القطر قام ... سليقة ساي

نعم انه القطر الواحد دا
بضاعة
ركاب
محلي ولا اقليمي
كل واحد
تشوفو تذكر بابنوسة والضعين والابيض والرهد وابوزبد وكوستي
كريمة وعطبرة ودنقلا وكسلا وبورتسودان
ياهو القطر
بالقطر
مافي خطر
بشكله المالوف لدينا والمحفور في ذاكرتنا ودخل حتى في مسامات كلامنا
عرفناه عندما كان يعدو جيئة وذهابا على شقوق ارضنا وصلا وتقريبا
نعم انه القطر البشق الفيافي والوهاد لا بكل ولا بمل
الليل والنهار عندو سيان
الصيف والخريف عندو متشابهان
اللهم الشعراء وشكل حضوراُ مموسقاً في القصائد
وجرى خلفه أهل الغناء وكان حضورا مدوزناً في اغنياتنا
من بف نفسك يالقطار
ومن رزيز صدرك قلبي طار
القطار المر البلعلي ما مر
قطار الشوق متين ترحل تودينا
نشوف بلدا حنان اهلا
والقطر الشالك انت اتكسر حته حته
وودعني الليلة يا جياشي مع البوليس أنا ماني ماشي
وفي السكة حديد طرشق عجلو
والسكة حديد جابت اجلو
كان مصدر الهام لكثير من التشكيليين فأضاء سموات المعارض بتفاصيله الهندسية المبهرة
طاف وحاز نصيبا من حجانا وقصصنا ورواياتنا
حتى مسارحنا فقد افردت له المدارج
قطار الهم
وسفر الجفا
في الحياة الاجتماعية قطر الزواج
في الكورة
القطر بمكرفونه العتيق يوزع الابتسامات بين الرواد
القاطرة البشرية يوقع في كشوفات البلاد
القطر ما بخرف ولا بصيبو الزهايمر
حتى لمن قالوا يستعيضوا عنه بقطار الوحدة
رجع باسرع مما كان متصور ففشلت الوحدة ذات التلاتة عربات
فالقطر كان حاضرا مبتسما عند شدة الشوق
ويبكي بحرقة للوعة الفراق
سالت على جنباته دموع المودعين
فرهدت عبر شبابيكه مناديل الوداع المبللة
محطاته شهدت معارك عناق ضروس
نسوان ورجال
الحجاج والمسافرين
قالوا الحجيج قطع قاصد نور البقع
قلبي الزاد وجع
حماني القيد منع
جيوش الافندية البتنقلوا من حته لحته
عفش ناس الجيش والضباط الاداريين
القطر كان سوق
الفول
سندوتشات الطعمية
البيض المسلوق
الكبكبي
السجائر
الشالات
الطواقي
المساويك
لكن فاتتو الاسكراتشات
الجرائد الايام والصحافة والراي العام
العنكوليب
وقصب السكر
مقصقص
فص
فص
فص

ياحليلة بلا عدد
قالوا شالها قطار الاحد
فى الرصيف حسو بلا الرعد
نسال الله مكنتو تنقد
وفى الكاسنجر يرقد خرد



يا حورية سوي المقدرة
المحلي داخل عطبرة
تور القوز أبو بت المنى
البريدو يبرى من الشقى
يا بلالي ليل ليلنا

