والله جد
الزول فتر
نان شابكنو الدود نتر
الدود نتر
و سِر سِر يابشِر
أها
"الليلة سار ياعشاي
العدلية لي
وشويم سار لي لاهايا
البندورا لي...........
قالوا سار وفرحت أمو
والجنيات في كافوري إتلمو
وناس العباس في القروش يلِمو
والجُهال في دينو إتخمو
والجُهال في دينو إتخمو عدلية لي
وقالوا طائر لي مروي تلمو
العدلية لي ................
سيد اليختات التلاتة
وقالو جالس بإنبساطة
العدلية لي
وقالو جالس بإنبساطة العدلية لي
ودفع المية للشعباطة
العدلية لي .........
وقالوا باقيلو تاني كمين حول
دا الجدري الخمام مابزول
وبشيرنا قالوا حالف يضبح زول
وقالوا حالف يضبح زول العدلية لي
ويشي كمان للكعبة ويزور عشان يغفروها لي" ............
عشرين سنة نتِر
ونحن في ملالة نزح ونتُر
لا كلينا
لا ملينا
لا فينا زولاً فتر
والدود ينتر
يشخُر
ينخر
"غنماية المك المابقولو ليـها تك"
ضاعت المشاريع تِباعاً
لا زراعة ولا صناعا
سمسرة وعمولات وشمشرة
وبالناها إلتياعا
القطارات بضاعة
الطيارات مع عارف ضياعا
والذمم كما الاراضي السمحة في الخرطوم تُباعا
إنه الإحلال
أو ديموغرافيا الجماعا
"جدادة الحلة الطردت جدادة البيت"
"وشعبي يلقط الحب
ويجري وهو فرحانا"
لبسنا العِري
وإنتعلنا تموت تخلي
والشقييانا
ويقتات السواد أندُومي
" فأشبعنا الزمان هوله
ولبَّس الناس تياباً حاشا مِي هولا
يات من كان يجي دمَّاعو مبهوله
والــ لله راحت بقت البواجهوله"
وعاد للذاكرة النضمي
نضمي السواد واللواد
نضموه ناساً مافيهم زولاً بنكري
"حكايات الهوى الأول ..
بنحكيها
بدايات الغنا الطول ..
نغنيها
حقيقة وليس تتأول..
حتخجل من ..
عناوينك.."
والجواب بكفينا عنوانو فالبشير فترا
والمابفتروا شنو
نار الحرب "المقدسة" في الجنوب إنطفت
ولكن بعد ما أكلت الناس والأشياء والأرض
ناس دارفور بين نارين
إن رحلوا ووب
وإن قعدوا ووبين
فرفض البشير إصلاح ذات البين
واقف بين بين
ونحن نعاين مكتوفين
ومنتظرين "......فيا بطن الأديم أفتح
براحات الحنين مشرع
وانده لي مدن شاخت
أنده لأطلال القري الراحت
بيوت في بيوت
تمرق من شبر مسرح
مدن فاضلة
وعالم باتساع الحلم
بقامة يشتهي التابوت
فما لفظ البحر يونس
ولا انسدت
شهية الحوت ……"
لا كملت غناوينا
لا نضبت حكاوينا
"هوي يا لبلب
أمانة عليك
تقطع إضنيك "
وما بنفتر
وما بنسكت
نحجي عيالنا
ونحاججهم بي غلوتياتنا
"يا أم أحمد
دقي المحلب
في توب أحمد
أحمد غائب
في الركائب
جانا كلب
سنونو حُمُر
حلب الناقة
في السُنقاقه
بتحب منو في ديل
أمك
ولا أبوك"
فترت ولا ما فترت الناس أبوك
ناس الخدمة المدنية والعسكرية والزراع والصناع أبوك
وجيوش الخريجين في التويتر والفيسبوك
الطلاب في الجامعات الحكومية والأهلية
"الأهلية الكملت يا البشير راحت
وشمس المحنة الغرَّبت طاحت"
قول فترت وامش
ماتقول فائز
وما أدراك ما نصر الدين
فللكعبة رب يحميها
ما تصدق بأنك منتخب
فقد شهد العالم أجمع بتزويرك ليـها
فأنت باغبو
حكمو عاجبو
فالحق حق
والحسن وترا والبشير فترا
موضوع: الحسن وترا والبشير فترا 
الثلاثاء 1 فبراير 2011 - 10:00
