حبوبه روعه قاعده منتظراكم فى ضل الضحى...اتفضلوا

مبارك عثمان كتب:: اهلا بى ضل الضحى ,,, انا اول واحد ( بضحى ) قصدى بجى ضل الضحى , دمتى

حباب ولدى مبارك حبابك عشره اتفضل لجوه
منور الضل
اتفضل مسافة اجيب الجبنة
وتحلى القعده مع الرائعيين

راشد محمد الجاك كتب:: ... الراكوبة محروسة ... وستها مافيشا .. شنو ياحبوبة روعة الروعة .. يادوب ريحة القلوة ما بدت وجينا جاريين جرى .. ما نلقى الا الجراوى والتلودابى واولاد الجاك والدامرابى ... فى شنو قومو شوفو ليكم شغلة اقضوها .. بكرة بجيب ليكم الحبوبة اصلها مشت لجنياتها هناااك تتفقدهم .. يالا يا الجنوى رشو الواطة دى وامرقو الهباب لبره خلى القعدة تحلى مع ... الرايعين

حباب ولدى راشد حباب ابو منه
منور الضل
وانتم اصحاب الروعه
مرشوشه الواطه وكل شى جاهز
بس انتو تعالوا
وتحلى القعده مع الرائعيين

anwar كتب:: انا جيت للقهوة وياامجد المضغ ملحوق

حبابك انور ياولدى ادخل لجوه
الجبنة جاهزة
الا اشرب ليك شويى روب حبوبتك خشته هسى
وتحلى القعده مع الرائعيين

عمار تلودى كتب:: يا جماعه انور ده جاكم فى الراكوبه ديه بالبرشود ولا شنو لا سمعنا ولا شفنا
عموما الف تحية ليك فى دوت كوم
ونزلت اهلا وحللت سهلا

حباب ولدى عمار تلودى
منور الضل
اتفضل لجوه
وتحلى القعده مع الرائعيين

امجدالشيخ كتب:: كدي يا ود تلودي اول شي حفاظه وحفاضه عشان صلاح مايفهم غلط هو ماشي السوق...

وماتشيل هم جايب معاي طقم فناجين طين من كسلا .......

حباب امجد ولدى حبابك عشره
منور الضل
انت والجنوى
كده اندخل اجيب ليك الجبنة اتفضل على العنقريب الهبابى ده
وتحلى القعده مع الرائعيين

صلاح محمد الجاك كتب:: ياحبوبه روعه سلام جاك وانا والله جاييك رامياني ريحة قهوتك الطقت ملت المنتدى وبناتك ديل مالن مارشن الراكوبه دي واهم حاجه الشمارات بس الدقاقه لا الا مره مره وكراب عنقريبي شديهو لي والله بونسكم ونسه حلللللللللللللوه ..
اها اكان بقيتو جاهزين امانه عليك تناغميني ..

حباب ولدى صلاح
حبابك عشره
منور الضل
اتفضل على العنقريب الهبابى
واشرب ليك مويه ساقطه من السعن
مسافة اسوى ليك الجبنة
وتحلى القعدة مع الرائعيين

وليد العشي كتب:: تعظيم سلام لكل القادمين من الزمن الجميل
يحاصرنى احساس جميل وانا اقرا تلك المفردات
غلاقتى مع القهوة ضعيفة
رغبتى الان كبيرة فى كباية قهوة
سلام وحباب

حباب ولدى وليد
تسلم على كلامك السمح
وتنور الضل دوما
اتفضل لجوه ..مسافة اجيب الجبنة
وتحلى القعده مع الرائعيين

امجدالشيخ كتب:: يا جماعه بطلوا الكبكبه خلو الكبابي تلف لفته
وبعدين يا ............. ؟ خلوها بعد الجبنه
عشان ما تشاكلونا ونحرد الجبنه.

بمناسبة الجبنة اقصه ليكم قصة طويله للبرلوم :
مشينا لصحبتنا في كسلا وهي من اصول اريتريا
المهم امها جلستنا في حلقة جبنه زي حقتكم دي
وبعد قلي البن قامت بالمقلايه ولفت علي الجماعه
كلهم ولسؤ الحظ كنت اول واحد ومديت يدي أخد
حبه بنايه وما تسمع الا البيت كلو وبصوت واحد
(لا) ... اتاري (بيشموها) بس وانا داير (امضغ)...

كدي قومي يا حبوبه اديها لفه ........

