عازة السمحة ... شعر : صديق الرضي

( عازة السمحة )

وجيهك شايل من النيل شبال
عيونك فاتحة شبابيكا علينا
نغازل فيها
ونرضى بتيها
نغني ونتعب في الموال
بنحكي همومنا
ونبكي نجومنا
وننعي الحال المال
وحبك يا امورة
لا هو خرافي ولا اسطورة
ما حبك قصة قديمة
وخالدة سطورا
حبك يا عروس
غابة ابنوس
ونخلة تكيد السوس
تغيظ العزال
ما حزمة نال
يا اجمل فال
يا ثغر بلدنا
وحلو جلدنا
وزهرة تقاوم في شلال
وسيرتك دايما فينا
صافية وزينة
بس ناقصنا نبل الشوق الطال
ونشرب من النيل ونداوي
جرحا فينا قديم
ونسمع من حبوبا حكاوي
وفيك يا عازة السمحة نهيم
ما اصلو الغول الشالك
هالك
وناسي وغافل ماضي رجالك
بكرة نصيدو
ونبتر ايدو
وبكرة نغني نشيل شبالك
وبكرة تزغرد ليك الدنيا
وكل الناس ح اسرها حالك
نغني نشيدك
فرحك وعيدك
نعيد ونقول
يا عازة وصال

وجيهك شايل من النيل شبال
رائع يا ود الرضى