علي الطلاق بالتلاتة تاني يالمحبوب ما تقول بغم (للراسخين في الطرب)

العزيز حبوّ!
كم اعلم بعد تلك الامسية الخريفية الماطرة بالالحان والغناء الجميل التي استضافنا فيها شباب رفاعة المبدعين وهم يخلدون ذكري الجابري باغنياته الغير منتشرة و غيرمسموعة كم خلفت تلك الامسية المبدعة نقطة تحول في إعادة الاستماع للجابري باعتباره عبقرية فذة في الغناء السوداني ومدرسة لم ولن تتكرر وهاهي محاولة الاستاذ زمراوي وهو يجسد في عظمة الجابري كمطرب لم يجد حظه الكاف في تسيد الساحة الفنية رغم انتاجه المميز

وهاهو الجابري يعني لرمضان حسن بشكل رائع وبديع

أها يا حبو؟
أنا كعب بالله؟

إنننننننت كعب ؟؟
المـــــــــــــــــحاسن
المحاســـــــــــــــــــــــــــن
المحاســـــــــــــــــــــــــــــــــن ؟؟
إت يا ورقة إنت كعبك العالي وحــــالي وياريتو حالي
REALLY YOU MAKE MY DAY

المرة دي يا ورقة رفعت سقوف التطريب وفتحتـها على براحات إطلاقات الوجد
سامحتي كلمات الزين عمارة والحان وبرعي محمد دفع الله

الجابرى ده سحارة بتاعة إبداع ، إبداع لا يُمل منه .

الفنان زمراوى أضاف للحن والإيقاع أداء حركى مُعبر .

يا ورقة المرة دي إياني الجاييكن قبال رمضان
ونصوم بمشيئة الله ويوم العيد بالكبري

هات يا زمن
جيب كل أحزانك
تعال جيب المحن
طول يا أسى
وكتر ينابيع الشجن
جرعني كأس
من لوعة من آلام
ما المحبوب خلاص

استلافات خطيرة
وكلو منك

كلو مني؟
دا كلو منك يا تش تش

الرسول عزيز ومكرم
أها جاملنا وجينا في شنو ؟؟

الجابري في قالب آخر

اندب حظي أم امالى دهري قصدني مالو ومالي

شوف الخيره يارمالى أظن كاتبني عند عمالي
عارض يعترض اعمالى أبنى وأملى ما تمالي

لا تقول ضعت من اهمالى أنا عامل الحزم رأس مالي
بس ايامى ما باسمالى همومي الزايدة متقاسمالى

بين الناس حميدة افعالى أصلى من الجناب العالي
حبك وحبي مانافعالى يوم ينعوني لا تنعالى

قلبي المن الوساوس خالي اليوم انشغل ياخالى
لو كان في اللحد ادخالى أحلى من العذاب ياخالى

دوام آيات محاسنك تالي زيد في هجري لا ترتالى
مقسم عن هواك ما سالى طرفك بالهلاك أفتى لي

حبك كاتمه زاد انحالى من فرطه الدموع فاضحالى
الشاقنى و مغير حالي حسنك واللهيج الحالي

هاك شكواي لو تصغالى العدو حن لي رقا لى
سهران والدموع راشقالى و حياة حبي ليك يا غالى

وفي السهل الممتنع كانت الشغل بالي "مثلاً"

كلمات اغنية سألتو عن فؤادي
سالتو عن فؤادي اجابني ماهو عارف
وعن سبب سهادي اجابني ماهو عارف
حبيبي يا مدلل لحاظ صفا جمالك وغبت عني مالك
اهوي الذي ضناني رماني بنباله ولا سال في حالي ولا خطر في باله
ان صريع محاسنك انا اسير جمالك تعال اشوف تعال الحسن والعواطف
يراني او اراه اقيف ذليل قباله اقولو انت سيدي وديمة عني صارف

الزول دا غناي وروحو مارقه في الغنا :-)

يااستاذ حسن والله اثارتني عبارة الراسخين فقلت ادخل اكشف شويه - لكن صدقني زولك ده ماعندو علاج غير تركبو بسطونه عشان ينعدل صحي الغناء بيولد المياعه ويميت القلب - وقلب زي ده تاني ماظنيتو يحفظ ليهو ايه-

ههههههه عوارض

المهاجر كتب:: ههههههه عوارض

دي ياها المزايدة ذات نفسها يا مهاجر يا ارهابي

(( .......وقلب زي ده تاني ماظنيتو يحفظ ليهو ايه .....))

يا سلام يا مهاجر
القال ليك منو الحفظ بالقلوب ؟؟
اللبتحفظ العقول وبعدا بتطمئن القلوب الفي الصدور
والاطمئنان مرحلة لطيفة "عكس كثيفة" من مراحل الترقي لكمالات الربوبية
وبتجي قبال الراضية ثم المرضية
شوف القران بقول فيها شنو (( ...يا ايتها النفس المطمئتة ارجعي إلى ربك راضية مرضية فأدخلي في عبادي وأدخلي جنتي..)) .

