بصوت خفيت حاولت امو تصحيو
كانوا نائمين في الصالة
الدنيا برد
والأبو كان شغال في ماربلس بالليل زمن المحالج كانت بتشد الحيل
جرّ عليو ملايتو ومن تحت الغطاء قال ليـها "يمة مالك في شنو؟؟"
قالتلو "الحرامي"
رد عليـها بالراحة "يمة الحرامي حا يشيل شنو ما تنومي ساي "
"منعول إسم أبوي الحرامي جوة الأوضة .....
فاتح الدولاب يلملم في هديماتنا بي حالتن العندنا دي .....
قوم علي حيلك ما يخلي خشمنا ملح ملح"
"والحرامي شغال في شغلو "
شعرت بحاجة غريبة وقالت ليهو "خلاس إتنحنح يمكن يخاف يفوت "
رد عليـها بسرعة "أتنحنح بي وين يمة ؟ ...
مالك ماعارفة حسي مقروش ؟؟"
الزمن دا الحرامي البكسر البيت "خِرِف" وبقى ما جائب حقو
وفي الحقيقة البيت ذاتو بقى "مِعلِم" الله
إلا كان الدلاقين البتغتي البطن يا الله ويامين
وشوية كريمات لتبييض البشرة بفعل ثقافة النشرة
و"إكسسوارات" ودهب صيني للفشخرة
غير كدي والله إلا "المال العام" أو من رحم ربي
ويشهد الله لينا كم سنة نقرأ في تقرير المراجع العام
وعرفنا التجنيب
وقروش الترغيب
وميزانيات الترهيب
وعمولات سماسرة إقتصاد اليانصيب
الفقراء ضاقت بيـهم الوسيعة
والحكام شغالين "قرف" في المال العام
ودا ما من راسي من تقرير المراجع
ودا كلو عادي وقلنا "خليهم يتمكنو"
لكن البفقع المرارة "إن وجدت"
واحدين ذكرهم المراجع بحجو بي "حريمن" على حساب الدولة !!
أي والله على حساب الدولة
طابين نسوانن ماشين الحج الجايبنو بـ "الخج"
ولو المراجع العام لقى المنصرفات مكتوب عليـها للحج اللِمِش أسواق جدة
في حج بحرمو ليهو بتياب السهرة ؟؟
في حج بالدلال ؟؟
في حج بالكحل وكريمات الأساس ؟؟
والحاج "إياهو" تلقاهو "منفخ" لافي عمتو وجادع "شالو" !!
ياخي ما تحج وتحجج مرتك بي قروشك
ندفع ليك الرواتب
ونفرش ليك الفيلا بالمراتب
ويمدح ليك في العودة ناس "الأصائل" ألحان "الراتب"
حج بي قروشك يا "أخي"
كفاية عليك يـ"حاج" البتلهطو من إعتداءآتك على المال العام
كفاية حالات أستغلالك لنفوذك وإنت المسئول الحكومي
كفاية عليك المبالغ المجنبة والمغتصبة
كفاية عليك مخالفاتك لقانون عقد الصفقات في وزاراتك البقت مزاراتك
كفاية شبكاتك
وشراكاتك مع المصارف
وشراكاتك مع الشركات المحلية وعابرات البحار
وشركاتك مع الوزارات والهيئات الحكومية
ماذا تقول للمولى عز وجل
وقد بلغت جملة المبالغ محل تعاملاتك ملايين اليورهات ؟؟ حسب تقرير المراجع
ما كفتك رشاوي توريد المواد غير المطابقة للمواصفات ؟؟
ما كفتك عمولات ارساء العطاءات باسعار تفوق الاسعار السائدة ؟؟
ما كفتك أموال الوحدات الحكومية الإتحولت لشركات خاصة مملوكة ليك؟؟
ما كفتك عمولات تمويل البنوك بدون أستيفاء شروط وضمانات التمويل ؟؟
ما كفتك الأموال الحققتـها بإستغلال نفوذك وتكويشك على وحداتك الحكومية ؟؟
ماذا ستقول للمولى عز وجل وأنت واقف في جبل عرفات ؟؟
حا تقول ليهو بانك دستوري ؟؟
وزير ؟؟
والي ؟؟
معتمد؟؟
ولا عضو في المجلس الوطنى ؟؟
ماذا ستقول ؟؟
وإنت عارف حج الدستورين على نفقة الدولة ممنوع بموجب القانون !!
وكونك من المذكورين أعلاه ودا مؤكد "قطع شك"
فلابدّ إنك عارف بحكم عملك وموقعك ما ورد في تقرير المراجع العام
فقد أسهب التقرير وعدد مخالفات الوحدات الحكومية للقوانين
المخالفات منسوبة لكافة الجهات الحكومية "دون إستثناء" وأقلاها
عدم إشراك الجهة المختصة بوزارة المالية في إبرام صفقات تعاقدات الحكومة وعطاءآتـها !!
الحس إنقرش خلاص ؟؟
زول ساي "يتنحنح" مافي يا كافي البلاء ؟؟
موضوع: دايرين زول "يتنحنح" الحسو "مقروش" يقيف بعيد !! على حساب الدولة !! دستوريين سايقين نسوانن الحج محرمات بتياب السهرة !! 
الأحد 30 ديسمبر 2012 - 8:57