ضحكتنى طبعا
حبابك ياولدى امجد
اديت الضل نكهة حلوه بقصتك
اتفضل لجوه هسى اجيب ليك البن تشمه قبال ادقه
اقعد
وتحلى القعده مع الرائعيين

بت النيل كتب:: جبنه ياسلام عليك ياروعه انتي اها جينا عليك وين انتي ياست الجبنه ام هبهان وناسها حنان وياست الجبنه ام جنزبيل وناسها عسل عدييل ....

حباب بنيتى بت النيل
حبابك عشره والجابك يجيب رفيقاتك
عشان تساعدن حبوبتكن
كده قومى جيبى لى قشقش انولع الصج
الجنوى ديل هسى بيجوا يشيلوا الفطور لتحتانية
قومى يابنيتى
وتحلى القعده مع الرائعيين

ابوذر حسن طه كتب:: اول حاجة ازيكم في ضلكم الواسع والوارف دة
لكن بس يا خوانا الغلوة ما شميناها ممكن تعيدو الشريط لو سمحتم
بعدين وين البخور والفيشار ولا قهوتكم دي مربوطه
عشان نحن ناس اولاد ماما والاسياد ما بيرضو القهو الممجوجة
واهم حاجة البن يكون حبشي عشان الولية
ونقصو صوت الشريط دة كمان تقوم تجيكم كشه وناس الانضباط اليومين ديل كان اتونست مع ضلك بيكشوك
وفتكم بعافية بجيكم في التني

دستوركم يااولاد ماما
اتفضل كده ياولدى ابو ذر
لجوه
وناولنى معاك مويه من السعن
والجبنة جاهزة بس كده الفشار ده باقى حبوبتك مابتعرفه الا يجوا البنيات الصغار
وتحلى القعده مع الرائعيين

عبداللطيف الدامر كتب:: الحبوبه الرائعه روعه
وينك ياحبوبه؟
الراكوبه فاضيه ومافيها زول والبنابر ((مفلبه))والكانون طافى
الحاصل شنو ياخوانا ...

معليش ياولدى عبد اللطيف
باقى حبوبتك ادوشت يومين
طولت منكم
اتفضل لجوه
وتعال جيب لى جنزبيل من الدكان
تلقى الجبنة جهزت
وتحلى القعده مع الرائعيين

ياامجد انا شلت كلام الطيب بي صمتو ومشيت جبته حفاضات وقلت امكن الحته مقطوعه وانت وضحت كلامو متأخر .. اه انا اعمل شنو وما بقدر افوت الجبنه دي تاني وارجع ارجعن اتصرف بس ..
هي الجبنه دي جبنة حناكيش يعني جبنة ترامس ساااااااكت صح ولا الخبر شنو ياحبوبه وين البخور وين الغلوه كشكشينا .. ولا انتي حبوبه 2009

.. امجد صاحبك صلاح دا داير ليهو كشكشة ساااى وحناكيش .. والله دى شكلها حبوبة معتقة من الزمن الفلانى . اطرح طريحك لقدام اكان تلقى ....

يا ود الجاك الزول ده مالسه ما عارف الفرق بينهم شنو !

وبعدين صلاح ده من زمن المتوسطة بيلبس البنطلون فوق الرده
وبيقعد للجبنه مع ستات الشاي في الافران هو وابايزيد وبيعزمنا
من قروشو عشان كده الراجل خبره قديمه ،،، والقعده هنا فيها
عنقريب هباب فده عز الطلب ......

ياامجد لقيتكم بتاعيين قعدات من زمان

هيااااااا حبوبه انتي وين
نحنا منتظرينك.............!

العزيز جداً روعه
مشتاقين كتير
ليك ولقعدتك ولجبنتك
ليك خالص التحايا

والله طال غيابك ياحبوبة اظهري علي احفادك

ازيكم ناس حبوبة انشاء الله طيبين
والله مابشرب الجبنة لكن جابتنى اللمة الحلوة دى

الرائعه مساحة التفرد بالروعه
دامت اناملك و دام العطاء مزدهرا
تحياتي

انا عجبتني اللمة دي وريحة القهوة وضل الراكوبة وونسة صلاح وأمجد انت يا أمجد اذا ماشي كسلا لازم تاخد كورس بتاع قهوة فى السوق لان كسلا كلها قهوة ومرحبتين بالحبوبة الروعة اللمت الناس

والله ياحبوبه انا خجلت اجي داخله القعده كلها وليدات بس لما جات بت النيل والجمريه وبت السكر قلت كده النخش بس اعمليها لي خفيفه لاني ماشربتها لي 4 سنين
وتسلمي ياروعه ياريعه
ابمو

» اتفضلو معانا
» صلاة الضحى
» متحف المنتدي
» البوم المدينة(الحصاحيصا) كوكتيل(تابع الجديد)
» وداعا حبوبه عطانا