المهم لو تابعنا سكة القطر دي ما بنقيف كلو كلو
وعلى فكرة المقطعين ديل من غنا الشايقية "كان ما يجينا واحد يقول دي جهوية كمان"
وعشان الكلام في السيرة ليهو طعم نقيف هنا ونشوف "قصة القطرقام " ذات الدلالات المتعددة
فقد درج غير المبالين على عمل اشياء على بعضها دون حساب للمقادير والنسب البتدخل في التكوين
وأبرز إستعمالات "القطر قام" نجدها مرتبطة بعمل الاكل "الحلة"
ودي بتقتضيها ظروف كتيرة كمان بترتبط بمزاج معدي "الحلة" وما عارف علاقة دا شنو بالقطر
وعلى كل حال ننضم ننضم لمن نهتدي لطبيعة العلاقة بين الحلة "حلة الملاح" بالقطر القام
حلة الملاح عندنا في السودان حلة مانعة وجامعة بيتم إعدادها قبل الضهربكتير
وغالباً ما تكون بصل ولحم وخضار بتم "شدهن" بعرى الموية والزيت والنار
ولما كانت المقادير "quantityمحسوبة فإن درجة الجودة "quality" بتختلف من حلة لأخرى
فعندك الحلة المسبكة
والحلة المربوبة
والحلة المنكتحة
وكلما تم ضبط المقادير وتهدئة النار كلما كانت الحلة أقرب للمسبكة
أما المربوبة فدي الحلة التي تقل فيـها كمية اللحم وبتزيد فيـها نسبة الخضروات في نار حارة "هبلا"
أما المنكتحة فتقل فيها البروتينات والخضروات معاً ويتموها موية
أما حلة القطر قام فدي الحلة البتزيد مقاديرها عن الزوم
والمقادير بتدخل دفعة واحدة دون اعتبار للفوارق الزمنية
وبختوها في النار وتترك "تجقجق" علي راحتا
وعينكم ما تشوف الا النور

الجاهوري تصور البوست دا بوست قطر قام
قلنا نعملو احسن من لعن الضلام
اها قلت بالمرة نشوف الموضوع دا من جوانبو عسى نهتدي لاي حاجة
ومشكور على الحضور البهي وابقى داخل طبعا انت محجوز ليك "قمرة"
وفي ناس حا نوديهم درجة رابعة وناكلن "القطر قام"

أول حاجة وضعتا الانقاذ في حلة القطر قام "التعليم"
بصل الابتدائي وبروتين الثانوي وخضار الجامعات وساطوها بالكرباج وطلعت "مناهج"
مناهج بخت اللقا لا دراسة لا معرفة بس تعرفة تدفع عشان ما تقرأ
الكرسي منك
السبورة منك
والطبشير منك
والاستاذ ما منك من العليك
المدارس في الحلال مبنية بالعون الذاتي وحال التلاميذ في أي مدرسة يحنن الكافر عدو محمد
الطلبة والطالبات بدفعوا حق أي شي في المدارس "من دقنو ودرسوا"
فإنتهت وإلى الأبد حكاية مجانية التعليم وبي قروشك ما تلقى مدرسة تلم شفعك
ولو لقيت المدرسة
ما تلقى المعلم
تلقى المعلم يكون كاتلاهو الدبرسة
باختصار المدرسة بقت بين بين يعني في هولة لا طلاق ولا عيشة معدولة
وللأمانة فقد تفنن رجالات التعليم في إطلاق الأسماء على المدارس
وللبنات خولة بنت زمعة وخديجة بنت كعب ورقية بنت مصعب العامري
ومدارس الأولاد أوس بن عمير وأنس بن زهير ومعاوية ابن العاص
والمدارس المختلطة يزيد بن علي وأولاده
وبعد عشرين سنة ونيف ختوها لينا علي صحن صيني وقالوا أكلوا
تدخل يدك اليمين في صحن التعليم لازم اليسار تكون في جيبك
ولو دفعت وقبال ما تاكل يقولوا ليك "قول بإسم الله الرحمن الرحيم وبه نستعين"
دا لو ما جاك واحد من صندوق دعم الكلاب وجرا فيك "كل مما يليك"
يا ويلك لو احتجيت ولا فتحت خشمك رفد وجلد وسجن بس أهم حاجة الغرامة
ودي حلة الدولة العائز ياكل والماعائز يمشي مامون حميدة السنة بي إتناشر مليون
الغريب المدارس أساس وثانوي بنات وبنين ومختلط بأسماء الصحابة
لكن الجامعات بأسماء القرابة
والدائر الأكل الرخيص يمشي كلية علــــــــــــــــــــــوووم الاتصال في طريق مدني الحصاحيصا
غرفتين معكوسات وحوش مكسر ومشرم يساوي جامعة شنو كدي ما عارف والرسوم نار الله الموقدة
وما دائرين نتكلم عن الوجبات الماليزية والانجليزية والامريكية عالية الدسم والكلسترول
تعلموا تألموا
تاكلوا تتسمموا
مش أحسن لينا حلة القطر قام

