بالله عليكن كان ما سويتو ليكن "سد" تاني ! نحن مالنا الموية دايرين بيها شنو ؟؟ فيديوهات موية بس

سد النهضة
سد النهضة
سد النهضة هاجننا !!
إسِد نيكتن شحدت ربي عليكن
مالكن الموية دايرين بيها شنو بالله ؟؟
القمح بقى ما فايت اللقيمات
والقطن بدل كان سكلاريدس بقى زيو وزي "نعجة أدنبرة دوللي"
وبعدين الفشقة والاستعجال في شنو ؟؟
ما خلاص بجينا المطر من الحول للحول
بس يعني خلاص بقت علي الموية دايرنها أربعة وعشرين ساعة ؟؟
مطرتين تلاتة كل سنة وخلاس
مافي داعي للطمل والبعوض والكلوروكين والراجمات ودربات الملح والجلكوز
والقعونج واغ واغ واغ الليل كلو حامينا النوم
"تلاتة موبايلات ما يجبن في إتصالات راسك حاجة"
بعدين تعالوا هنا ما اي حاجة بقت "حولية" وإن شئتم الدقة "سنوية"
مالو الحصل لينا شنو ؟؟
الكسوة من العيد للعيد
والجلود للجنجويد يستلموها قبال ما ناكل الشية ونحلي بـ"المرارة"
البليلة العدسي دي القاعد يسويها منو إن ما حال عليها الحول ؟؟
وحكومة الاسلامويين ذاتا ما قاعد تقصر
قسمت لينا الخدمات بالتقويم الحولي
عام القضاء على الفقر والمسغبة "السنة الجاية"
"مسغبة دي قايتو إتوكلت علي الله وكتبتها بي صا صبُر"
سنة السلام والقضاء على الحركات المسلحة "السنة الجاية"
"والحركات المسلخة اليومين ديل مِرطِبة من لجنة لي لجنة"
"حاورني حاول حِس بي أفقرني وخت اللوم علي ثبتني والكاينة التكون"
عام إصحاح البيئة" "شرحو"
عام الخرطوم عاصمة للثقافة الحوارية "كل يوم معانا وماقادرين نقول بغم"
مهرجانات السواحة والتشوق سنوية
أها قالوا بتاع مدني بدأ بالتشوق لإعادة مشروع الجزيرة "سيرته الأولى"
لبعات لجان الحج والعمرة سنوية وبالريال
شمارات المراجع العام "السنوية" بتونسوا بيها في برلمان عشة وحسبو وسعاد وبدرية
أراضي إستثمارية وإفتتاح جامعة أولاد المغتربين "السنة الجاية"
رفع الرقابة القبلية والآنية والبعدية عن الصحف والمجلات الحائطية "السنة الجاية"
إلزامية التأمين الصحي وتغطيتو لكافة قطاعات المِرطبين "السنة الجاية"
الطريق القاري "زلط وسكك حديدية" "السنة الجاية"
حا يربط بورسودان بأنجمينا وتمبكتو وبوركينا فالصو
إكتمال البنيان في المدينة الرياضية "السنة الجاية"
ووصول قطارات ولاية الخرطوم من الصين الشقيقة "السنة الجاية"
والاكتفاء الذاتي من الكريمات وتياب السهرة البترقش "كِدا" السنة دي
أما الأدوية والامصال فسيتم تركيبها محليا بواسطة خبراء الأعشاب النيلية
ولمن الحاجات دي كلها حا تكون في الأيام المنظورة
مالو لو أضفنا ليها الموية الما منظور تغشانا ؟؟
عشان كدة نرجو من حكومة جارتنا
وبت حارتنا تعمل سد تاني
وبنريييييييييييييييييييييييييدا
ياخي مالو ما تترشرشوا
ونحن بالمرة نشوشو قمحنا بالظمأ
ونتِر قطنا المحور وراثياً بالمُترار
والغلغل نعلف بيهو البهيمات الما عندهن حق الجاتوهات والباسطة وحلاوة "دِربِس"
وعشان ما "ندبرِس" شوف العين ما كتلو غزال

تاني النسمع لي زول يقول دايرلو "كوز" موية
اها ؟؟
بالله دايرين بيها شنو ؟؟
النافورا قلتو حرام ما بندورا
خلاس مطرة مطرتين لا قش لا بقر
وقعونج مامون حميدة إن شاء الله تعملو لقيمات
تتقدم مع مديدة الحلبة

تكوين الرابطة الدولية لمعجبي السدود
وزي ود الموج انا الرئيس والسكرتير وامين المال
والجمعية العمومية العادية والاكسترا اورديناري
والعجبو عجبو والماعجبو ييمم "جبهتو" شطر التيمم
الاعلان عن قيام الرابطة كتبناهو
وادينا لبدرية عشان تراجعو لينا من "الجيهة" القانونية
قلنا ليها دايرنو دستور المداولات فيهو سرية
زي مداولات حوار الوثبة عشان واحد "يشمو" مافي
يعني ما "يبخر" موية
وكتر خيرا ومع انها قالت مشغولة
بإلغاء قانون النظام العام والاناكتمنت أوف ا نيو ليقزليشن
Enactment of a New Legislation
"الأمر بالحلوف والنهي عن المنكير"
لكن قالت حا تحاول تلقى وقت وتجيهو لينا جيهة تمام
المهم زي ما الناس إجتهدت في تكوين الروابط
خاصة "المناهدة" للسدود نحن كمان لازم ننظم حالنا
فسد النهضة المداقرنو دا ما لو سد ليهو غاز ولا فحم ؟؟
سد ليهو دواء ولا منع منكن دقيق ؟؟
ما موية بس
وأسي كان ما ساي دايرين بيها شنو هاجننا ؟؟؟

welelawa welelawa
welelawa welelawa
welelawa welelawa

اشمعنا الكريمات والتياب السنه دى!!!
وين طولت الغيبه
روعة الكلم والنضم

» وإنتي ذاتك القال ليك شوفيهو منو ؟؟ نحن مالنا قاعدين نسو في شنو ؟؟ فيديوهات
» يمين بالله الجماعة ديل إلا دايرين يغيرونا بي ناس "تانيين" !!!!! "فيديو" خطير
» والله محنتونا !! إنتو دايرين خرمجة ولا دايرين ليكم حاجة تانية ؟؟
» "إستاربكس" حكاية عجبتني نقلتـها ليكن بي صمتا
» غايتو جنس بشتنة عليكن !!