثراء المنتدى والفكره مطروحه للنقاش وهى تحتمل التاييد والحذف والاضافه ..!!!

اؤيد الفكرة ...
حقو يا عبدالوهاب الزول يستغل الفراغ الدستورى ويعمل العايزو .. ومفيش حد احسن من حد!!!

تحياتى د.بكرى
الاشواق والامانى بكل ما جميل وخير لك ولافراد الاسره الكريمه . تجدنى فى غاية السرور بسبب قد لا يراه الاخرين هذه الايام ، رغم الاحتقان الشديد الذى ساد المنتدى لكن يبدو اننا نعيش حالة تحول (وبطبيعة الاشياء ) نحو الافضل وهذه جدلية التطور ، يخرج الجديد من رحم القديم ويرتقى نحو الافضل . ودى حاله ثوريه ان جاز التعبير وحالة طفره اجتماعيه واهم مظاهرها فى كمية التسامح التى تبدو هنا وهناك وكثافة الاقتراحات لتطوير المنتدى . نرجو ان يستمر الحوار وحتما سنصل للافضل ودمت .

الاخ بكري
انت قايل نفسك براك كدا الدايرو تعملو.. كدي جرب لو مالقيت دباباتنا علي مشارف هامبورج تضحك علي!!
فكرة منتدي واحد اعتقد كانت فكرة قديمة تطرقنا لها من قبل وانا كنت من اكثر المؤيدين لها ولكن هنالك بعض الفوائد لهذا الشكل منها كتابة الجميع في منتدي واحد اي موضوع بالاضافة الي ان المشاركات تندرج بدون تصنيف ولكن هنالك بعض السلبيات خاصة وان الموقع بلا مشرفين حيث تقتضي الحالة بعد مرور عام تبويب وتصنيف المشاركات الي ابواب فرعية مثلا دراسات / مقالات /الخ ..
وجود منتدي واحد لا يتناسب مع مواقع المدن والمناطق لخصوصية المواضيع التي تطرحها وبمرور الوقت سوف تتراكم المساهمات ويصعب البحث بالطرق التقليدية حيث هنالك مواضيع اجتماعية وفيات زواج تهاني وغيرها تحتاج لتبويب ليسهل ايجادها بالاضافة الي منتديات مثل المكتبة والتوثيق تحتاج لتبويب منفصل يحصر المساهمات والبوستات فيها واضف الي ذلك يمكن تقليل المنتديات بضم المنتدي الديني والاستراحة وحتي الرياضي والصحي والاسري فغقط الابقاء علي الجانب الاجتماعي والمكتبة والتوثيق لانها متخصصة وتسهيل لعمل الادمنت المنفرد وتائه بادارة الموقع ..
نسمع منكم !!

يعنى مدرسة والمشاغبين ولعبة امبراطور المننتدى ومطارحت الاغانى واية قرانية وبوستات التعازى وبوستات التهانى والموضيع الجادة المطروحة للنقاش وبتهم المدينة كلها تكون فى منتدى واحد
ماعتقد

يا دكتور القرار الجاهوري دا رقمو كم
دايرين نستانفوا قبال ما تستفوا
والله حدنا معاكم لاهاي
او حتى هاييتي

إنتو اليومين ديل في شنو بالضبط ؟

أري أن التقسيم الحالي جيد و لا غبار عليه.. ضغط المنتديات يجعل بعض المواضيع لا تأخذ حظها من النقاش.
و دمتم

يادكتور ما تنتظر لحدي يناير ، اليومين ديل في ضيوف نازلين معانا ، رسلن لينا اوباما وقال لازم نكرمن ، المهم والله ما قصرنا معاهم والحمد لله الرغيف راقد واللحم راقد والكسرة بي رماد وشيها "فضلة خيرك" ، وكيف ما نكرمن ديل جايبين معاهم تلاتة محترفين جون كيري ورايس وقرايشن ، لكن مما جو يهرجوا زعلانين وكمان ينهروا في ناس نواب الرئيس ، وقدر ما يجو في محل تلقى وراهم ناس تانيين غلاد غلاد لابسين نظارات سوداء ساكتين ساي ، وناس الحكومة قلبهم من الخوف والزعر طائر ، والطيب مصطفى طلع الجوكر ، غايتو الجماعة مضايقين ضيق شديد ، ومن شدة الضيق هديلك فارشين ليهم فروة جلد ناموسة ومتعاصرين فيها ، أها إمكن بعد نرجع الضيوف ديل ونركبن في لوري لانور ولا بوري ، كل زول مننا يسو ليهو موقع براو ، ونريحك من المناتلة دي. رايك شنو وما تسمع كلام الجاهوري أسي يجيك ينطط يقول ليك دا تلج ولا دا فسيخ

يا جماعة خلونا نعمل استفتاء ( لا للوحدة نعم للانفصال ) والعكس صحيح

1- تبويب وتصنيف المنتديات هي تطور تم إفرازه مراعاةً للقدرات الفردية والميول وإتجاهات العضوية ، فالسلال المختلفة للبيض تُوفر لآكله نكهات مختلفة ، عليه أن يختار منها ما يتناسب مع ذوقه وميوله .
2- التبويب والتصنيف للمواد المتجانسة يُوفر الوقت والجهد في تصفح وإسترجاع retrieve المادة المطلوبة للمتصفح .
3- المنتديات ذات الخصائص المتشابهة مثل (الصحي +الأسري) يُمكن دمجها تحت مسمي واحد فالصحة وجوهها متعددة تبدأ من التربية (الصحة النفسية) وتشمل المطبخ (الغذاء ونوعيته )، وبأختلال هذه الوجوه تحضُر الصحة العلاجية .

يا دكتور خلى اللخبطة مالوا التبويب ما كويس والدخول والخروج من باب واحد بسبب اصابات يصعب علاجها ويا دكتور كل شئ مثنى واكثر ببساطة كدة هنالك 7 ابواب فى الكعبة و2 فى الحافلات والعمارات واحد للدخول والاخر للخروج وكثرة الابواب بتجيب الطراوة والنسمة الحلوة والمشاركات المتنوعة .
نحن مع التبويب

مع الوحده لا للانفصال