جيت من السودان بكمية من الإحباط والسبب كميات "المستثمرين" و"الماجستيريين والدكتوريين "
البلد كلـها "الحمد لله" بقت "دكاترة"
الحكومة "عن بكرة جدها" دكاترة
الدستوريين كولهم بدل "طنابرة" بقو دكاترة
بإخي "المعتمدين" رسائل الماجستير والدكتوراه حائمة في مكاتبهم زي تصديقات الأراضي
شفتو الهملة دي كيف ؟؟
وأقل زول ما يفرز "كوعو من بوعو" تلقاهو لاطش ليهو ما جستير على الأقل!!
والعجب "الإستثمار" يات من هو تلقاهو بي تلاتة عربات وعمارتين ومزرعة وأربعة نسوان
ولمن حاولت أستثمر ساقتني "الأعاصير وفيضانات البرك الآسنة" جهة رفاعة
لأن منطقة الحصاحيصا قفلت تخيلوا !!
وعرفت "تحت تحت" إنـها ما بتفتح إلا لو عندك "قريب" إن شاء الله من بعيد في "المحلية"
أو بربطك نسب من "خارج خط تمنتاشر" بخلاوي مانشستر في القريقريب
ووحيات ديني وإيماني جيت راجع بخفي "حنين"
لكن أريد الله "الما هو سِر زول" لقيت خبر في الراكوبة يمين بالله بي صورو شفتو كيف ؟؟
الخبر هو تعيين "فاتنة جميلة وعارضة أزياء كرواتية مشهورة" مدرباً لفريق كرة بنادي كرواتي
سريع سريع "قوقلت وكروت" ليك إسم الفريق وعرفت عنوانو وتأكدت من صحة الخبر مية المية
"نان لعبت ليـهم" ما طوالي إتصلت برئيس النادي وعرضت عليهو "السيرة الذاتية"
الراجل رحب جداً بإنضمامي للنادي مقابل مبلغ محترم "زول ساي بوريهو ليهو مافي"
طوالي إدارة النادي "مشكورة" رسلت لي الفيزا وطزاكر السفر وجيت لكرواتيا "الشقيقة"
ولقيت تشجيع ومساعدة كبيرة من الطلاب "الكاسرين" في زغرت "يا ما أنت كريم يا الله"
كرواتيا بلد جميل والنادي بقع في "نص" "زغرت" والله من الفندق "مشيتو كرواتي"
وصادف "حينـها" تمرين للفريق في ملعب النادي إستعداداً لكأس أمم "أوروبا"
المدرجات "مليانة" وأرضية الملعب "مستفة"
والناس دي تنبح زي "الكلاب" نيميزيتش نيميزيتش"
الله الله أنا قايلن "بكوركو" إحتفالاً بمقدمي "الميمون" وأتاريـهم قاصدين تيهانا نيميزيتش
ودا كلو من عدم المعرفة بلغة "الكروتة"
لكن هي مــــــــــــــــــا تيهانا و"لايكة" الناس "لُبانة"،،،،،،،،
أولاً بالتبادي "فارعة" لا طول ولا قصر والله ما لقيت ليـها وصف إلا في غناء الحقيبة
فريـع البـانة المِـنْ نسمة
يـتـمـايل حـاكى المـنقسمة
الجيـد الوافـر كلـجـامه
فـاقـت اعـرابـا و اعـجـاما
كالمـهرة العاصية في لجاما
لقـلوبنا لحـاظك رجامة
"أرجمينا إن شاء الله ما تنينا"
المهم التمرين "سار" يا عشايا العديلة ليه
وشويم شال الجداية يا عديلة ليه
بتتحرك وسط الملعب زي الفراشة توجه في الباكات "المقهيين" فاتحين خشومن
وخاف قالوا ليكم شايلة ليـها صفارة "زي عسكري" السواري ؟؟
ياخي دي من "شفتنتا" بتصفر بـ "السبابة والخُنصُر"
لاعبي الوسط "زي ناس محليتنا" إن ما شاوروها لو روحك مرقت ما يدوك "باص أرضي"
يعلقوا ليك "الكورة" "بفتح الكاف" في السماء التقول شاحدن ليـها !!
بس "كيتاً كدي"
وإن ما عجبك تمشي "برشلونة"
واحد من الطلاب السودانيين كان برفقتي ما قصر معاي أبداً
قال لي أسي أكان مشيت لعبت مع ناس "مسي" ما أحسن ليك من "تتكسر" مع تيهانا ؟!
قلت ليهو ما هدا إنت "مكسر" هنا ليك تلاتة وعشرين سنة ما تمش "تتكسر" في كيمبردج ...حدثني ؟؟
"كُر علي بناتا" يدقو فيهن دق العيش بسبب البنطلون والتونكا
يعني أظنهم لو قالن ليهم دايرين "ندرب" ياهم المضبحنهن !!
على كل حال أحسن ليهن من "الوأد" سيد بس الشغال
ومستثمر
وعندو دكتوراه
ومزرعتين
وأربعتاشر "حُرمة"
حرمت عليكن عيشتكم بركة العيد الكبير الجائي دا
قولوا "أُميين"
موضوع: تعيين عارضة أزياء "ذات حسن وجمال" مديراً فنياً لفريق كرة قدم "توجد مواصلات ــ بالإزعاف في حالات الرعاف ــ بعد عرض الصورة" 
الخميس 27 سبتمبر 2012 - 7:35
