قلنا نأجز بمناسبة السنة الجديدة
نروح عن نفسنا شوية عليك النبي الدنيا دي فيـها شنو ؟؟
وبالمرة إمكن نحظى بواحدة من فوائد "الأصقاع" الخمسة
كان عندنا عدة خيارات لوجهة السفر وما إتحيرنا كتير
وإخترنا البلد التلجها يحرق
وجليدا مشرور ملايات سرائر حيشان أبيااااااض
بلدة قريبة من "قرين الزيبيث ايلاند"
وفركة كعب من المتجمد الشمالي
عملنا الحجوزات بـ"الانترنط" وقطعنا التذاكر
الرحلة طويلة خلاس
أكتر من تمنتاشر ساعة منشرين في "الجو"
من موقف طيارات لي موقف طيارات لمن وصلنا
اللوفتهانزا تتح وترح لمن إستغفرت
لكنـها برضو أفضل من طيران "الأميريكان آير لاينز"
وعشان الكونيكشن عدينا يوم كامل في هامبورج
جيعانين روحنا مارقة قلنا نمش نتغدى
أكل الطيارة تفاتيف ساي
ولانو سوق هامبورج بعيد والبلد ذاتا غالية للغاية
إكتفينا بي ستات الكسرة الفي ضل مباني المطار
طلب الكسرة رشوشة بتلتاشر يورو
كورة نشاة الحلبة بي خمسة يورو
غايتو إمهلنا وتبنا لله والرسول ما نجي بي هامبورج تاني
ركبنا في إتجاه القرين الزيبيث ايلاند
تمانية ساعات في الجو ودخلناها قريب العاشرة صباحاً
وبمجرد نزولنا من الطيارة صاح فينا واحد ليهو شنب أبيض
"هويا جماعة إتغتغتوا إتغتغتوا"
والحمد لله كنا شايلين معانا كمية من الأغتية المعتبرة
غُتا سهم ما يخترقو خلي سقط
المهم طلعنا غُتانا وإتلفلفنا زين ومرقنا من المطار
أمانة ما بلد
شوارع بعرض السموات والارض
مخططة بالألوان الأبيض والأصفر
من سماحتا قربنا ننزل من العربية ونمش فيـها كداري
لمبات إضاءة الشوارع زي شموع أعياد الميلاد
تكتل في عينيـها كدي
والجليد مكشح يلمع تحلف تقول سيتان
ونحن متابعين المناظر من خلال قزاز العربية المسرعة
فــــــــــــــــــــو
فــــــــــــو
فــــــو
الدكاكين الفاتحا على الشارع كلـها قافلة
سألت السواق قال لي بفتحوا بعد طلوع الشمش
طيب وهي بتطلع متين الساعة روحت لي إتناشر بالنـهار ؟؟
قال لي بتطلع حوالي الساعة تلاتة ضهر وتغيب أربعة ونص عصر
شمش السرور الشغالة بي بارك الله في من زار وخف دي
ما زي شمشنا البتحلف إن ما فسختنا ما تغيب
تولع نيرانا مع نيران شاي الصباح
وما تطفيـها إلا مع عودة غنم السرحة المغارب
توِج وججان وججان
لا بتضاريـها سحابة ولا بتمنع حرارتا هبوب
نزلنا في الفندق والساعة قربت لإتنين ضُهر
خليت الجماعة يخشو ويدخلوا العفش جوة الفندق
وجريت قلت أجيب لي تمباك
مانصبح في الصقيع دا برا تمباك
بالله في السقط داك ما خليت شارع كلو مقفل
في الآخر شفت لي دكان فاتح لكن أنوارو خافتة
ولمن وصلتو لقيتو "غير"
ناس قاعدا ملفلفة لاتفرز راجل لا مراة
وهاك يالونسة الدقاق
وكبابي الشُب ما تديك البرد
"الله يقطع البلدية"
طوالي مشيت للقاعد في الكاونتر
سلام عليك آآزول
وعليكم السلام
دحين ما بلقى لي عندكن تمباك ؟؟
قام عزل ليهو قزازة غليدة وكب لي منـها في كباية شُب
براي قلت الناس ديل بيسفو سوائل ولا شنو ؟؟
قلت ليهو دا شنو ؟؟
أقول ليك تمباك تديني الخرابة دا ؟؟
قل لي خرابة شنو إنت ماقريت اللافتة برا ؟؟
أبداً والله جيت داقش ساي
قال لي ياخي دار بار
قلت ليهو "بــــــــــــــــار بأهلو" ؟؟
إتلفت يمين شمال وفي سري وشوشت عبير الذكريات
"ياحليل سيديرس"
قلت ليهو شوف يازول ...
