حسن وراق حسن
 |  موضوع: ولحم الضأن تأكله الكلاب ( توجد غضة )  الخميس 22 سبتمبر 2011 - 9:51 | |
| ولحم الضأن تأكله الكلاب
حسن وراق
اثار قرار جمعية حماية المستهلك بمحاربة ومقاطعة شراء اللحوم استياء واضح وسط قاعدة من المستهلكين من اعوان النظام معترضين علي هذا القرار ( الغير موفق ) سيما والناس خارجة من شهر الصيام فكانت ردود الافعال متضاربة ما بين مؤيد ومعارض والقطاع الكبير من المواطنين ما جايب خبر لان لحمتهم بالخاء فقط.
زوبة( اللهلوبة ) زوجة احد المسئولين ارتفع صوتها وهي (تزرزر) في زوجها ( المسئول الكبير ) .. أمانة في زمتكم دا قرار تساندوهوا وتقيفوا معاهو ؟؟ منو البقدر يخلي أكل اللحم ؟؟ اسع كرشك المتندلة دي يملوها ليك بي شنو ؟؟ والله الواحد خجلان يشتري لحمة بعد قراركم دا يعني ما سويتوها ظاهرة دايرين تفرجوا علينا المقشطين والجيعانين والعواطلية المالين الشوارع وهم كمان ماصدقوا شابكين ليك اي زول ينزل من عربيتو ماشي علي الجزار يكوركوا فيهو..جر .جر..غايتو مخير انا واولادي اللحمة ما بنخليها قوم اتصرف لينا !!
ياولية انت مطرطشة متين نحنا بنجيب لحمة من جزار ة ؟؟ وانا حالف ما اضبح كل يوم دايرا تجيبي لينا العين والدنيا قبايل تغيير وزاري ؟؟ القرار دا ما مقصودين بيهو نحنا .. اضربي واتصلي علي المولات الكتيرة ومسيخة المالية البلد وريهم الطلبية بتاعتك يعملوا ليك دليفري ليكي ولي ناس ابوكي وريحي بالك من الخوتة في زحمة المرور كل يومين مغيرين ليكي عربية بالحوادث البتعمليها.
سيد الجزار ممسكا بالموبايل وبيده اليمني يدون في دفتر أمامه وجرس الهاتف الثابت يواصل في الرنين يضع القلم ويرفع السماعة بيمناه وبابتسامة رضا يودع محدثه ..حاضر سيادتك ويبدأ في حوار وهو يدون في طلبية .. اهلا مولانا ايوا ..خروف مشفي من العظم ، سنكيت ، دوش ، سن برق ، بيانكو ، فلتو ، فالج . يضع السماعة ويحمد الله وهو ينظر الي صديقه عطية الخضرجي .. تعرف ، ياعطعوط يا مزعوط .. شعار الغالي متروك دا طلع معانا زابط والشغل بقي احسن من أول وبقي كلو أدفري ( دلفري ) ارتحنا من اديني نص كيلو وكيلو الا ربع بقينا اقل حاجة نعمل ليها ( ادفري ) ربع خروف!! والله ناس الرقشات والامجادات استفادوا شوفهم واقفين صف كيف مشاوير معتبرة شي المنشية وشي المعمورة وشئ الطائف والرياض تقول بس شغالين في السعودية دا غير المجاهدين والشعيد طه الماحي ويثرب .. ديل يا عطعوط ما بسألو من السعر بي كم يقول ليك زبط و رسل الفاتورة .. ايوة الغالي متروك الله يخلي الجمعية .. ويشهد الله حمونا بالجد من المستهبلين عليك الله سمعت بوزنة نص ربع كيلو ؟؟
في الاحياء السكنية الراقية انتشرت قوات كثيفة من الشرطة حماية للسكان هنالك بعد ان ثبت وجود نفايات بها بقايا لحوم وعضام تجمعت حولها اعداد كثيفة من الكلاب . بلاغات متعددة تفيد بتزايد حالات نفسية وسط الكلاب بسبب قرار مقاطعة اللحوم ومن بين الحالات الاعتداء علي الاطفال والتجمهر امام محلات بيع اللحوم ومطاردة نوعيات معينة من العربات خاصة المظللة منها ومهاجمة مواطنين بعينهم تبدو سيمائهم من دقونهم.. نباح الكلاب سد الآفاق هو.. هوو .. هووو ورصدت حالات وسط الكلاب تمنعها من النباح الا بعد ان ( تتكل) علي حيطة مايلة مقابلة لحيطة الحكومة المتهايلة وهي تكثر من النباح
هو..هو..هوينا ..هوينا
هو..هو.. هوونا ..هوونا. | |
|
