"إقطعوا ليـها في "إضنيها" قالت خلو لي محل للخرز" حكاية "المؤتمر" الصحفي للشريف الـ"مش مبسوط"

الشريف هو الاستاذ عثمان عمر الشريف القيادي الاتحادي المعروف
الشريف دخل العريضة قبال كم شهر وظل "يلف ويلف ويلف ويلف " لمن راسو "لف"
أمس الاثنين والدنيا قبائل رمضان قام عمل "مؤتمر" صحفي بصفته وزير التجارة
قال يفرجا على الناس الفاتحين "خشومهم" يعاينو لهلال رمضان بي عين ولله بالعين الأخرى
و"المؤتمر" الصحفي "نهبتوا" ليهو وكالات الأنباء النطيحة والمتردية وناس الفضائيات وجرائد لا إله إلا الله
وبدأ "المؤتمر" بفزلكة تاريخية عن دواعي إستعمال العربات في هذا الشهر "الفضيل" لزوم "التلج" والذي منو
بعض "الصحفيين" الممنوعين من الكتابة بسبب "الرتابة والرقابة" قالوا أحسن من نقعد ساي أهو "نسأل"
واحد سأل عن "الآبري" وعن "الطايوق" سبب إحجام الناس عن "عواسة الحلو مر والأبيض ضميرك"
وقبل ما يتم سؤاله قاموا عليهو "التنابلة" وزجروهو زجرة "العدو" وقالوا ليهو "الشريف في شنو وإنت في شنو ؟؟"
واحد تاني من الصحفيين قال يستفيد من خطأ زميله "السابق" وسأل عن كمية النقد اللازم لإستيراد "قمر الدين"
وعما إذا كانت الوزارة قد قامت بفتح الإعتمادات المصرفية اللازمة لإستيراد مزيد من السكر والتين والذبيب
شبوا ليك فيهو "أقعد قعد نصك" وبالمرة تصدى ليهو واحد "تمبلي" وقال ليهو "أسي خشمك دا خشم قمر دين؟؟"
رد عليهو مدير "المؤتمر" وقال ليهو "ياخوي المؤتمر دا عشان العربات "المستعملة"
وأضاف في إطمئنان يحسد عليهو "الحاجات البتتكلموا عنها دي ماهي أكبر هموم الوزير خليكم موضوعيين"
وساد الهدوء وأعلن الوزير عن مفاجأته "الداوية" وكشف عن رفع الحظر عن استيراد السلع السالبة
والسبب "حسب كلام الوزير" هو انضمام السودان إلى عدد من المنظمات الإقليمية العاملة في "المستعمل"
لافتا إلى أن وزارته أنشأت إدارة للتجارة الداخلية وأظنو بقصد "الخردة" نان في تجارة غيرا "ها الأيام"
وكمان قال وضعنا السياسة الكلية لحركة كافة السلع داخل ولايات السودان "المختلفة"
وأكد على إنشاء قاعدة بيانات "داتا بيز" ومعلومات "إنفور ميشن" تمكن من معرفة حركات التجارة الداخلية
وذكر الوزير "المتفاوت" من ضمن ما ذكر بأن الوزارة "راسا ما قادرة تحكو" وتعكف هذه الأيام في وضع الخطط
وستقوم الوزارة في المستقبل القريب الآجل "للسقوط" بوضع ضوابط لمنع احتكار السلع الاستهلاكية
ويافرحة لم تتم وقبال "ما تنبل فولة العربات المستعملة في خشم الوزير" وبعد "كشف الحال" دا كلو !!!!!
تدخل السيد الرئيس وحلف "طلاق بالتلاتة" وقال "عربية مستعملة واحدة ما بتخش هنا ولو بقت رولز يوسف"
ونهايتو الوزير بقى في "هولة لا طلاق ولا عيشة معدولة"

اها والان نسوي شنو
هل نشتري
ام نبيع
والدنيا ربيع
وقبايل عيد

أبو سماح والله ليك وحشة
وسامع أخبارك قالوا حائم زي لوري البيبسي أكان غشيتنا مالك ؟؟
ياهو دا الـ الله قدرو عليهو ؟؟
الجديد نحن ما "شبحو"
مقنطر "عمتو " زي راس "المُترار" وبعد دا كلو جائب لينا "المستعمل"
ويابوسماح "بيع" ساي كان بائع ياخوي المستعمل شدة مارقد "هبطرش" لمن بقو يسوو ليهو مؤتمر صحفي
أنصحك لو عندك فكو "طوالي" زي "فكة الرئيس للشريف دا" والزارعا الله في مايدوغري تقوم

ود المحبوب
خبرك شنو
وبلدكم حاره مثلنا
صراحه هنا حفره دخان بس

المحبوب سلام هووووى ورمضان كريم وتصوم وتفطر على خير وما تنسانا من مطايبكم ودعواتكم الصالحات ومعاها جقمات من بعدها طاعمات ولا نجئ مطار ابوظبى .
احونا الشريف الما... دغرى لا نملك الا ان نقول له حليل العمة الشاربة من موية الترع والجلباب الممرك بخدرة خدوووووم .
القصة ما قصة مستعملة ولا دغمسة طلاق القصة مساومة وبعدها المطايبة ويا ابو سماح بيييييييييع وما تنكرى .
وتانى رمضان كريم وتصوموا وتفطروا على خير

» حكومة الجبهة يقطعوا ليها في إضنيها !! قالت يخلوا ليها محل للخرز !!!
» "يقطعوا ليـها في إضنيها قالت ليهم خلو لي محل الخرز" الخارجية "الشوشانية" تستدعي القائم بالأعمال الامريكي بسبب عدم منح "التأشيرة" للرئيس !!
» وقائع المؤتمر الصحفي لتحالف مزارعي الجزيرة والمناقل حول قضايا الراهن بالمشروع
» الصحفي عثمان شبونة (يبستف) الصحفي ضياء الدين بلال.. جدير بالقراءة
» الشريف مبسوط مننا -- عبد اللطيف البوني