الإتحاد العام للمحامين السودانيين
أخيراً فتح الله عليه بعبارات تأييد لثورة "الشعب المصري المقهور"
الشعب دا من يوم 25 يناير لا نام ولا أكل طعام
ويوم 11 فبراير الرئيس المصري "فك البيرق"
18 يوم مات فيـها المئات وإتحاد محامين السودان ظل يؤثر السكات
أها من يوم الرئيس فات طلعت البيانات
إتحاد المحاميين السودانيين طلع بيان مكتوب
حمل توقيع الاتحاد ونشرتو الرأي العام أمس "ألكترونياً"
البيان تجسيد لقولنا المأثور "ضل الدليب البرمي بعيد"
أو "عدال القُصص أبقُصتن عوجا"
البحصل في السودان لا يُرى بأعين إتحاد المحامين المجردة من الاحساس
إحساس بمعاناة ذوي القربى من السودانيين
وأعين إتحاد المحامين مجردة حتى من فضيلة الاستحياء والخجل
السلطات في السودان تلاحق وتقبض وتعذب وتقتل
والاتحاد ما شايف ولأنو إتحاد محامين ما بنقدر نقول مطنش
خلي القديم ما راح نسأل عنو وحسابو مقيد في سجلات براو
الآن مئات المواطنين السودانين يقبعون تحت قبضة جهاز الأمن
من مختلف الفئات وغالبيتهم من الصحفيين والطلاب
بنات وبنات إعتقلتهم السلطات بسبب هبة يناير
معقول تكونوا ما سمعتوا بيهم ؟؟
مع ان اخبار ضرب وتعذيب المتظاهرين في المعتقلات اي زول سمع بيها
منو الكلمكم بثورة المصريين ودس منكم خبر السودانيين ؟؟
ولا إمكن معاييركم للظلم الببرر الثورات تختلف من شعب لآخر؟؟
مع ان الحرية والعدل والمساواة قيم ينادي بيها أي إنسان وهو حقيق بـها
وقد غابت هذه القيم عن الشعب السوداني والمصري على حد السواء
والسبب أنظمة الظلم والإظلام في السودان ومصر "محل الثورتين"
فإنتصر الشعب المصري ويتأهب الشعب السوداني للإنقضاض
فكيف جاز لكم تأييد المصريين وغض الطرف عن ما حدث للسودانيين ؟؟
أما الترويع وفساد الذمم والإفقار المنظم فدي سمة للنظامين
قاسم مشترك لكل من النظامين المخلوع في مصر والمزنوق في السودان
فلماذا لم تخرجوا ببيان لإدانة العنف ضد السودانيين العزل ؟؟
وجايين الآن ببيان تأييد لإنتصار المصريين !!
نحن ما رافضين تأييد المصريين بل فرحانين بإنتصارهم
ولكن دايرين نعرف رايكم شنو في البحصل للسودانيين
موضوع: "بيان لإتحاد المحامين السودانيين تأييداً للثورات ضد الأنظمة الدكتاتورية" "والشعب العربي والإسلامي المعادي للإستقرار " دي مبالغة عملتوها كيف !! 
الإثنين 14 فبراير 2011 - 9:44
