تواشيح الدغش عند حضرة إمام الغبش ( مرثية لمحمد ابراهيم نقد )

تواشيح الدغش عند حضرة إمام الغبش
حمزة بدوي حجازي
بين الديم وحديقة القرشي.. ونمرة اتنين.
نعش الصباح الإحتكر كل الأحاسيس.
والملامح والتفاصيل ( الكلام).
كان الجعيص .. كان المهاب.
ياروعتو.. عملاقة كانت خطوتو.
كان بث مباشر .. بث حقيقي علي الهوا.
صمت البروجي الباشبزوق.
وإنقد كل طبلاً عوي.
إهتز قصر الكتشنر.
كل حس مشاتر إنزوي.
جحظت عيون.
نزل المطر.. صب العرق.
ظهرالشفق.. خيل السبق.
نور نبق.. ورق الجبايات إنحرق.
قصر الدجل.. همد الهبل.
مات الخبل.. وأبو جهل.
بق الصباح كل كرسي فاق من سكرتو.
ملخوم تحسس عورتو.
والنيل علي بنبرسنط مبسوط تناول قهوتو.
***-***-***
ضو الصباح العفوي موزون.. التقول بي مسطرة.
دحض الدعاوي المسخرة.
سكت اللسان الفشخرة.
يادوبو صدق ماجري.
ياحسرتو .. ياغفلتو.
كيفن تفيدو التوبة بعد الغرغرة؟!
***-***-***
فاح الحنوط.
كان الحنوط عرق الترابلة المجهدين.
عمال وطلبه..مثقفين.
وناس كتار لماهم الحضن الحنين.
مابيننا دين.
مافيش قرابة وبيننا مافي صلة رحم.
مابيننا دم.
هذا الذي لينا إنتمي.. ليهو إنتمينا وبي فهم.
نحاس ودلوكة وشتم.
ضل الطنادب والنخيل.
ريحة الجروف وندي البشم.
جابنا الدفو .. التوب الأعم.
لا جابنا بيرقر لا صكوك.
لا صفقة لا شيك فس البنوك.
لانا إشترطنا بتدو كم!!
لا جينا خم.
قد جابنا هم.
جابنا الذي لينا إنتمي.
ذاك الذي لمانا لم.
زولاً تعب.. شال شيلتو هو وبعض الرفاق.
وبنونا تاني من العدم.
فارس النضال الما إنهزم.
سيف الحقيقة الما إنترم.
***-***-***
أبونا مطمورة فكر..ما قشرة شيط.
أبوي بسيط.. غني بالسنابل والسبيط.
الشعب بس عندو القرار.
والشعب هو القص الشريط.
***-***-***
مافي سر بيفضل خفي.
خرجت قبور.
أدا التمام هاشم عطا.
هش الشفيع كتبك حضور.
قام قالدك ود السخي.

(يوسف حسين) تلا إعتذار:
خلونا ياخ من داك ودي.
-جد مافي شئ.. هذا الزميل نزل الأرض.. دعت الضرورة ليختفي.
( من الله ) قال :
-الهم جبل.. يازملاء ماقدامنا حل .
في شنو البكا وفي شنو الزعل؟!
بالنت مساهمتو بتصل.
(دريسة ) لي قطان همس:
شفتو الصباح قبل الجرس.
لازول معاهو ولا حرس.
شايل كتاب وقلم حبر.
نص عيشة.. طعمية وعدس.
(ياحاتم إنعل أبو الفلس).
شاغلتو( ياكابتن ) سلاااااااااام.
زعل إنكبس.. زعل إتمغس..
أبي ما يقيف..جدع الرغيف.
صنقر هناك.. بين مقرن النيلين جلس.
قال الكنين :
-فينا البيحيا ليفني.. ودا عندي ميت مرتين.
وفينا البيفني ليحيا.. ودا عندي عايش مرتين.
شوف ياشباب.. العبرة جد مافي الغياب.
بعد الغياب جرد الحساب.
فينا البيحلق في السحاب.. وفينا البيموت ميتة كلاب.
أصلو الغياب لحظة تساب.. فليسمع الناس العمي.
تتبخر الرغوة الزبد..ويبقي في الأرض الطمي.
دندن السر المبارك.. برضو إتداخل وشارك.
-قف تأمل (حسرة الداهن تجمل..فرحة القاوم تحمل).
-إن حكمة إبن حنبل..شوكة في عين كل تنبل.
(بيننا وبينهم الجنائز)
***-***-***
ماحأقول رحل.. وأبويا(دا الكان داكا).
أبوي مافاتنا يوم.. قدامنا ياهو هداكا.
لو حكم القدر.. وإنت الظرف دساكا.
حافظين منهجك
خليت رجال بي وراكا.
***-***-***
ياحر إشتراكي.. ماركسي وسوداني.
ياود البلد ياأممي أول.. وتاني.
من طاشر وعيت..كنت الفتي المتفاني.
ياالقلت الحزب.
مرتي.. وجناي.. دكاني.
***-***-***
معاك سافرت كم..وخبرت كل أفعالك.
غيرك تخدمو.. وبراك ترتب حالك.
حنين وعطوف..كريم.. بيناتنا تقسم مالك.
يادخري المنابر.
مين البدانيك طالك.
***-***-***
أديت الأمانة.. وأنجزت كل تكليف.
قائد عبقري..طلت المدن والريف.
عند أدب الخلاف.. إنت التملي شريف.
صارم منضبط.
نضيف أبوي وعفيف.
ودمدني 5/4/2012م