عرق الشتاء الداقي - قصيدة

عرق الشتاء الدافئ
كتبها: عبد اللطيف عبد الله مساعد
مهجور ومغرور . . . وعايش علي الأوهام
سجمان ومدلقن
رمتن ومرمد ... وفضله علي الحكام
مقبور دايماً في دارو ..
ولو طفوا أنوارو .. حسداً في فرحة جارو
لأنه خفا خفاش لا يعيش إلا في الظلام
حتي لو قلنا حمام يبقي ظلمنا الحمام
ممدود في الخدعة .. سكران الغفله
عايش في غيبوبه ... ومغيب عقله
وجمهوره غافل
والبطولة ضل دروبا
حتي انتصاراته علي قلتها كانت مضروبه
استعصي مرضه فقول يا كافي
ماتت إرادته وعانت إدارته في إدارتو
راكب حمارة الخدعة العايرة ..
وقدمه حافي
واصل دايماً لهجير الصحراء الناشفه
وكم شق فيافي
حتي حمارك حامل أسفارك
وصحافتك بايرة ..
حمارتك عايره .. في الرملة الزاحفة
ونفسك واجمه وروحك راجفه
تعافر في الزمن المتعافي
جموعك روحها فايره ...

وبتحلم بالشتاء الدافيء
حتي الدافئ
أغرز نصله ..
في دفاعك الخافي ..
وجندل الخرع الباليه
في الزمن الأسافي
طفوا الأنوار ..
ارموا الأحجار ..
فكيف كنت مع الأربعة الكبار
وتأتي بصنيع الصغار ؟؟؟
فعذراً فإن العُوار والعدار
مستحيل يصبح نوار ...
فالدنيا ليل ومطر وشتاء وأقدار
زي سواد أيامك
وطول أحلامك
ولسان إعلامك
ومكرمة حكامك
عيونك هايمه وكيسك فاضي
لمتين بتكابر .. وشعبك صابر
مدفون في دارك
وسميتها مقابر
أحزانك كترت بكاء وعويل
وليلك طويل
في كل يوم بتناهد بتناجي القمره
ليه التسجيلات كلها في القلعة الحمرا
حتي الفرح هاجر من دارك
ومشي لجارك في القلعة
الواهجة نجومها ما أفلت من يومها
حتي لو أفلت أنوارك .. ويبقي دا عارك ويبقي قرارك
همدت أنوارك وظلمت دارك وقللت من مقدارك
الفرح فات بعيد منك وأصبح خافي
لمتين أحزانك بتصبح صاحيه
بتحيك الكضبة
ونفسك مسروره .. بتماشي غروره
وبجيب ماسوره بدون كوره ولا أخلاق ولا مقصوره
والشينة عندك منكوره والماسورة مقفوله بضبه
واعرف يا حبه ..
أصدق مع نفسك عشان تتحبه
ما تعمل من الحبه ( قبه )
جرايدك مسخ مشوه
حبرها بذاءه .. وكلامها سواقط
مدادها قذاره .. محررها للتربية فاقد
قلمه حاقد قلبه أسود .. ويده راجفه
وديل لحقوك أمات طه .. ومصير القذافي
فاتها نهارات الصبر واقفه
علي بابك وبتحلم بالشتاء الدافئ
وفر أحلامك و أدب أقلامك
وقلل من القول الجزافي
إنه عصر الموج الأحمر
إنه عشق أيامنا الخرافي
إنه عهد النجم الضاوي في الفيافي
إنه ألق النجيمات البعيده مع نور المرافئ
وإنه عرق الجباه الشوامخ
إنه عرق باسكال وسكواها وأنه
عرق الدافئ إنه عرق جبين بله ..
في شعاره اتبله
إنه عرق المريخ
الذي من روعة حروفه
اكتمل نظم القوافي
وإنه عرق الفرسان الأشاوس
النادر مثالهم ... ووجودهم بين الفرق ما في
إنه عرق المعاني السامية في وطن النجوم والتصافي
إنه المريخ حب الأديم والسديم
والعشق القديم .. مريخ العشق الخرافي
إنه عرق المريخ الذي من طهر استقامته
صار رمزاً للعفاف ... صار رمزاً للعفاف
مع تحياتي
عبد اللطيف عبد الله مساعد
الأمين العام لرابطة الإعلاميين بالحصاحيصا


تهنئة
رابطة الإعلاميين بالحصاحيصا
تهنئ المريخ السوداني بالفوز بالممتاز وعودة الأهلي والرابطة
تهنئ رابطة الإعلاميين بالحصاحيصا فرقة المريخ إدارة وأقطاب ومشجعين بنيلهم كأس الممتاز الظافر وترسل التهنئة للأهلي مدني والرابطة كوستي بالصعود للدوري الممتاز وتتمني للجميع دوام التقدم.

عبد اللطيف عبد الله مساعد
الأمين العام للرابطة