مافي أي عذر دي 7.3 مليار دولار الفيهو الزول أبوصلعة
وأي زول أكل ضلعة في عرس شهيد
ولا إستعجل "رشو" ليهو بي سليقة الضلع !!
برضو يدفع
ولو هزيت في الشهيد العريس يكون يومك زي السجم والرماد
والعجب كان بدرية حننت ليك يديك بي باقي حنة الشهيد العريس
برضو تدفع
الفديوهات "قاعدة" والصور على قفا من يشيل مع قيقم وشنان
"الطاغية الأمريكان ليكم تسلحنا"
"بي قول الله وقول الرسول ليكم تسلحنا"
برضو تدفع
"يا نفس أقسمت لتنزلنه
لتنزلن أو لتكرهنه
إن أجلب الناس وشدوا الرنه
مالي أراك تكرهين الجنه
مالي أراك تكرهين الجنه الجنه الجنه"
من الليلة الكشف حا يمر والختة بالدولار
ما تقول بديكم شوالين عيش فتريتة ولا ود فحل ولا "هجين"
دا كلو ما بسير بإختصار الدفع كاشا ولا تقبل الأشلاء العينية
ما تقول لي من طلاب دارفور ولا النيل الابيض ولا شمال كردفان
أهل الضحايا "12 أمريكي" بس
لكن حلفو قالوا ما بعفو كلو كلو
هديلك قاعدين تحت شجدرة المحكمة في واشنطون دي سي
والله واحد قريبنا شغال في واشنطون سكة حديد
قال سمع النسوان الأمريكيات يزغرتن بعد الجلسة
ومحاميهم ستيورات نيوبيرقر يعرض علي عدلو
معاهو تلاتة محامين بدربوا معاهم في كرويل آند مورنق
اها قريبنا قال لينا الزحمة كانت شديدة خلاس
وقاعة المحكمة حارسنها ناس حميدتي واشنطون دي سي
وقوات الدفاع الشعبي التابعة لفرجينيا وميرلاند وجورج تاون
في حالة استعداد تحسباً لأي طاري
وفعلا قامت شكلة لكن قوات الدعم السريع طفتا
السبب في واحدة أمريكية تزغر بيديها الاتنين
في واحد من كتبة العرضحالات من اصول افغانية
قال ليها "ياولية أعدلي توبك دا"
المهم الرجال يهتفوا " لا لدنيا قد عملنا نحن للضحايا فداء"
"فليدفع الكيزان ديناً أو تستمر عقوبات الجزاء"
ونقلت وكالة الأنباء الأمريكية عن غندور قوله
"ما بندفع لأنو المحكمة ما مختصة"
واحد من الصحفيين قال ليهو "طيب ما كان تدفعوا بعدم الإختصاص"
شب ليهو صحفي من الاسوشيتد برس قال ليهو
"ياخي مالك ولا مالن إمكن دايرين يدفعو بالدولار"
موضوع: إلزام حكومة الكيزان بـ 7.3 مليار دولار !! أي زول أكل ضلعة في عرس شهيد يجينا مارق !! 
الأحد 30 يوليو 2017 - 6:25
