شيد لبنته قصراً في الرياض مربع رقم (6) ! كيف الناس يقولو عليهو ما نافع ؟؟ "صور"

اليوم من الصباح والناس بتستعد لعرفات 30 يناير لقيت خبر في "الراكوبة" حقيقي أدهشني
ومع ان الخبر مدهش لكن الصور المرفقة معاهو مجهشة فإجتمع لي الإندهاش والإجهاش
الخبر بتحدث عن قصر غير رئاسي مملوك لسودانية عمرها 29 سنة بس
وكمان وبدون أي مقدمات أو لف ودوران أفاد الخبر بأن إسمها نسيبة نافع علي نافع
وبيني وبين نفسي قلت دا كلام فاضي معقولة نافع البنعرفوا يعملا ظاهرة كدا أكيد دا نافع تاني
لكن الإفادة جات وقطعت الشك من خلاف وجلدت التردد بمليار جلدة "حداً نقداً"
فوالد صاحبة القصر يعمل نائباً لرئيس حزب البشير ومستشار المشير عمر البشير
وكمان أفاد الخبر بأن القصر في الرياض مربع رقم (6) بالقرب من مركز الانفال التجاري
شوف بالله الأسماء كلها تتشابه البت نسيبة والمركز التجاري الأنفال ومن شابه أباهو فما ظلم
والبنفذ البناء صينيين ونسبة الإنجاز في المباني حوالي الـ 70% والمساحة المبنية 600 متر
ومتوسط تكلفة بناء المتر المربع (تشطيب لوكس في السودان تقدر بحوالي (1.5 مليون جنيه)
(انا اكان محلهم كنت شطبتو بي لايف بوي عشان الواحد يقلل التكلفة شوية)
أي أن تكلفة المساحة المبنية حتي الآن بطوابقها الأربعة تقدر بحوالي 3.6 مليار جنيه سوداني
اي ما يعادل 1.2 مليون دولار هذا بخلاف قيمة الأرض
قيمة الأرض تقدر بحدها الأدني في تلك المنطقة بحوالي مليار جنيه
أي أن قيمة القصر بكامله أرضا و مباني تقدر بحوالي 4.6 مليار جنيه سوداني!!
تستاهل نسيبة شنو يعني 4 مليار ؟؟
كتار عليها ؟
حد نافع من جيبو ؟؟

وجاء في الخبر بأن :

• زوج السيدة/ نسيبة نافع علي نافع هو السيد/ مصعب (32سنة) إبن الشهيد الزبير محمد صالح.

• يعمل السيد/ مصعب ملازما في الجيش السوداني و لا يزال علي رأس عمله.

• القصر تم تسجيله بإسم الملازم مصعب علي الرغم من أن قيمته تم دفعها من قبل والد الزوجة.

• تم رصف شارع خاص يقع خلف المنزل وان المنزل يقع علي شارع مامون البرير " شارع رئيسي ".

• كل مواد البناء من الخارج ما عدا الطوب والاسمنت.











وليه جايين علي نفسهم "أوي" كِدا ما كان يجيبوا الطوب من ماليزيا ؟؟
داك الليلة عندنا جماعة أهلنا كان ببنوا ليهم في مركز تجاري أجروا ليهم كمينة في ماليزيا
وبالامارة كدا أجروا ليها العمال من الفلبين وتايلاند وسنغافورة
ديل قالو بضربوا كم مليار طوبة في خلال 8 ساعات
الضرب ما جابو ليهو بعر ولا خمروا ليهو زبالة ؟ "تفي"
والطوب بحولو بالبصات السياحية يودوا القمير عشان الحرق
الحريق بدون شقائق السنط وبدون أي حطب أو ويقود نشارة التلج
الحريق هناك باليزر 13 ثانية والطوبة تتقمر زي قطعة الشوكلاته
وقول ليك الطوب بعد يحرقوا يقومو يعبوا في ظروف وبعد كدا الكراتين وبالجو
أهلنا كانو بقولوا "المابتريدو خاف الله فيهو"
فخافوا الله في حقوق هذا الشعب
وإلا من وين لشاب أو شابة بكل هذه المليارات ؟؟
فإذا كانت بت نافع بتكلف الشعب السوداني 4 مليار
فكم تكون تكلفة بنات بقية السراطين ؟؟
الذين حادوا عن الصراط المستقيم
وألهبوا ظهور بنات عامة الشعب بسياط عام التنظيم

قريبا سترد المظالم الى اهلها ...
فلا تيأسوا ....
اجمل ماقراءت للشيخ ( كبيرهم الذى علمهم المكر ) الترابى : عجبت لما خرجت من السجن بعد المفاصلة لاجد نافع اصبح سياسى ؟؟؟؟؟؟؟؟؟؟؟؟؟؟

هو نافع براهو معاهو غندور ومندور وفرفور

راشد وبدر المعارف كيفكما "بالفصحى"
نشرت الراكوبة اليوم خبر صغير مفاده

((بعد نشر الصور الخاصة بالقصر الفخم الخاص بنسيبة نافع على نافع وزوجها مصعب الزبير محمد صالح والذي يقع في حي الرياض مربع 6 ، تلاحظ وجود ثلاثة من قوات جهاز الأمن أمام القصر مدججين بأسلحتهم.. والمعروف ان هؤلاء الحرس الرسمي المكلف من قبل جهاز الامن تدفع رواتبهم من خزينة الدولة...)).

يعني أي واحد يهوب ناحية القصر بلحق التونسية بالراحة
ومال ايه ناس مرطاحة

اولا بالتبادى سلام ومعاه big huge .
بعدين التونسية قامت والمصرية على وشك الاقلاع والسودانية ما لاقية ركاب اتأجلت ...
لكن مش القصر ده بنخش فيهو ان شاء الله كان طلب باليومية

إني حلمت ولم أكن أدري
بأن السفح أبعد ما يكون عن الجبال
إني حلمت ولم أكن أدري
بأن قطائع الغربان ترقص
كلما سقط الغزال
لكنني أيقنت أن لصوص هذا العصر
قد سرقـوا الحرام مع الحلال
أيقنت أن الأرض تجهض نفسها
* مقطع من لصوص العصر :لفاروق جويدة

الفساد لا يلد إلا الفساد ..أفسد الترابى الحياة السياسية السودانية ومعها جيل كامل من المستعدين جينيا واخلاقيا للفساد ومنهم نافع ليفسد بدوره إبنته لتفسد بدورها زوجها وتدور الدوائر ...ارض الشعب وعمارة الشعب ومال الشعب كله سيرجع للشعب .

تحياتى

هي لله ... هي لله ...
لا للسلطة ... ولا للجاه .

العز بالاهل والنسب