من الجانب التاني عزيزي المهاجر
الحفظ دا اسهل مما هو متصور وبما لا يقاس
بس الكلام العمل مش التسميع
والحافظ آية من القرآن ما بغمز ولا بطاعن ولا بسب ولا بلعن
عموما مشكور على المرور مع تحياتي

أما حكاية البسطونة فدي جريرة براها
بسطونة النظام العام ولا خلافـها ؟؟
ما لحقت نص الناس مالن ما إنعدلو ؟؟
"بي منطقك" نفسو
عموما ما دايرين نمشي كتير في مسألة المتدينين المستحمرين الناس اليومين ديل
الدين البتتكلم عنو دين راقي يا مهاجر
البسطونة والسوط والضرب أها وبعدين ؟؟
وزي ما بقولو الدقو جلدو ما بدقو قلبو
ما تجربو دق القلب

لي شنو ما عايزين تركبو صعاب المهام ويكون العمل وفق القول البكون وفق الفكر ؟؟
وعايزين تركبوا الناس بساطين ؟؟

يا حبو
رمضان ع الابواب
خليك من ناس المهاجر زنوبهم 20 رمضان ما ينضفوهن
ابق مارق الملعب جاهز
\

زمراوي فنان موهوب مزج ما بين الاداء المسرحي لخضر بشير والطرب الراقي للجابري .. وين هوج الرياح يا شباب

والله ي المهاجر كرهتنا الروقة طوااااالي ناطي لينا .... وروحو عن قلوبكم ساعة بعد ساعة .. القال كدة منو

ياورقة أهو بنطوي في المسافات طي
كتر خيرك طلعتني من حالة أسبابا لا بتنحكي ولا بتتقال
غايتو السودان دا يوم بكتل ليهو متغرب الآخر ما بعرفو

بليغ جيفارا
ياخي اسمك دا عجيب جداً
بجمع بين إسمين غاية في التفرد
على المستويين الفني والثوري
وإذا كان لكل زول من إسمه نصيبيب
فإنت عندك من إسمك نصيبين
تسلم ياخي وأتمنى نتعرف بيك عن كثب

يا المحبوب ... بليغ جيفارا ان عرفتة فقد يزول العجب .. عشان كده خليك احسن كده ..
فبليغ قادم بقوة واظن ان للاخ ترتورة ابن سوف ينافسة فى كل المنتديات المتفرعة .. لهم التحية ولك ..
كنت ناوى افتح بوست خاص بالابن بليغ لنشاطة الملموس .. لكن ما دام جات منك نقرط على كدة

يا دكتور أنا مالبيب
كان ترسل لي في الخاص بدل الضهيب دا
لكن الفيك إتعرفت
ياخي كنت متحير في مجدوب الطيب
زول كتابتو ثابتة
براي قلت يكون دفعة ناس أبوي الله يرحمو ودكتور بكري وحسن وراق
وصدق حدسي
والحمد لله المسكت في بليغ حمدي وجيفارا ما تكلمت عن الدفع
كان الجاري علي ما يلحقني

..

.. الاستاذ وراق
.. والمتداخلين

تحية السلام والمحبة ..
.. و ..
.. اعتقد باني قرأت كلمة .. ( بسطونة ) !! ...
.. فعلا ان هذا الصوت المتفرد .. كما وصفه الروائي محمود محمد مدني .. مثل ..( البسطونة ) .. في قوتها .. ولدانتها ... وتثنيها .. و حينما تحركها بسرعة فى الهواء تصدر اصواتا بدرجات متفاوته ... وهذه هى.. حنجرة .. الجابرى .. عميقة القرار .. قوية الجواب ...

.. فعلا يا استاذ وراق .. ان الجابري من الاصوات النادره في السودان واعتقد انه لن يتكرر .... ومن المدهش ...ان لجنه اجازه الاصوات رفضت اجازه صوت الجابري ... اكثر من مره ... وبالاجماع ....!!! وان صوته لا يصلح الغناء !! ... وكادوا ان يحرمونا من هذا الصوت .. لو لا .. ( بيار كاردان) الاغنية السودانية ... عبدالرحمن الريح ..
.. استغرب كيف لجنة تتميز بحسن التذوق الفني ان تكون دواخلهم بهذا القبح .. والاستقصاء ..!!

.. كنت جاي .. ( بي عدلي ) .. بضرب لهذا العبقري لو سمعتة سوف .. ( تدلي الرايات ) .. و يستبد بك الطرب .. كيزيد بن عبدالملك عندما تغنيه ( حبابة ) .. يشق ثيابه .. يدور في القصر .. ويتمني ان يطير .. ولكن حراس .. ( بوابة ) المنتدي منعوني .. بادخال اي روابط ... لا ادري لماذا تذكرت مستشفي الحصاحيصا.. ( زمن الجنية يساوي 3 دولار ) .. .. و ذلك .. ( الحارس ) .. الذي ينفذ التعلميات .. ( بصرامة ) ..عندما كنا .. ( نتوسل ) .. الية بادخال ( اكل البيت ) .... تأمل ..!

.. حبيت ان يكون مدخلي للمنتدي .. من بوابة الموسيقي لايماني .. بانها هي لغة تواصل مع الناس فهي تنتقل من القلب إلى القلب.. دون حواجز ...

.. كل المودة ..

» لحن الخميس للراسخين في الطرب
» وزير عدل حلف طلاق "بالتلاتة" أيي والله وقال تاني قاضي ما يشتغل خلي وزير عدل "عفيت منك"
» يالمحبوب ! هاك الموجب بتاعي دا في ولدك عبدرحمن
» بيت الجالوص قد ول عهده
» (وكت الدليب دقا وزنقوا !) كلام عجيب يشبه الطيب صالح (للراسخين في ادب التراث )