المشاريع الاقتصادية "العولاقة" كلها دخلت حلة القطر قام لزوم السبك والنجيض
ودي غايتو حلة مسبكة دمعتا زي الحنة تشيل في دقيقة
وجايبين ليها الشيفات من مصر وباكستان
مشروع الجزيرة "العضم الغليد" قطعوا حتة حتة وغسلوا بالدم البارد وختوه في الحلة
لا شفع "الكبر"
ولا شفعت يدو الطويلة طول تيلة قطنوا
ولا شفعت حيرة مزارعنو الخلوهم زي الايتام
الصرايات الجملونات والكامبوهات كلو بلعتوا الحلة
الترع فوروها ونضفوها ونشفوها وشروها
المصانع قطعوها شرائح ووضبوها وجدعوها في الحلة
مصنع الدقيق في كبروا قطعوا بس ما دخل الحلة قالوا إتشالبوا جماعة
الخطوط الجوية بي طياراتا دخلت حلة الطيارة الدخلت حلة القطر قام
كنانة والرهد جدعوها قالوا خمت بتبوظ السبكة

لكن الصحة قالوا أحسن يسووها "شوربة"

وفي ناس قالوا نسلقا
مستشفيات سليقة
الحبوب كبسولات مسلوقة
الحقن محمرة
الدكاترة سلق وفرم ابوابي علي غيرو
السلق مفيد للصحة
قرصتك عقرب
تمش تجيب العقرب تفتح فيها بلاغ يدقوها ليك ناس النظام العام
ملاريا تاكل "موليته" الكمدة بالرمدة
وجع ضهر تشوف ليك بصيرة أم حمد تشلخك مطارق
دائر عملية منظار صورة اشعة تدفع في العيادات الخارجية وتنتظر النتائج آخر الليل
المستشفيات الحكومية سلقوها وقسموها لي ناس الجبايات
العلاج كلوا برا بالقروش بس الرقاد في المستشفى ويزوروك الناس بالتذاكر زيك وزي برشلونا
المستوصفات بالصفوف إنت وحظك وياعالم الغيب والشهادة
مستوصفات الإسم يطول العمر
والكشف يوديك أحمد شرفي بي ركشه
العندو مروة يشيلك منو

الصباح رباح
والرياح هابة
والليل أليل
حلة القطر قام نتعشى وننوم
وتصبحون على خير

ياسيد الحَلة
شكيناك الله
القطر قام
والكل عايز يتدلا
ياسيد الحلة
القطر قام
والبصل نام
والباقي عُضام
ياسيد الحَلة
إتسبكت بس عايزا
اللي يشيل الغطاء
ومااا يتبلا
ياسيد الحَلة

الشدة الحلة فوق النار
شاحد الله عقلو يكون في ودار
وانشف زي ما نشف الازيار
ويغلي جوفو والناس تشوف البخار
ويكون عايش وعقلو في ودار....

المحبوب يا اخوي البلد بقت كيمان والناس لقت ليها دلوكة وسكرة حلال وعاشوا فساد ومرتكزين علي شرع الله المنهم برية....
اعتقلوا
عذبوا
وهتكوا
وسالوا
وفصلوا
ورفدوا
ونقلوا
وسرقوا
وغنوا ( بكسر الغين)
وقطعوا البلد لاوصال عشان ما تتلم الناس ويطالبوا بي حقوق او واجب من اي زول وفعلاً نجحوا بزراعة الفتن بين الناس والقبائل وأكلوا منهم القليل وبقت عندهم ورقة ضد اي زول عشان ما يفتح فمه بكلمة .... وحليل زمن قطر الحجاج ،،،، وقطر العرس ،،،، وقطر الهجيج،،،،
والأستاذة نجوي لها لغتها وخاصة عندما اطبخ أنا وتجي هي للمطبخ وتلاقي اي حاجة علي تربيزة المطبخ تضحك وتقول ..... القطر قام .... فناس القشير والمقشوريين المعاهو وقفوا كل القطارة ما عدا قطر المصائب المارق من محطاتهم وما عارف قطر الخلاص متين يتحرك ويطحن بي عجلاتوا كل الواقفين في طريقوا ،،،،،،،، يارب الخلاص الخلاص. الخلاص

