بعيد عن حالة الاستقطاب الحاد
وليس دفاعاً عن رئيس الاتحاد
ولا تقليل من شأن معارضيه بأي حال من الأحوال
وكلنا عارفين وحدة الكيان القدم لينا الرئيس
طيب الحصل شنو ؟؟
شنو الأضعف الإتحاد من اساسو ؟؟
وشنو سِر الهجمة الشرسة ضد الرئيس وتصويره كأنه حيدر بورسودان ؟؟
الكلام عن الرئيس مفاجي "في جانب من جوانبه"
"بالنسبة لنا كناس متابعين من بعيد لبعيد "
والأكثر مفاجاة
أن تكون المجموعة الكانت واقفة معاهو جزءا من كيان معارضيه
معارضته ذات الدفع الثنائي
"مكنة وتمكين" من جانب
"وديل مؤتمر ومتعشمين في سراب القيعة"
ومجموعة "الدعم اللوجستي" من الجانب الآخر
بالنسبة لمجموعة الدعم اللوجستي
دخلت الاتحاد المحلي دا في منتصف التسعينات
وبعدها ركبت حصان الاتحاد العام ؟؟
ونجحت في تغيير موازينو بموازين ذات بعد سياسي
"خدمة لأهداف المؤتمر"
مش مهم
الأهم الحصل شنو خلا المجموعة بقت فسطاطين ؟؟
في ظروف تدهورت فيها أنديتنا
وعدمت طافي النار
وممثل المنطقة يقابض بزبد "البحر"
وممكن قبول أن تمثل المنطقة بفريق واحد"مع تاريخها الثر"
بس كمان ما تنعدم روح التنافس على المستويين
خروج من دوري الأضواء على مستوى البلد
وإنعدام المحفز على التنافس وفقدان مقوماته محلياً
الاستاد مشلع والجمهور محتجب
وممثل المنطقة يصارع من أجل البقاء
وأصبح اللعب خارج الاستاد في ملاعب اخرى
وعلى مستوى الادارات وبدون جمهور
ودي كانت نهاية المرحلة الأولى من التدمير
الآن بدأت المرحلة التانية من عملية التدمير "غير المقصود"
نتخلى عن ديمقراطية واهلية الحركة الرياضية وإلى الأبد
نفرتق نسيجنا الرياضي الكان مجموعات غاية في الانسجام
وتصبح العملية الرياضية مرتبطة بأي حاجة ما عدا الكورة
ونقوم بـ"الضرورة" بتسليم الاتحاد لناس التمكين
لرؤية ونهج حزب سياسي مليان قروش ومتمكن من السلطة "بالرجالة"
وأهلية وديمقراطية العمل الرياضي شيك ما بنصرف عندهم
ولا بسير في تجارتهم وإستثماراتهم
وندحرج ممثلنا بعيد لا ممتاز ولا غيرو
فماذا تبقى لنا أيـها السادة الكرام ؟؟
لي شنو دايرننا نقيف ضد الرئيس الان ؟؟
يعني فجأة بقى ما جدير بمنصب الرئيس ؟؟
وما يؤلم كمية الدعم المادي والمعنوي المقدم لمعارضيه
والبدعمك من جيوب الغلابة والمساكين بسمع رايك ؟؟
أو ممكن يقبل برؤيتك في تسيير كيانك ؟؟
إلا نكون في غفلة عن رؤية ناس التمكين
ديل ما عندهم شغلة في كورة
ودايرين جمهور الرياضة رصيد لحزبهم الحاكم
ممكن يجي واحد ويقوليك ولا واحد من القائمة التانية تمكين
طيب مالن ما عندهم ناس ؟؟
والله من المحلية والمعتمدية ممكن يعملوا لستا تنافس بلاتر
شان كده البوقعنا في أحضانـهم شنو ؟؟
إنني لست في موقف من يحاسب وإلقاء المسئولية على زيد أو عبيد
قطع شك نحن كلنا رئاسة ومعارضة مسئولين من التردي الحاصل دا
دمرنا الكورة "برانا"
وتركنا أنديتنا وهربنا
قضينا على مقومات الحركة الرياضية محلياً
ودايرين نقضي على وجودنا على المستوى العام
ونضع يدنا في يد غول التمكين الرمد خشومنا
فقر وجوع ومرض في حوش بيتك ما تقدر تجر
وداير يقضي على ما تبقى من الحركة الرياضية في البلد
نتفق أو نختلف مع الرئيس
لكن ناس التمكين ما حا يسمحوا بمجرد الكلام
وليبقى الرئيس ونلم الإنقسام والفرصة أمامنا
مافينا زول رشيد ؟؟
ننهي وندمر البنوهو أهلنا بعرقهم وقوت عيالهم
ونخرج من دائرة التنافس على المستوى العام
ياناس ما تستهدوا بالله
ولمن يجي الوقت ونروق نتحاسب
والحساب ولد
والمؤتمر الوطنى خرب بلد
موضوع: ليس دفاعاً عن الجكومي لكن ناس التمكين بلحقونا الماليزية ومن الأفضل رتق الفتق "رأي" 
السبت 19 أبريل 2014 - 5:57
