موضوع: ماشين السفارة الامريكية لتحرير مريم .. الماش "معانا" يرفع يدو .. "ويجهز عنقريبو" الجمعة 4 يوليو 2014 - 18:25
ولا نامت أعين الجبناء عصينا عصينا ورفعنا عصينا وعلى الامريكان منو بوصينا ؟؟ معركة التحرير إمكن قبال الفطور وإمكن بعدو المهم والله الامريكان إلا يمرقنكن كرعيكن والطيارات البي طيارنها ما بتخوفنا خلي البرا طيار
ما عندنا اي شغلة غير التحرير قانون الانتخابات خجيناهو وظبطناهو رفع الدعم عن المحروقات كبينا ليهو البنزين الحوار جاري والله غارس بيل ما يلحقو تاني في شنو ؟؟ ايها الامريكان أحسن ليكن تفكوها وإن ما فكيتوها إيانا الفاكنها في نفسكن إنتو قايلين دي قوانتنامو ؟؟ فكوها أخير ليكن بنحسب لحدي مية ألف دولار وإن ما فكيتوها أرجو الراجيكن
إنتو صحي السفارة الامريكية حولوها من وسط الخرطوم ؟؟ طيب ودوها وين ؟؟ ما تقول لي برا في الخلاء دا ؟؟ والله إن مرقتوها في بُتري يانا اللاحقنـها الحافلات راقدة والجزلين هبطرش ولا ما مشكلة نمشي كداري ونفطر في الجريف وبعد الطراويح نتوجه للسفارة سجن سجن غرامة غرامة واوعة بان كي مون بي عويناتو الزي قدود الجِلِد يجي يتوسط ومش لو رسل لينا الابراهيمي لو رسل لينا ابراهومة بتاع الهلال الزمان داك ما بنتراجع
ما بنتازل من التحرير إلا الامريكان يعتذروا لينا ويدونا فيز عشان نسافر أمريكا ونجتمع معاهن في البيت الابيض في واشنطون ونشوف معاهن قصة البت دي وحكايتا شنو ؟؟ ونحن النحدد العدد الماشي عشان ما يجي كرتي يركب ويركب مرتو ويفكنا في الهوا
وكمان في شرط تاني السفر قبال العيد بي كم يوم ويعملوا لينا حفلة استقبال تغني لينا فيها جنيفر لوبيز إلا لبسا اللبستو في البرازيل ما معانا عشان نحن أصحاب مشروع وكدا دايرا تجي تغني تجي وتقعد في كرسي وبي عود إن عجبا
موضوع: ماشين السفارة الامريكية لتحرير مريم .. الماش "معانا" يرفع يدو .. "ويجهز عنقريبو" 
الجمعة 4 يوليو 2014 - 18:25