اضافة حلوة منكما هنداوي وصداح مع التحايا لكم جميعا واخص نجوى البحاري وصغارها
القطر قام لفظ طريف زيزو وزي الدغمسة يدخل كل البراحات ويناسب كل المقاسات
هنداوي استراليا فيها قطر ولا ما فيها " القطر الواحد دا"
غايتو في اليابان قالوا بالكهرباء زي الخلاطة يكبوا فيهو الناس ويوصلوا الكهرباء
تنخلط زين وتنزل في المحطة تتنفض وتمش اهلك
بس اليابانيين ما ظن عندهم القطر قام العندنا دي ... نواصل

قطر الخميس الفات
الليله ياحليلو
خلاني ابكي وفات
حبيبي ياحليلو

قطر الخميس القام
ود امي ياحليلو
خلاني لي الاوهام
ود امي ياحليلو

إنت يالمحبوب ...
القطر القام ده ... ما بقوم بالجماعة بتاعننا ديل ..
طبعا ما في طريقة يمشي بيهم لي (واو) ...
لكن أظنوا ممكن يوديهم مصر .. ما كدي !!!
خلي يوديهم من مصر و لا قدام ... بس يحلوا عننا كتير .
وخليهم يشيلوا (حلة القطر قام) الساطوها دي معاهم .

علوب تعيش ياخي
شوف دا "قطر قام" ياباني
تجي تسوط تتكهرب

يا محبوب :

شوف الحَلة المسبكة دي ، القطر قام

الاخ المحبوب والله رجعتنا بايام وزكريات جميله من الزمن الجميل لما كانت كل رحلاتنا بالقطار حتي السفر للخرطوم كانت حتي السكه حديد شباب وانا من الحريصين جدا علي قراءة كل مواضيعك وابداعاتك لا حرمنا منك ومن قلمك المضيء ولك مني التحايا

المحبوب تاني سلام
نعم يوجد قطر وترام ( ترماج) وكلها مربوطة بنص البلد يعني عشان تكون الصورة أوضح ارسم دائرة وضع نقطة في نصف الدائرة ارسم عشرة خطوط من جدار الدائرة لنقطة الوسط ودي خطوط القطارة اما الترماج بين كل خط وخط يوجد خط ترام وكلها خطوط طولية والرابط بينها الباصات ويمكنك ان تشتري تذكرة واحدة وتستعملها لكل المواصلات بص وقطر وترام ويا ويلك لو ما عندك تذكرة ( ملح مافينا) اول مرة غرامة وممكن تصل السجن ولا فرق بين العتالي والوزير ... حاكم ولايتنا عنده ولد وكان قائد سيارتة وحصل حادث والبوليس بعد الكشف طلع سكران في الحد المسموح بانه يسوق السيارة تاني يوم طلع الحاكم في كل وسائل العلام واعتذر للناس عن الإزعاج السببو أبنو وقدم هو طلب بالاستقالة من منصبو وقال أنا كنت عايز اخدم الولاية والناس لكن يظهر ان أسرتي محتاجة لي اكتر منكم عشان هنالك أشخاص ممكن يخدموكم لكن أسرتي احوج لي أنا واعتزل السياسة والعمل العام وعلي طول تبني منظمة تهتم بي تبصير الشباب لمستقبل خالي من المشاكل وبعيد عن الكحول والمخدرات ومليان قطارة محملة بالسلم والسعادة والرفاهية الناس في شنو ونحنا عايزين ننقطع لنصين
كدي خلي صداح ينزل حلتو عشان الزيادة قربت تنتهي يوم ٩ قرب