حلم التلاقى..مع زهرتى الحلوة ..ابنتى سلمى ..المقيمة بفرنسا

كيف للحلم... مافيش لزوم
مع انى... ما عارف انوم
من رحتى سديتى الدروب
والعيون ما لاقو......يوم
كيف ..للحلم مافيش لزوم
***************
فتحت ليك ضرعات صبر
موج الأمل ...عديتو عوم
لاعمرى شكيت فى وفاك
لاعن رجاك صدانى لوم
قصدى ألمس قيف رضاك
امسح شقا المشوار حداك
وادفن هناك باقى الهموم
كيف للحلم.. مافيش لزوم
*************
لكن مواسمى طواها صيف
فى سكة تحرق... بالسموم
لابلل الريق... طيف سراب
لاقدرت ...فوق الحيل اقوم
ورغم المرارات......والألم
ما اظنى.. اشعر......بالندم
لو حتى صيف وعدك يدوم
كيف للحلم ...مافيش لزوم
*****************
عجمان.. السبت17/5/2008
دولة الامارات العربية المتحدة