إنتو ما شغالين بالمشروع الحضاري ولا شنو ؟؟
وكرعي دي دخلت في دي
الكلام دا ما عيب عليكن ؟؟
مسوي ليك بار وكمان فاتحو ناصية ؟؟
دحين أسي دي شغلة راجل تأكلو عيش ؟؟
خليـها الحُرمة وزرزرة ناس النظام العام
أسي كان واحد ساي لبعك بي قزازة ما بوديك الآخرة
كان إشتغلت أي حاجة ما كان أحسن ليك ؟؟
قال لي أشتغل شنو ؟؟
قلت ليهو "دحين لو فتحت ليك كشك ...
ولميت التلج دا ...
وسويت ليهو نشارة وبعتو بي بالكوم مابربحك ؟؟"
قال لي "كُشُك وين يابوي مع ناس المحلية ؟؟"
وأنا بتكلم معاهو حسيت بي جسمي تِقِل
شوية كِدا قعدت أكدكِد
وقدر ما جابدت الملاية الكنت لافحا ما إدفيت
قام قال لي كدي خش قريب من الدفاية ديك وعقباتن بنتفاهم
قعدت في كنبة طويلة جنبي كنبة تانية متكية فيـها واحدة نائمة
عاينت فيـها وقلت في سري
"بالله البنية دي كان سترت كريعاتا ديل مالا ؟؟"
عاد شخرت ولا إنقلبت ؟؟
التقول قاعدة في حصة
عاينت فيـها زيـن وبديت أحسب في أنفاسا
شهيق أطلع معاو
زفير أزفتو معاها
صاحب المحل خلعني جنس خُلعة
التقول طالب فيني مغسة ...
"هويا البتعاين دا شهراً ما عندك فيهو نفقة ما تعد أنفاسو"
"يابوي والله خائف عليـها من الزيفة دي ساي "
جاب كباية الشُب تاني وقال لي أكتحا
قلت ليهو "ما أنا بكاتح"
قال لي "أموت ليك وخصمتك بالرسول كان ما كتحتو "
قلت ليهو "الرسول عزيز ومكرم جيبو "
وكتحتو
قادر الله
فِـــرد واحد عيني بقن ياعينيا يا عينيا طشاشك طال متين الجية ؟؟
عاين فيني ومشى شغل ليهو أغنية
سألتو دي منو في الاخوات ؟؟
قال لي دي ما سيلين ديون ما بتعرفا ؟؟
هالله هالله كيف ما بعرفا ؟؟
جابوها داكي الليلة في حلتنا لي عِرِس ود مدينة بت جار النبي
باقي مغترب
والله عولقت غنا الحقيبة جنس عوليق
فاجأني لمن قال لي "بت مدينة السمحا ديك عرسوها بالله ؟؟"
إتعارفنا وحق الله بق الله
قام تاني جاب لي كباية شُب
قلت ليهو عليك النبي كان تخصمني تاني
لكنو خصمني
لا خاصمتو لا فاصلتو
وكتحتو
ولما جاب راح شطفتو
وإدشيت دشوة تمايلت معـها جبال الجليد طربا
وشوية شوية اللسان بقى حجر طاحونة
قلت ليهو ياخي ماعندك من غنانا شيء ؟؟
ضحك ضحكة مجلجلة وكشحني بكبايتين سيوبر
غايتو بعد الخامش ولا الشادش ما عارف
للتعترو شغل لينا خجيجة أم ضنب المابتغباني
وقالت كدي خجت ليك المكان
"ووووووب علينا"
والناس دي جدعوا السويترات بعيد
وأها وأها أها وأها
"قصدي وقصدك مشتاقين مالقو
قصدي فوق السجاير
ولع لي النحرقو "
والناس أها كــــــــــدي
كــــــــــــــــدي
كــــــــدي
"وياعلب الحلاوة
ولع لي النحرقو
العاشق ما بداوا
ولع لي النحرقو
العاشق ما بداوا ولع لي النحرقو ومرض الحب شقاوا
ماتولع لي النحرقـــــــووووو"
المكان كلو قام طولو
كــــــــــــــدي
كـــــدي
كدي
"ياعلب الفرتا
ولع لي النحرقو
ومن يومك الفتا
ولع لي النحرقو
وأنا ياريت لو متا
ماتولع لي النحرقو
يجيبو خبري بالبوستا ماتولع لي النحرقـــــــووووو"
موضوع: أسي في داعي لمجابدة الملايات في السقط دا ؟؟ 
الإثنين 20 يناير 2014 - 11:58
