تعلن الحظوظ الجوية السودانية عن قيامها بجدولة رحلتـها المتجهة إلى لاهاي على المسافرين مراجعة البسوو فيهو دا

الكلام ما فيهو هظار
نراجع رقبتنا
وياخد كل سوداني حقو
حقو في أن يعيش كريم
يقري أولادو ويعالجن في أمن وأمان
يلقى الواحد فيهم اللقمة من غير كبد ومشقة
دي حقوق ناس مساكين وغلابة
ماعندها تنظيمات سياسية تعبر عنهم
تنظيماتهم وواجهاتهم هواء وأسافير
ولو شايفين قلة حيلة الناس الآن فما تضمنوا بكرة
عشان كدا ما نكابر
وما نطول المشوار
نرجع الأكلناهو على دائر المليم
لا فرق بين الأموال الثابتة والمنقولة
نكشف الحسابات حمزة علي العباس
الشركات والبيوت الفي بقاع العالم
والمآسي كتيرة ومافي داعي للشرح
ما ننسى ندل أهل الضحايا على مقابر ذويهم
ما راح نسأل عن تقسيم البلاد
فأهل الجنوب سوادانيون والارض سودانية
أي عناد أو مكابرة
ستقوم الخطوط بجدولة الرحلات طال الزمن ولا قصر
فالمصرية ليها تلاتين سنة لكن قامت

من بعد اليوم الدرس إتحفظ والماعندو تلفزيون بسمع الرادي
والماعندو نت فأي جهاز حا ينور الحلة كلها
والناس عندنا بقسمو النبقة
الناس عرفت ووعت
ما نبقى الوحيدين الماعارفين
او عارفين وعاملين أضان ناس نافع طرشا
غوغل جابت مضادات لتقطيع أوصال الأسافير
المعلومات بقت في متناول اليد بنقرة
الكلام دا بسيط والدليل على كدا الحصل في مصر
لا فلسفة ولا نظريات ولا خطب وكتابات
فكفوا الناس شر الانتظار

إنتهى زمن المكرفونات
والكرنفالات
والمتاريس
إنتهى زمن الاستهبال والخم والغش

يعطي الملك من يشاء وينزع الملك ممن يشاء ...
اللهم يا رب العابد ان كان لنا في حكامنا خيراً لنا في ديننا ودنيانا فادمهم وأرزقهم البطانة الصالحة الدلة على الخير ...
اللهم أن كانوا شراً لنا في ديننا ودنيانا فاصرفهم عنا واصرفنا عنهم واخلف لنا من يخافك فينا ويرحمنا ...
هذا كل ما يمكن ان نقوله اخوتي الاكارم ....
والشعب السوداني واعي جداً ويعرف اين مصلحته ....